完整巴利原文 · 稳定分页 当前仅加载第 197 阅读页；保留 Bilara 原生段落标识，每页最多 120 段。
Saṁyutta Nikāya 35.243
sn35.243:0.119. Āsīvisavagga
sn35.243:0.2Avassutapariyāyasutta
sn35.243:0.3Ekaṁ samayaṁ bhagavā sakkesu viharati kapilavatthusmiṁ nigrodhārāme.
sn35.243:1.1Tena kho pana samayena kāpilavatthavānaṁ sakyānaṁ navaṁ santhāgāraṁ acirakāritaṁ hoti anajjhāvuṭṭhaṁ samaṇena vā brāhmaṇena vā kenaci vā manussabhūtena.
sn35.243:1.2Atha kho kāpilavatthavā sakyā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho kāpilavatthavā sakyā bhagavantaṁ etadavocuṁ:
sn35.243:1.3“idha, bhante, kāpilavatthavānaṁ sakyānaṁ navaṁ santhāgāraṁ acirakāritaṁ anajjhāvuṭṭhaṁ samaṇena vā brāhmaṇena vā kenaci vā manussabhūtena.
sn35.243:1.4Taṁ, bhante, bhagavā paṭhamaṁ paribhuñjatu.
sn35.243:1.5Bhagavatā paṭhamaṁ paribhuttaṁ pacchā kāpilavatthavā sakyā paribhuñjissanti.
sn35.243:1.6Tadassa kāpilavatthavānaṁ sakyānaṁ dīgharattaṁ hitāya sukhāyā”ti.
sn35.243:1.7Adhivāsesi bhagavā tuṇhībhāvena.
sn35.243:1.8Atha kho kāpilavatthavā sakyā bhagavato adhivāsanaṁ viditvā uṭṭhāyāsanā bhagavantaṁ abhivādetvā padakkhiṇaṁ katvā yena navaṁ santhāgāraṁ tenupasaṅkamiṁsu; upasaṅkamitvā sabbasanthariṁ santhāgāraṁ santharitvā āsanāni paññāpetvā udakamaṇikaṁ patiṭṭhāpetvā telappadīpaṁ āropetvā yena bhagavā tenupasaṅkamiṁsu; upasaṅkamitvā bhagavantaṁ etadavocuṁ:
sn35.243:2.1“sabbasantharisanthataṁ, bhante, santhāgāraṁ, āsanāni paññattāni, udakamaṇiko patiṭṭhāpito, telappadīpo āropito.
sn35.243:2.2Yassadāni, bhante, bhagavā kālaṁ maññatī”ti.
sn35.243:2.3Atha kho bhagavā nivāsetvā pattacīvaramādāya saddhiṁ bhikkhusaṅghena yena navaṁ santhāgāraṁ tenupasaṅkami; upasaṅkamitvā pāde pakkhāletvā santhāgāraṁ pavisitvā majjhimaṁ thambhaṁ nissāya puratthābhimukho nisīdi.
sn35.243:2.4Bhikkhusaṅghopi kho pāde pakkhāletvā santhāgāraṁ pavisitvā pacchimaṁ bhittiṁ nissāya puratthābhimukho nisīdi bhagavantaṁyeva purakkhatvā.
sn35.243:2.5Kāpilavatthavā sakyā pāde pakkhāletvā santhāgāraṁ pavisitvā puratthimaṁ bhittiṁ nissāya pacchimābhimukhā nisīdiṁsu bhagavantaṁyeva purakkhatvā.
sn35.243:2.6Atha kho bhagavā kāpilavatthave sakye bahudeva rattiṁ dhammiyā kathāya sandassetvā samādapetvā samuttejetvā sampahaṁsetvā uyyojesi:
sn35.243:2.7“abhikkantā kho, gotamā, ratti.
sn35.243:2.8Yassadāni kālaṁ maññathā”ti.
sn35.243:2.9“Evaṁ, bhante”ti kho kāpilavatthavā sakyā bhagavato paṭissutvā uṭṭhāyāsanā bhagavantaṁ abhivādetvā padakkhiṇaṁ katvā pakkamiṁsu.
sn35.243:2.10Atha kho bhagavā acirapakkantesu kāpilavatthavesu sakyesu āyasmantaṁ mahāmoggallānaṁ āmantesi:
sn35.243:3.1“vigatathinamiddho kho, moggallāna, bhikkhusaṅgho.
sn35.243:3.2Paṭibhātu taṁ, moggallāna, bhikkhūnaṁ dhammī kathā.
sn35.243:3.3Piṭṭhi me āgilāyati;
sn35.243:3.4tamahaṁ āyamissāmī”ti.
