完整巴利原文 · 稳定分页 当前仅加载第 72 阅读页；保留 Bilara 原生段落标识，每页最多 120 段。
Saṁyutta Nikāya 35.89
sn35.89:0.19. Channavagga
sn35.89:0.2Bāhiyasutta
sn35.89:0.3Atha kho āyasmā bāhiyo yena bhagavā tenupasaṅkami …pe… ekamantaṁ nisinno kho āyasmā bāhiyo bhagavantaṁ etadavoca:
sn35.89:1.1“sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
sn35.89:1.2“Taṁ kiṁ maññasi, bāhiya,
sn35.89:2.1cakkhu niccaṁ vā aniccaṁ vā”ti?
sn35.89:2.2“Aniccaṁ, bhante”.
sn35.89:3.1“Yaṁ panāniccaṁ dukkhaṁ vā taṁ sukhaṁ vā”ti?
sn35.89:4.1“Dukkhaṁ, bhante”.
sn35.89:5.1“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn35.89:6.1‘etaṁ mama, esohamasmi, eso me attā’”ti?
sn35.89:6.2“No hetaṁ, bhante”.
sn35.89:7.1“Rūpā niccā vā aniccā vā”ti?
sn35.89:8.1“Aniccā, bhante” …pe…
sn35.89:9.1cakkhuviññāṇaṁ …pe…
sn35.89:9.2cakkhusamphasso …pe…
sn35.89:9.3yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi niccaṁ vā aniccaṁ vā”ti?
sn35.89:9.4“Aniccaṁ, bhante”.
sn35.89:10.1“Yaṁ panāniccaṁ dukkhaṁ vā taṁ sukhaṁ vā”ti?
sn35.89:11.1“Dukkhaṁ, bhante”.
sn35.89:12.1“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn35.89:13.1‘etaṁ mama, esohamasmi, eso me attā’”ti?
sn35.89:13.2“No hetaṁ, bhante”.
sn35.89:14.1“Evaṁ passaṁ, bāhiya, sutavā ariyasāvako cakkhusmimpi nibbindati, rūpesupi nibbindati, cakkhuviññāṇepi nibbindati, cakkhusamphassepi nibbindati …pe…
sn35.89:15.1yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tasmimpi nibbindati.
sn35.89:15.2Nibbindaṁ virajjati; virāgā vimuccati; vimuttasmiṁ vimuttamiti ñāṇaṁ hoti.
sn35.89:15.3‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānātī”ti.
sn35.89:15.4Atha kho āyasmā bāhiyo bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
sn35.89:16.1Atha kho āyasmā bāhiyo eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
sn35.89:16.2“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
sn35.89:16.3Aññataro ca panāyasmā bāhiyo arahataṁ ahosīti.
sn35.89:16.4Chaṭṭhaṁ.
sn35.89:16.5