完整巴利原文 · 稳定分页 当前仅加载第 6 阅读页；保留 Bilara 原生段落标识，每页最多 120 段。
Saṁyutta Nikāya 24.6
sn24.6:0.11. Sotāpattivagga
sn24.6:0.2Karotosutta
sn24.6:0.3Sāvatthinidānaṁ.
sn24.6:1.1“Kismiṁ nu kho, bhikkhave, sati, kiṁ upādāya, kiṁ abhinivissa evaṁ diṭṭhi uppajjati:
sn24.6:1.2‘karoto kārayato chindato chedāpayato pacato pācāpayato socato socāpayato kilamato kilamāpayato phandato phandāpayato pāṇamatipātayato adinnaṁ ādiyato sandhiṁ chindato nillopaṁ harato ekāgārikaṁ karoto paripanthe tiṭṭhato paradāraṁ gacchato musā bhaṇato karoto na karīyati pāpaṁ.
sn24.6:1.3Khurapariyantena cepi cakkena yo imissā pathaviyā pāṇe ekamaṁsakhalaṁ ekamaṁsapuñjaṁ kareyya, natthi tatonidānaṁ pāpaṁ, natthi pāpassa āgamo.
sn24.6:1.4Dakkhiṇañcepi gaṅgāya tīraṁ gaccheyya; hananto ghātento chindanto chedāpento pacanto pācento, natthi tatonidānaṁ pāpaṁ, natthi pāpassa āgamo.
sn24.6:1.5Uttarañcepi gaṅgāya tīraṁ gaccheyya; dadanto dāpento yajanto yajāpento, natthi tatonidānaṁ puññaṁ, natthi puññassa āgamo.
sn24.6:1.6Dānena damena saṁyamena saccavajjena natthi puññaṁ natthi puññassa āgamo’”ti.
sn24.6:1.7“Bhagavaṁmūlakā no, bhante, dhammā …pe…
sn24.6:1.8“Rūpe kho, bhikkhave, sati, rūpaṁ upādāya, rūpaṁ abhinivissa evaṁ diṭṭhi uppajjati:
sn24.6:2.1‘karoto kārayato …pe…
sn24.6:2.2natthi puññaṁ natthi puññassa āgamo’ti.
sn24.6:2.3Vedanāya sati …pe…
sn24.6:2.4saññāya sati …
sn24.6:2.5saṅkhāresu sati …
sn24.6:2.6viññāṇe sati, viññāṇaṁ upādāya, viññāṇaṁ abhinivissa evaṁ diṭṭhi uppajjati:
sn24.6:2.7‘karoto kārayato …pe…
sn24.6:2.8natthi puññaṁ natthi puññassa āgamo’ti.
sn24.6:2.9Taṁ kiṁ maññatha, bhikkhave,
sn24.6:3.1rūpaṁ niccaṁ vā aniccaṁ vā”ti?
sn24.6:3.2“Aniccaṁ, bhante” …pe…
sn24.6:3.3api nu taṁ anupādāya evaṁ diṭṭhi uppajjeyya:
sn24.6:3.4‘karoto …pe…
sn24.6:3.5natthi puññaṁ natthi puññassa āgamo”ti?
sn24.6:3.6“No hetaṁ, bhante”.
sn24.6:3.7“Vedanā …
sn24.6:3.8saññā …
sn24.6:3.9saṅkhārā …
sn24.6:3.10viññāṇaṁ niccaṁ vā aniccaṁ vā”ti?
sn24.6:3.11“Aniccaṁ, bhante …pe…
sn24.6:3.12api nu taṁ anupādāya evaṁ diṭṭhi uppajjeyya:
sn24.6:3.13‘karoto kārayato …pe…
sn24.6:3.14natthi puññaṁ natthi puññassa āgamo’”ti?
sn24.6:3.15“No hetaṁ, bhante”.
sn24.6:3.16“Yampidaṁ diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā tampi niccaṁ vā aniccaṁ vā”ti?
sn24.6:3.17“Aniccaṁ, bhante …pe…
sn24.6:3.18api nu taṁ anupādāya evaṁ diṭṭhi uppajjeyya:
sn24.6:3.19‘karoto kārayato …pe…
sn24.6:3.20natthi puññaṁ natthi puññassa āgamo’”ti?
sn24.6:3.21“No hetaṁ, bhante”.
sn24.6:3.22“Yato kho, bhikkhave, ariyasāvakassa imesu ca ṭhānesu kaṅkhā pahīnā hoti, dukkhepissa kaṅkhā pahīnā hoti …pe… dukkhanirodhagāminiyā paṭipadāyapissa kaṅkhā pahīnā hoti—
sn24.6:4.1ayaṁ vuccati, bhikkhave, ariyasāvako sotāpanno avinipātadhammo niyato sambodhiparāyano”ti.
sn24.6:4.2Chaṭṭhaṁ.
sn24.6:4.3