完整巴利原文 · 稳定分页 当前仅加载第 192 阅读页；保留 Bilara 原生段落标识，每页最多 120 段。
Saṁyutta Nikāya 35.238
sn35.238:0.119. Āsīvisavagga
sn35.238:0.2Āsīvisopamasutta
sn35.238:0.3“Seyyathāpi, bhikkhave, cattāro āsīvisā uggatejā ghoravisā.
sn35.238:1.1Atha puriso āgaccheyya jīvitukāmo amaritukāmo sukhakāmo dukkhappaṭikūlo.
sn35.238:1.2Tamenaṁ evaṁ vadeyyuṁ:
sn35.238:1.3‘ime te, ambho purisa, cattāro āsīvisā uggatejā ghoravisā kālena kālaṁ vuṭṭhāpetabbā, kālena kālaṁ nhāpetabbā, kālena kālaṁ bhojetabbā, kālena kālaṁ saṁvesetabbā.
sn35.238:1.4Yadā ca kho te, ambho purisa, imesaṁ catunnaṁ āsīvisānaṁ uggatejānaṁ ghoravisānaṁ aññataro vā aññataro vā kuppissati, tato tvaṁ, ambho purisa, maraṇaṁ vā nigacchasi, maraṇamattaṁ vā dukkhaṁ.
sn35.238:1.5Yaṁ te, ambho purisa, karaṇīyaṁ taṁ karohī’ti.
sn35.238:1.6Atha kho so, bhikkhave, puriso bhīto catunnaṁ āsīvisānaṁ uggatejānaṁ ghoravisānaṁ yena vā tena vā palāyetha.
sn35.238:2.1Tamenaṁ evaṁ vadeyyuṁ:
sn35.238:2.2‘ime kho, ambho purisa, pañca vadhakā paccatthikā piṭṭhito piṭṭhito anubandhā, yattheva naṁ passissāma tattheva jīvitā voropessāmāti.
sn35.238:2.3Yaṁ te, ambho purisa, karaṇīyaṁ taṁ karohī’ti.
sn35.238:2.4Atha kho so, bhikkhave, puriso bhīto catunnaṁ āsīvisānaṁ uggatejānaṁ ghoravisānaṁ, bhīto pañcannaṁ vadhakānaṁ paccatthikānaṁ yena vā tena vā palāyetha.
sn35.238:3.1Tamenaṁ evaṁ vadeyyuṁ:
sn35.238:3.2‘ayaṁ te, ambho purisa, chaṭṭho antaracaro vadhako ukkhittāsiko piṭṭhito piṭṭhito anubandho yattheva naṁ passissāmi tattheva siro pātessāmīti.
sn35.238:3.3Yaṁ te, ambho purisa, karaṇīyaṁ taṁ karohī’ti.
sn35.238:3.4Atha kho so, bhikkhave, puriso bhīto catunnaṁ āsīvisānaṁ uggatejānaṁ ghoravisānaṁ, bhīto pañcannaṁ vadhakānaṁ paccatthikānaṁ, bhīto chaṭṭhassa antaracarassa vadhakassa ukkhittāsikassa yena vā tena vā palāyetha.
sn35.238:4.1So passeyya suññaṁ gāmaṁ.
sn35.238:4.2Yaññadeva gharaṁ paviseyya rittakaññeva paviseyya tucchakaññeva paviseyya suññakaññeva paviseyya.
sn35.238:4.3Yaññadeva bhājanaṁ parimaseyya rittakaññeva parimaseyya tucchakaññeva parimaseyya suññakaññeva parimaseyya.
sn35.238:4.4Tamenaṁ evaṁ vadeyyuṁ:
sn35.238:4.5‘idāni, ambho purisa, imaṁ suññaṁ gāmaṁ corā gāmaghātakā pavisanti.
sn35.238:4.6Yaṁ te, ambho purisa, karaṇīyaṁ taṁ karohī’ti.
sn35.238:4.7Atha kho so, bhikkhave, puriso bhīto catunnaṁ āsīvisānaṁ uggatejānaṁ ghoravisānaṁ, bhīto pañcannaṁ vadhakānaṁ paccatthikānaṁ, bhīto chaṭṭhassa antaracarassa vadhakassa ukkhittāsikassa, bhīto corānaṁ gāmaghātakānaṁ yena vā tena vā palāyetha.
sn35.238:5.1So passeyya mahantaṁ udakaṇṇavaṁ orimaṁ tīraṁ sāsaṅkaṁ sappaṭibhayaṁ, pārimaṁ tīraṁ khemaṁ appaṭibhayaṁ.
sn35.238:5.2Na cassa nāvā santāraṇī uttarasetu vā apārā pāraṁ gamanāya.
