完整巴利原文 · 稳定分页 当前仅加载第 78 阅读页；保留 Bilara 原生段落标识，每页最多 120 段。
Saṁyutta Nikāya 35.95
sn35.95:0.110. Saḷavagga
sn35.95:0.2Mālukyaputtasutta
sn35.95:0.3Atha kho āyasmā mālukyaputto yena bhagavā tenupasaṅkami …pe… ekamantaṁ nisinno kho āyasmā mālukyaputto bhagavantaṁ etadavoca:
sn35.95:1.1“sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
sn35.95:1.2“Ettha dāni, mālukyaputta, kiṁ dahare bhikkhū vakkhāma.
sn35.95:2.1Yatra hi nāma tvaṁ, bhikkhu, jiṇṇo vuddho mahallako addhagato vayoanuppatto saṅkhittena ovādaṁ yācasī”ti.
sn35.95:2.2“Kiñcāpāhaṁ, bhante, jiṇṇo vuddho mahallako addhagato vayoanuppatto.
sn35.95:3.1Desetu me, bhante, bhagavā saṅkhittena dhammaṁ, desetu sugato saṅkhittena dhammaṁ, appeva nāmāhaṁ bhagavato bhāsitassa atthaṁ ājāneyyaṁ. Appeva nāmāhaṁ bhagavato bhāsitassa dāyādo assan”ti.
sn35.95:3.2“Taṁ kiṁ maññasi, mālukyaputta,
sn35.95:4.1ye te cakkhuviññeyyā rūpā adiṭṭhā adiṭṭhapubbā, na ca passasi, na ca te hoti passeyyanti? Atthi te tattha chando vā rāgo vā pemaṁ vā”ti?
sn35.95:4.2“No hetaṁ, bhante”.
sn35.95:4.3“Ye te sotaviññeyyā saddā assutā assutapubbā, na ca suṇāsi, na ca te hoti suṇeyyanti? Atthi te tattha chando vā rāgo vā pemaṁ vā”ti?
sn35.95:5.1“No hetaṁ, bhante”.
sn35.95:5.2“Ye te ghānaviññeyyā gandhā aghāyitā aghāyitapubbā, na ca ghāyasi, na ca te hoti ghāyeyyanti? Atthi te tattha chando vā rāgo vā pemaṁ vā”ti?
sn35.95:6.1“No hetaṁ, bhante”.
sn35.95:6.2“Ye te jivhāviññeyyā rasā asāyitā asāyitapubbā, na ca sāyasi, na ca te hoti sāyeyyanti? Atthi te tattha chando vā rāgo vā pemaṁ vā”ti?
sn35.95:7.1“No hetaṁ, bhante”.
sn35.95:7.2“Ye te kāyaviññeyyā phoṭṭhabbā asamphuṭṭhā asamphuṭṭhapubbā, na ca phusasi, na ca te hoti phuseyyanti? Atthi te tattha chando vā rāgo vā pemaṁ vā”ti?
sn35.95:8.1“No hetaṁ, bhante”.
sn35.95:8.2“Ye te manoviññeyyā dhammā aviññātā aviññātapubbā, na ca vijānāsi, na ca te hoti vijāneyyanti? Atthi te tattha chando vā rāgo vā pemaṁ vā”ti?
sn35.95:9.1“No hetaṁ, bhante”.
sn35.95:9.2“Ettha ca te, mālukyaputta, diṭṭhasutamutaviññātabbesu dhammesu diṭṭhe diṭṭhamattaṁ bhavissati, sute sutamattaṁ bhavissati, mute mutamattaṁ bhavissati, viññāte viññātamattaṁ bhavissati.
sn35.95:10.1Yato kho te, mālukyaputta, diṭṭhasutamutaviññātabbesu dhammesu diṭṭhe diṭṭhamattaṁ bhavissati, sute sutamattaṁ bhavissati, mute mutamattaṁ bhavissati, viññāte viññātamattaṁ bhavissati;
sn35.95:10.2tato tvaṁ, mālukyaputta, na tena.
sn35.95:10.3Yato tvaṁ, mālukyaputta, na tena;
sn35.95:10.4tato tvaṁ, mālukyaputta, na tattha.
sn35.95:10.5Yato tvaṁ, mālukyaputta, na tattha;
sn35.95:10.6tato tvaṁ, mālukyaputta, nevidha, na huraṁ, na ubhayamantarena.
sn35.95:10.7Esevanto dukkhassā”ti.
sn35.95:10.8“Imassa khvāhaṁ, bhante, bhagavatā saṅkhittena bhāsitassa vitthārena atthaṁ ājānāmi:
sn35.95:11.1‘Rūpaṁ disvā sati muṭṭhā,
sn35.95:12.1Piyaṁ nimittaṁ manasi karoto;
sn35.95:12.2Sārattacitto vedeti,
sn35.95:12.3Tañca ajjhosa tiṭṭhati.
sn35.95:12.4Tassa vaḍḍhanti vedanā,
sn35.95:13.1anekā rūpasambhavā;
sn35.95:13.2Abhijjhā ca vihesā ca,
sn35.95:13.3cittamassūpahaññati;
sn35.95:13.4Evaṁ ācinato dukkhaṁ,
sn35.95:13.5ārā nibbāna vuccati.
