相应部第 15 相应

Saṁyutta Nikāya 15.10

1. Paṭhamavagga

Puggalasutta

Ekaṁ samayaṁ bhagavā rājagahe viharati gijjhakūṭe pabbate.

Tatra kho bhagavā bhikkhū āmantesi:

“bhikkhavo”ti.

“Bhadante”ti te bhikkhū bhagavato paccassosuṁ.

Bhagavā etadavoca:

“Anamataggoyaṁ, bhikkhave, saṁsāro …pe…

ekapuggalassa, bhikkhave, kappaṁ sandhāvato saṁsarato siyā evaṁ mahā aṭṭhikaṅkalo aṭṭhipuñjo aṭṭhirāsi yathāyaṁ vepullo pabbato, sace saṁhārako assa, sambhatañca na vinasseyya.

Taṁ kissa hetu?

Anamataggoyaṁ, bhikkhave, saṁsāro …pe…

alaṁ vimuccitun”ti.

Idamavoca bhagavā.

Idaṁ vatvāna sugato athāparaṁ etadavoca satthā:

“Ekassekena kappena,

puggalassaṭṭhisañcayo;

Siyā pabbatasamo rāsi,

iti vuttaṁ mahesinā.

So kho panāyaṁ akkhāto,

vepullo pabbato mahā;

Uttaro gijjhakūṭassa,

magadhānaṁ giribbaje.

Yato ca ariyasaccāni,

sammappaññāya passati;

Dukkhaṁ dukkhasamuppādaṁ,

dukkhassa ca atikkamaṁ;

Ariyaṁ caṭṭhaṅgikaṁ maggaṁ,

dukkhūpasamagāminaṁ.

Sa sattakkhattuṁparamaṁ,

sandhāvitvāna puggalo;

Dukkhassantakaro hoti,

sabbasaṁyojanakkhayā”ti.

Dasamaṁ.

Paṭhamo vaggo.

Tassuddānaṁ

Tiṇakaṭṭhañca pathavī,

assu khīrañca pabbataṁ;

Sāsapā sāvakā gaṅgā,

daṇḍo ca puggalena cāti.