sn35.243:3.5“Evaṁ, bhante”ti kho āyasmā mahāmoggallāno bhagavato paccassosi.
sn35.243:3.6Atha kho bhagavā catugguṇaṁ saṅghāṭiṁ paññapetvā dakkhiṇena passena sīhaseyyaṁ kappesi, pāde pādaṁ accādhāya, sato sampajāno uṭṭhānasaññaṁ manasi karitvā.
sn35.243:3.7Tatra kho āyasmā mahāmoggallāno bhikkhū āmantesi:
sn35.243:3.8“āvuso bhikkhave”ti.
sn35.243:3.9“Āvuso”ti kho te bhikkhū āyasmato mahāmoggallānassa paccassosuṁ.
sn35.243:3.10Āyasmā mahāmoggallāno etadavoca:
sn35.243:3.11“avassutapariyāyañca vo, āvuso, desessāmi, anavassutapariyāyañca.
sn35.243:3.12Taṁ suṇātha, sādhukaṁ manasi karotha, bhāsissāmī”ti.
sn35.243:3.13“Evamāvuso”ti kho te bhikkhū āyasmato mahāmoggallānassa paccassosuṁ.
sn35.243:3.14Āyasmā mahāmoggallāno etadavoca:
sn35.243:3.15“Kathaṁ, āvuso, avassuto hoti?
sn35.243:4.1Idhāvuso, bhikkhu cakkhunā rūpaṁ disvā piyarūpe rūpe adhimuccati, appiyarūpe rūpe byāpajjati, anupaṭṭhitakāyassatī viharati parittacetaso,
sn35.243:4.2tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti …pe…
sn35.243:4.3jivhāya rasaṁ sāyitvā …pe…
sn35.243:4.4manasā dhammaṁ viññāya piyarūpe dhamme adhimuccati, appiyarūpe dhamme byāpajjati, anupaṭṭhitakāyassatī ca viharati parittacetaso,
sn35.243:4.5tañca cetovimuttiṁ paññāvimuttiṁ yathābhūtaṁ nappajānāti yatthassa te uppannā pāpakā akusalā dhammā aparisesā nirujjhanti.
sn35.243:4.6Ayaṁ vuccati, āvuso, bhikkhu avassuto cakkhuviññeyyesu rūpesu …pe…
sn35.243:4.7avassuto jivhāviññeyyesu rasesu …pe…
sn35.243:4.8avassuto manoviññeyyesu dhammesu.
sn35.243:4.9Evaṁvihāriñcāvuso, bhikkhuṁ cakkhuto cepi naṁ māro upasaṅkamati labhateva māro otāraṁ, labhati māro ārammaṇaṁ …pe…
sn35.243:4.10jivhāto cepi naṁ māro upasaṅkamati, labhateva māro otāraṁ, labhati māro ārammaṇaṁ …pe…
sn35.243:4.11manato cepi naṁ māro upasaṅkamati, labhateva māro otāraṁ, labhati māro ārammaṇaṁ.
sn35.243:4.12Seyyathāpi, āvuso, naḷāgāraṁ vā tiṇāgāraṁ vā sukkhaṁ kolāpaṁ terovassikaṁ.
sn35.243:5.1Puratthimāya cepi naṁ disāya puriso ādittāya tiṇukkāya upasaṅkameyya, labhetheva aggi otāraṁ, labhetha aggi ārammaṇaṁ;
sn35.243:5.2pacchimāya cepi naṁ disāya puriso ādittāya tiṇukkāya upasaṅkameyya …pe…
sn35.243:5.3uttarāya cepi naṁ disāya …pe…
sn35.243:5.4dakkhiṇāya cepi naṁ disāya …pe…
sn35.243:5.5heṭṭhimato cepi naṁ …pe…
sn35.243:5.6uparimato cepi naṁ …
sn35.243:5.7yato kutoci cepi naṁ puriso ādittāya tiṇukkāya upasaṅkameyya, labhetheva aggi otāraṁ labhetha aggi ārammaṇaṁ.
sn35.243:5.8Evameva kho, āvuso, evaṁvihāriṁ bhikkhuṁ cakkhuto cepi naṁ māro upasaṅkamati, labhateva māro otāraṁ, labhati māro ārammaṇaṁ …pe…
sn35.243:5.9jivhāto cepi naṁ māro upasaṅkamati …pe…
sn35.243:5.10manato cepi naṁ māro upasaṅkamati, labhateva māro otāraṁ, labhati māro ārammaṇaṁ.
