完整巴利原文 · 稳定分页 当前仅加载第 1 阅读页；保留 Bilara 原生段落标识，每页最多 120 段。
Saṁyutta Nikāya 33.1
sn33.1:0.11. Vacchagottavagga
sn33.1:0.2Rūpaaññāṇasutta
sn33.1:0.3Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
sn33.1:1.1Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
sn33.1:1.2Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako bhagavantaṁ etadavoca:
sn33.1:1.3“ko nu kho, bho gotama, hetu, ko paccayo, yānimāni anekavihitāni diṭṭhigatāni loke uppajjanti—
sn33.1:1.4sassato lokoti vā, asassato lokoti vā, antavā lokoti vā, anantavā lokoti vā, taṁ jīvaṁ taṁ sarīranti vā, aññaṁ jīvaṁ aññaṁ sarīranti vā, hoti tathāgato paraṁ maraṇāti vā, na hoti tathāgato paraṁ maraṇāti vā, hoti ca na ca hoti tathāgato paraṁ maraṇāti vā, neva hoti na na hoti tathāgato paraṁ maraṇāti vā”ti?
sn33.1:1.5“Rūpe kho, vaccha, aññāṇā, rūpasamudaye aññāṇā, rūpanirodhe aññāṇā, rūpanirodhagāminiyā paṭipadāya aññāṇā;
sn33.1:1.6evamimāni anekavihitāni diṭṭhigatāni loke uppajjanti—
sn33.1:1.7sassato lokoti vā …pe…
sn33.1:1.8neva hoti na na hoti tathāgato paraṁ maraṇāti vāti.
sn33.1:1.9Ayaṁ kho, vaccha, hetu, ayaṁ paccayo, yānimāni anekavihitāni diṭṭhigatāni loke uppajjanti—
sn33.1:1.10sassato lokoti vā, asassato lokoti vā …pe…
sn33.1:1.11neva hoti na na hoti tathāgato paraṁ maraṇāti vā”ti.
sn33.1:1.12Paṭhamaṁ.
sn33.1:1.13