sn35.95:13.6Saddaṁ sutvā sati muṭṭhā,
sn35.95:14.1Piyaṁ nimittaṁ manasi karoto;
sn35.95:14.2Sārattacitto vedeti,
sn35.95:14.3Tañca ajjhosa tiṭṭhati.
sn35.95:14.4Tassa vaḍḍhanti vedanā,
sn35.95:15.1anekā saddasambhavā;
sn35.95:15.2Abhijjhā ca vihesā ca,
sn35.95:15.3cittamassūpahaññati;
sn35.95:15.4Evaṁ ācinato dukkhaṁ,
sn35.95:15.5ārā nibbāna vuccati.
sn35.95:15.6Gandhaṁ ghatvā sati muṭṭhā,
sn35.95:16.1Piyaṁ nimittaṁ manasi karoto;
sn35.95:16.2Sārattacitto vedeti,
sn35.95:16.3Tañca ajjhosa tiṭṭhati.
sn35.95:16.4Tassa vaḍḍhanti vedanā,
sn35.95:17.1anekā gandhasambhavā;
sn35.95:17.2Abhijjhā ca vihesā ca,
sn35.95:17.3cittamassūpahaññati;
sn35.95:17.4Evaṁ ācinato dukkhaṁ,
sn35.95:17.5ārā nibbāna vuccati.
sn35.95:17.6Rasaṁ bhotvā sati muṭṭhā,
sn35.95:18.1Piyaṁ nimittaṁ manasi karoto;
sn35.95:18.2Sārattacitto vedeti,
sn35.95:18.3Tañca ajjhosa tiṭṭhati.
sn35.95:18.4Tassa vaḍḍhanti vedanā,
sn35.95:19.1anekā rasasambhavā;
sn35.95:19.2Abhijjhā ca vihesā ca,
sn35.95:19.3cittamassūpahaññati;
sn35.95:19.4Evaṁ ācinato dukkhaṁ,
sn35.95:19.5ārā nibbāna vuccati.
sn35.95:19.6Phassaṁ phussa sati muṭṭhā,
sn35.95:20.1Piyaṁ nimittaṁ manasi karoto;
sn35.95:20.2Sārattacitto vedeti,
sn35.95:20.3Tañca ajjhosa tiṭṭhati.
sn35.95:20.4Tassa vaḍḍhanti vedanā,
sn35.95:21.1anekā phassasambhavā;
sn35.95:21.2Abhijjhā ca vihesā ca,
sn35.95:21.3cittamassūpahaññati;
sn35.95:21.4Evaṁ ācinato dukkhaṁ,
sn35.95:21.5ārā nibbāna vuccati.
sn35.95:21.6Dhammaṁ ñatvā sati muṭṭhā,
sn35.95:22.1Piyaṁ nimittaṁ manasi karoto;
sn35.95:22.2Sārattacitto vedeti,
sn35.95:22.3Tañca ajjhosa tiṭṭhati.
sn35.95:22.4Tassa vaḍḍhanti vedanā,
sn35.95:23.1anekā dhammasambhavā;
sn35.95:23.2Abhijjhā ca vihesā ca,
sn35.95:23.3cittamassūpahaññati;
sn35.95:23.4Evaṁ ācinato dukkhaṁ,
sn35.95:23.5ārā nibbāna vuccati.
sn35.95:23.6Na so rajjati rūpesu,
sn35.95:24.1rūpaṁ disvā paṭissato;
sn35.95:24.2Virattacitto vedeti,
sn35.95:24.3tañca nājjhosa tiṭṭhati.
sn35.95:24.4Yathāssa passato rūpaṁ,
sn35.95:25.1sevato cāpi vedanaṁ;
sn35.95:25.2Khīyati nopacīyati,
sn35.95:25.3evaṁ so caratī sato;
sn35.95:25.4Evaṁ apacinato dukkhaṁ,
sn35.95:25.5santike nibbāna vuccati.
sn35.95:25.6Na so rajjati saddesu,
sn35.95:26.1saddaṁ sutvā paṭissato;
sn35.95:26.2Virattacitto vedeti,
sn35.95:26.3tañca nājjhosa tiṭṭhati.
sn35.95:26.4Yathāssa suṇato saddaṁ,
sn35.95:27.1sevato cāpi vedanaṁ;
sn35.95:27.2Khīyati nopacīyati,
sn35.95:27.3evaṁ so caratī sato;
sn35.95:27.4Evaṁ apacinato dukkhaṁ,
sn35.95:27.5santike nibbāna vuccati.
sn35.95:27.6Na so rajjati gandhesu,
sn35.95:28.1gandhaṁ ghatvā paṭissato;
sn35.95:28.2Virattacitto vedeti,
sn35.95:28.3tañca nājjhosa tiṭṭhati.
sn35.95:28.4Yathāssa ghāyato gandhaṁ,
sn35.95:29.1sevato cāpi vedanaṁ;
sn35.95:29.2Khīyati nopacīyati,
sn35.95:29.3evaṁ so caratī sato;
sn35.95:29.4Evaṁ apacinato dukkhaṁ,
sn35.95:29.5