完整巴利原文 · 稳定分页 当前仅加载第 105 阅读页；保留 Bilara 原生段落标识，每页最多 120 段。
Saṁyutta Nikāya 35.121
sn35.121:0.112. Lokakāmaguṇavagga
sn35.121:0.2Rāhulovādasutta
sn35.121:0.3Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
sn35.121:1.1Atha kho bhagavato rahogatassa paṭisallīnassa evaṁ cetaso parivitakko udapādi:
sn35.121:1.2“paripakkā kho rāhulassa vimuttiparipācaniyā dhammā;
sn35.121:1.3yannūnāhaṁ rāhulaṁ uttariṁ āsavānaṁ khaye vineyyan”ti.
sn35.121:1.4Atha kho bhagavā pubbaṇhasamayaṁ nivāsetvā pattacīvaramādāya sāvatthiyaṁ piṇḍāya caritvā
sn35.121:1.5pacchābhattaṁ piṇḍapātapaṭikkanto āyasmantaṁ rāhulaṁ āmantesi:
sn35.121:1.6“gaṇhāhi, rāhula, nisīdanaṁ.
sn35.121:1.7Yena andhavanaṁ tenupasaṅkamissāma divāvihārāyā”ti.
sn35.121:1.8“Evaṁ, bhante”ti kho āyasmā rāhulo bhagavato paṭissutvā nisīdanaṁ ādāya bhagavantaṁ piṭṭhito piṭṭhito anubandhi.
sn35.121:1.9Tena kho pana samayena anekāni devatāsahassāni bhagavantaṁ anubandhāni honti:
sn35.121:2.1“ajja bhagavā āyasmantaṁ rāhulaṁ uttariṁ āsavānaṁ khaye vinessatī”ti.
sn35.121:2.2Atha kho bhagavā andhavanaṁ ajjhogāhetvā aññatarasmiṁ rukkhamūle paññatte āsane nisīdi.
sn35.121:2.3Āyasmāpi kho rāhulo bhagavantaṁ abhivādetvā ekamantaṁ nisīdi.
sn35.121:2.4Ekamantaṁ nisinnaṁ kho āyasmantaṁ rāhulaṁ bhagavā etadavoca:
sn35.121:2.5“Taṁ kiṁ maññasi, rāhula,
sn35.121:3.1cakkhu niccaṁ vā aniccaṁ vā”ti?
sn35.121:3.2“Aniccaṁ, bhante”.
sn35.121:4.1“Yaṁ panāniccaṁ dukkhaṁ vā taṁ sukhaṁ vā”ti?
sn35.121:5.1“Dukkhaṁ, bhante”.
sn35.121:6.1“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn35.121:7.1‘etaṁ mama, esohamasmi, eso me attā’”ti?
sn35.121:7.2“No hetaṁ, bhante”. (…)
sn35.121:8.1“Rūpā niccā vā aniccā vā”ti?
sn35.121:9.1“Aniccā, bhante” …pe….
sn35.121:10.1“Cakkhuviññāṇaṁ niccaṁ vā aniccaṁ vā”ti?
sn35.121:11.1“Aniccaṁ, bhante” …pe….
sn35.121:12.1“Cakkhusamphasso nicco vā anicco vā”ti?
sn35.121:13.1“Anicco, bhante” …pe….
sn35.121:14.1“Yampidaṁ cakkhusamphassapaccayā uppajjati vedanāgataṁ, saññāgataṁ, saṅkhāragataṁ, viññāṇagataṁ, tampi niccaṁ vā aniccaṁ vā”ti?
sn35.121:15.1“Aniccaṁ, bhante”.
sn35.121:16.1“Yaṁ panāniccaṁ dukkhaṁ vā taṁ sukhaṁ vā”ti?
sn35.121:17.1“Dukkhaṁ, bhante”.
sn35.121:18.1“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn35.121:19.1‘etaṁ mama, esohamasmi, eso me attā’”ti?
sn35.121:19.2“No hetaṁ, bhante” …pe….
sn35.121:20.1“Jivhā niccā vā aniccā vā”ti?
sn35.121:21.1“Aniccā, bhante” …pe….
sn35.121:22.1“Jivhāviññāṇaṁ niccaṁ vā aniccaṁ vā”ti?
sn35.121:23.1“Aniccaṁ, bhante” …pe….
sn35.121:24.1“Jivhāsamphasso nicco vā anicco vā”ti?
sn35.121:25.1“Anicco, bhante” …pe….
