Aṅguttara Nikāya 5 · AN5.111

完整巴利原文 · 稳定分页　当前仅加载第 112 阅读页；保留 Bilara 原生段落标识，每页最多 120 段。

0.1

Aṅguttara Nikāya 5.111

0.2

12. Andhakavindavagga

0.3

Kulūpakasutta

1.1

“Pañcahi, bhikkhave, dhammehi samannāgato kulūpako bhikkhu kulesu appiyo ca hoti amanāpo ca agaru ca abhāvanīyo ca.

1.2

Katamehi pañcahi?

1.3

Asanthavavissāsī ca hoti, anissaravikappī ca, vissaṭṭhupasevī ca, upakaṇṇakajappī ca, atiyācanako ca.

1.4

Imehi kho, bhikkhave, pañcahi dhammehi samannāgato kulūpako bhikkhu kulesu appiyo ca hoti amanāpo ca agaru ca abhāvanīyo ca.

2.1

Pañcahi, bhikkhave, dhammehi samannāgato kulūpako bhikkhu kulesu piyo ca hoti manāpo ca garu ca bhāvanīyo ca.

2.2

Katamehi pañcahi?

2.3

Na asanthavavissāsī ca hoti, na anissaravikappī ca, na vissaṭṭhupasevī ca, na upakaṇṇakajappī ca, na atiyācanako ca.

2.4

Imehi kho, bhikkhave, pañcahi dhammehi samannāgato kulūpako bhikkhu kulesu piyo ca hoti manāpo ca garu ca bhāvanīyo cā”ti.

2.5

Paṭhamaṁ.