完整巴利原文 · 稳定分页 当前仅加载第 23 阅读页；保留 Bilara 原生段落标识，每页最多 120 段。
Saṁyutta Nikāya 17.30
sn17.30:0.13. Tatiyavagga
sn17.30:0.2Bhikkhusutta
sn17.30:0.3Sāvatthiyaṁ viharati.
sn17.30:1.1“Yopi so, bhikkhave, bhikkhu arahaṁ khīṇāsavo tassapāhaṁ lābhasakkārasiloko antarāyāya vadāmī”ti.
sn17.30:1.2Evaṁ vutte, āyasmā ānando bhagavantaṁ etadavoca:
sn17.30:1.3“kissa pana, bhante, khīṇāsavassa bhikkhuno lābhasakkārasiloko antarāyāyā”ti?
sn17.30:1.4“Yā hissa sā, ānanda, akuppā cetovimutti nāhaṁ tassā lābhasakkārasilokaṁ antarāyāya vadāmi.
sn17.30:1.5Ye ca khvassa, ānanda, appamattassa ātāpino pahitattassa viharato diṭṭhadhammasukhavihārā adhigatā tesāhamassa lābhasakkārasilokaṁ antarāyāya vadāmi.
sn17.30:1.6Evaṁ dāruṇo kho, ānanda, lābhasakkārasiloko kaṭuko pharuso antarāyiko anuttarassa yogakkhemassa adhigamāya.
sn17.30:1.7Tasmātihānanda, evaṁ sikkhitabbaṁ:
sn17.30:1.8‘uppannaṁ lābhasakkārasilokaṁ pajahissāma, na ca no uppanno lābhasakkārasiloko cittaṁ pariyādāya ṭhassatī’ti.
sn17.30:1.9Evañhi vo, ānanda, sikkhitabban”ti.
sn17.30:1.10Dasamaṁ.
sn17.30:1.11Tatiyo vaggo.
sn17.30:1.12Tassuddānaṁ
sn17.30:2.0Mātugāmo ca kalyāṇī,
sn17.30:2.1putto ca ekadhītu ca;
sn17.30:2.2Samaṇabrāhmaṇā tīṇi,
sn17.30:2.3chavi rajju ca bhikkhunāti.
sn17.30:2.4