sn35.121:26.1“Yampidaṁ jivhāsamphassapaccayā uppajjati vedanāgataṁ, saññāgataṁ, saṅkhāragataṁ, viññāṇagataṁ, tampi niccaṁ vā aniccaṁ vā”ti?
sn35.121:27.1“Aniccaṁ, bhante”.
sn35.121:28.1“Yaṁ panāniccaṁ dukkhaṁ vā taṁ sukhaṁ vā”ti?
sn35.121:29.1“Dukkhaṁ, bhante”.
sn35.121:30.1“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn35.121:31.1‘etaṁ mama, esohamasmi, eso me attā’”ti?
sn35.121:31.2“No hetaṁ, bhante” …pe….
sn35.121:32.1“Mano nicco vā anicco vā”ti?
sn35.121:33.1“Anicco, bhante”.
sn35.121:34.1“Yaṁ panāniccaṁ dukkhaṁ vā taṁ sukhaṁ vā”ti?
sn35.121:35.1“Dukkhaṁ, bhante”.
sn35.121:36.1“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ
sn35.121:37.1‘etaṁ mama, esohamasmi, eso me attā’”ti?
sn35.121:37.2“No hetaṁ, bhante”.
sn35.121:38.1“Dhammā niccā vā aniccā vā”ti?
sn35.121:39.1“Aniccā, bhante” …pe….
sn35.121:40.1“Manoviññāṇaṁ niccaṁ vā aniccaṁ vā”ti?
sn35.121:41.1“Aniccaṁ, bhante” …pe….
sn35.121:42.1“Manosamphasso nicco vā anicco vā”ti?
sn35.121:43.1“Anicco, bhante” …pe….
sn35.121:44.1“Yampidaṁ manosamphassapaccayā uppajjati vedanāgataṁ, saññāgataṁ, saṅkhāragataṁ, viññāṇagataṁ, tampi niccaṁ vā aniccaṁ vā”ti?
sn35.121:45.1“Aniccaṁ, bhante”.
sn35.121:46.1“Yaṁ panāniccaṁ dukkhaṁ vā taṁ sukhaṁ vā”ti?
sn35.121:47.1“Dukkhaṁ, bhante”.
sn35.121:48.1“Yaṁ panāniccaṁ dukkhaṁ vipariṇāmadhammaṁ, kallaṁ nu taṁ samanupassituṁ:
sn35.121:49.1‘etaṁ mama, esohamasmi, eso me attā’”ti?
sn35.121:49.2“No hetaṁ, bhante”.
sn35.121:50.1“Evaṁ passaṁ, rāhula, sutavā ariyasāvako cakkhusmimpi nibbindati, rūpesupi nibbindati, cakkhuviññāṇepi nibbindati, cakkhusamphassepi nibbindati, yampidaṁ cakkhusamphassapaccayā uppajjati vedanāgataṁ saññāgataṁ saṅkhāragataṁ viññāṇagataṁ tasmimpi nibbindati …pe…
sn35.121:51.1jivhāyapi nibbindati, rasesupi nibbindati, jivhāviññāṇepi nibbindati, jivhāsamphassepi nibbindati, yampidaṁ jivhāsamphassapaccayā uppajjati vedanāgataṁ saññāgataṁ saṅkhāragataṁ viññāṇagataṁ tasmimpi nibbindati …pe….
sn35.121:51.2Manasmimpi nibbindati, dhammesupi nibbindati, manoviññāṇepi nibbindati, manosamphassepi nibbindati, yampidaṁ manosamphassapaccayā uppajjati vedanāgataṁ saññāgataṁ saṅkhāragataṁ viññāṇagataṁ tasmimpi nibbindati.
sn35.121:52.1Nibbindaṁ virajjati; virāgā vimuccati; vimuttasmiṁ vimuttamiti ñāṇaṁ hoti.
sn35.121:52.2‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānātī”ti.
sn35.121:52.3Idamavoca bhagavā.
sn35.121:53.1Attamano āyasmā rāhulo bhagavato bhāsitaṁ abhinandi.
sn35.121:53.2Imasmiñca pana veyyākaraṇasmiṁ bhaññamāne āyasmato rāhulassa anupādāya āsavehi cittaṁ vimucci.
sn35.121:53.3Anekānañca devatāsahassānaṁ virajaṁ vītamalaṁ dhammacakkhuṁ udapādi:
sn35.121:53.4“yaṁ kiñci samudayadhammaṁ sabbaṁ taṁ nirodhadhamman”ti.
sn35.121:53.5Aṭṭhamaṁ.
sn35.121:53.6