完整巴利原文 · 稳定分页 当前仅加载第 47 阅读页；保留 Bilara 原生段落标识，每页最多 120 段。
Saṁyutta Nikāya 35.64
sn35.64:0.17. Migajālavagga
sn35.64:0.2Dutiyamigajālasutta
sn35.64:0.3Atha kho āyasmā migajālo yena bhagavā tenupasaṅkami …pe…
sn35.64:1.1ekamantaṁ nisinno kho āyasmā migajālo bhagavantaṁ etadavoca:
sn35.64:1.2“sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
sn35.64:1.3“Santi kho, migajāla, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā.
sn35.64:2.1Tañce bhikkhu abhinandati abhivadati ajjhosāya tiṭṭhati.
sn35.64:2.2Tassa taṁ abhinandato abhivadato ajjhosāya tiṭṭhato uppajjati nandī.
sn35.64:2.3Nandisamudayā dukkhasamudayo, migajālāti vadāmi …pe…
sn35.64:2.4santi ca kho, migajāla, jivhāviññeyyā rasā …pe…
sn35.64:2.5santi ca kho, migajāla, manoviññeyyā dhammā iṭṭhā kantā manāpā piyarūpā kāmūpasaṁhitā rajanīyā.
sn35.64:2.6Tañce bhikkhu abhinandati abhivadati ajjhosāya tiṭṭhati.
sn35.64:2.7Tassa taṁ abhinandato abhivadato ajjhosāya tiṭṭhato uppajjati nandī.
sn35.64:2.8Nandisamudayā dukkhasamudayo, migajālāti vadāmi.
sn35.64:2.9Santi ca kho, migajāla, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā.
sn35.64:3.1Tañce bhikkhu nābhinandati nābhivadati nājjhosāya tiṭṭhati. Tassa taṁ anabhinandato anabhivadato anajjhosāya tiṭṭhato nandī nirujjhati.
sn35.64:3.2Nandinirodhā dukkhanirodho, migajālāti vadāmi …pe…
sn35.64:3.3santi ca kho, migajāla, jivhāviññeyyā rasā iṭṭhā kantā …pe…
sn35.64:3.4santi ca kho, migajāla, manoviññeyyā dhammā iṭṭhā kantā manāpā piyarūpā kāmūpasaṁhitā rajanīyā.
sn35.64:3.5Tañce bhikkhu nābhinandati nābhivadati nājjhosāya tiṭṭhati. Tassa taṁ anabhinandato anabhivadato anajjhosāya tiṭṭhato nandī nirujjhati.
sn35.64:3.6Nandinirodhā dukkhanirodho, migajālāti vadāmī”ti.
sn35.64:3.7Atha kho āyasmā migajālo bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
sn35.64:4.1Atha kho āyasmā migajālo eko vūpakaṭṭho appamatto ātāpī pahitatto viharato nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
sn35.64:4.2“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
sn35.64:4.3Aññataro ca panāyasmā migajālo arahataṁ ahosīti.
sn35.64:4.4Dutiyaṁ.
sn35.64:4.5