sn35.238:5.3Atha kho, bhikkhave, tassa purisassa evamassa:
sn35.238:5.4‘ayaṁ kho mahāudakaṇṇavo orimaṁ tīraṁ sāsaṅkaṁ sappaṭibhayaṁ, pārimaṁ tīraṁ khemaṁ appaṭibhayaṁ, natthi ca nāvā santāraṇī uttarasetu vā apārā pāraṁ gamanāya.
sn35.238:5.5Yannūnāhaṁ tiṇakaṭṭhasākhāpalāsaṁ saṅkaḍḍhitvā kullaṁ bandhitvā taṁ kullaṁ nissāya hatthehi ca pādehi ca vāyamamāno sotthinā pāraṁ gaccheyyan’ti.
sn35.238:5.6Atha kho so, bhikkhave, puriso tiṇakaṭṭhasākhāpalāsaṁ saṅkaḍḍhitvā kullaṁ bandhitvā taṁ kullaṁ nissāya hatthehi ca pādehi ca vāyamamāno sotthinā pāraṁ gaccheyya, tiṇṇo pāraṅgato thale tiṭṭhati brāhmaṇo.
sn35.238:6.1Upamā kho myāyaṁ, bhikkhave, katā atthassa viññāpanāya.
sn35.238:7.1Ayañcettha attho—
sn35.238:7.2cattāro āsīvisā uggatejā ghoravisāti kho, bhikkhave, catunnetaṁ mahābhūtānaṁ adhivacanaṁ—
sn35.238:7.3pathavīdhātuyā, āpodhātuyā, tejodhātuyā, vāyodhātuyā.
sn35.238:7.4Pañca vadhakā paccatthikāti kho, bhikkhave, pañcannetaṁ upādānakkhandhānaṁ adhivacanaṁ, seyyathidaṁ—
sn35.238:8.1rūpupādānakkhandhassa, vedanupādānakkhandhassa, saññupādānakkhandhassa, saṅkhārupādānakkhandhassa, viññāṇupādānakkhandhassa.
sn35.238:8.2Chaṭṭho antaracaro vadhako ukkhittāsikoti kho, bhikkhave, nandīrāgassetaṁ adhivacanaṁ.
sn35.238:9.1Suñño gāmoti kho, bhikkhave, channetaṁ ajjhattikānaṁ āyatanānaṁ adhivacanaṁ.
sn35.238:10.1Cakkhuto cepi naṁ, bhikkhave, paṇḍito byatto medhāvī upaparikkhati rittakaññeva khāyati, tucchakaññeva khāyati, suññakaññeva khāyati …pe…
sn35.238:10.2jivhāto cepi naṁ, bhikkhave …pe…
sn35.238:10.3manato cepi naṁ, bhikkhave, paṇḍito byatto medhāvī upaparikkhati rittakaññeva khāyati, tucchakaññeva khāyati, suññakaññeva khāyati.
sn35.238:10.4Corā gāmaghātakāti kho, bhikkhave, channetaṁ bāhirānaṁ āyatanānaṁ adhivacanaṁ.
sn35.238:11.1Cakkhu, bhikkhave, haññati manāpāmanāpesu rūpesu;
sn35.238:11.2sotaṁ, bhikkhave …pe…
sn35.238:11.3ghānaṁ, bhikkhave …pe…
sn35.238:11.4jivhā, bhikkhave, haññati manāpāmanāpesu rasesu;
sn35.238:11.5kāyo, bhikkhave …pe…
sn35.238:11.6mano, bhikkhave, haññati manāpāmanāpesu dhammesu.
sn35.238:11.7Mahā udakaṇṇavoti kho, bhikkhave, catunnetaṁ oghānaṁ adhivacanaṁ—
sn35.238:12.1kāmoghassa, bhavoghassa, diṭṭhoghassa, avijjoghassa.
sn35.238:12.2Orimaṁ tīraṁ sāsaṅkaṁ sappaṭibhayanti kho, bhikkhave, sakkāyassetaṁ adhivacanaṁ.
sn35.238:13.1Pārimaṁ tīraṁ khemaṁ appaṭibhayanti kho, bhikkhave, nibbānassetaṁ adhivacanaṁ.
sn35.238:14.1Kullanti kho, bhikkhave, ariyassetaṁ aṭṭhaṅgikassa maggassa adhivacanaṁ, seyyathidaṁ—
sn35.238:15.1sammādiṭṭhi …pe… sammāsamādhi.
sn35.238:15.2Tassa hatthehi ca pādehi ca vāyāmoti kho, bhikkhave, vīriyārambhassetaṁ adhivacanaṁ.
sn35.238:16.1Tiṇṇo pāraṅgato thale tiṭṭhati brāhmaṇoti kho, bhikkhave, arahato etaṁ adhivacanan”ti.
sn35.238:17.1Paṭhamaṁ.
sn35.238:17.2