sn35.243:5.11Evaṁvihāriñcāvuso, bhikkhuṁ rūpā adhibhaṁsu, na bhikkhu rūpe adhibhosi;
sn35.243:5.12saddā bhikkhuṁ adhibhaṁsu, na bhikkhu sadde adhibhosi;
sn35.243:5.13gandhā bhikkhuṁ adhibhaṁsu, na bhikkhu gandhe adhibhosi;
sn35.243:5.14rasā bhikkhuṁ adhibhaṁsu, na bhikkhu rase adhibhosi;
sn35.243:5.15phoṭṭhabbā bhikkhuṁ adhibhaṁsu, na bhikkhu phoṭṭhabbe adhibhosi;
sn35.243:5.16dhammā bhikkhuṁ adhibhaṁsu, na bhikkhu dhamme adhibhosi.
sn35.243:5.17Ayaṁ vuccatāvuso, bhikkhu rūpādhibhūto, saddādhibhūto, gandhādhibhūto, rasādhibhūto, phoṭṭhabbādhibhūto, dhammādhibhūto, adhibhūto, anadhibhū, adhibhaṁsu naṁ pāpakā akusalā dhammā saṅkilesikā ponobhavikā sadarā dukkhavipākā āyatiṁ jātijarāmaraṇiyā.
sn35.243:5.18Evaṁ kho, āvuso, avassuto hoti.
sn35.243:5.19Kathañcāvuso, anavassuto hoti?
sn35.243:6.1Idhāvuso, bhikkhu cakkhunā rūpaṁ disvā piyarūpe rūpe nādhimuccati, appiyarūpe rūpe na byāpajjati, upaṭṭhitakāyassati ca viharati appamāṇacetaso,
sn35.243:6.2tañca cetovimuttiṁ paññāvimuttiṁ yathābhūtaṁ pajānāti yatthassa te uppannā pāpakā akusalā dhammā aparisesā nirujjhanti …pe…
sn35.243:6.3jivhāya rasaṁ sāyitvā …pe…
sn35.243:6.4manasā dhammaṁ viññāya piyarūpe dhamme nādhimuccati, appiyarūpe dhamme na byāpajjati, upaṭṭhitakāyassati ca viharati appamāṇacetaso,
sn35.243:6.5tañca cetovimuttiṁ paññāvimuttiṁ yathābhūtaṁ pajānāti yatthassa te uppannā pāpakā akusalā dhammā aparisesā nirujjhanti.
sn35.243:6.6Ayaṁ vuccatāvuso, bhikkhu anavassuto cakkhuviññeyyesu rūpesu …pe…
sn35.243:6.7anavassuto manoviññeyyesu dhammesu.
sn35.243:6.8Evaṁvihāriñcāvuso, bhikkhuṁ cakkhuto cepi naṁ māro upasaṅkamati, neva labhati māro otāraṁ, na labhati māro ārammaṇaṁ …pe…
sn35.243:6.9jivhāto cepi naṁ māro upasaṅkamati …pe…
sn35.243:6.10manato cepi naṁ māro upasaṅkamati, neva labhati māro otāraṁ, na labhati māro ārammaṇaṁ.
sn35.243:6.11Seyyathāpi, āvuso, kūṭāgāraṁ vā sālā vā bahalamattikā addāvalepanā.
sn35.243:7.1Puratthimāya cepi naṁ disāya puriso ādittāya tiṇukkāya upasaṅkameyya, neva labhetha aggi otāraṁ, na labhetha aggi ārammaṇaṁ …pe…
sn35.243:7.2pacchimāya cepi naṁ …
sn35.243:7.3uttarāya cepi naṁ …
sn35.243:7.4dakkhiṇāya cepi naṁ …
sn35.243:7.5heṭṭhimato cepi naṁ …
sn35.243:7.6uparimato cepi naṁ …
sn35.243:7.7yato kutoci cepi naṁ puriso ādittāya tiṇukkāya upasaṅkameyya, neva labhetha aggi otāraṁ, na labhetha aggi ārammaṇaṁ.
sn35.243:7.8Evameva kho, āvuso, evaṁvihāriṁ bhikkhuṁ cakkhuto cepi naṁ māro upasaṅkamati, neva labhati māro otāraṁ, na labhati māro ārammaṇaṁ …pe…
sn35.243:7.9manato cepi naṁ māro upasaṅkamati, neva labhati māro otāraṁ, na labhati māro ārammaṇaṁ.
sn35.243:7.10Evaṁvihārī cāvuso, bhikkhu rūpe adhibhosi, na rūpā bhikkhuṁ adhibhaṁsu;
sn35.243:7.11sadde bhikkhu adhibhosi, na saddā bhikkhuṁ adhibhaṁsu;
sn35.243:7.12gandhe bhikkhu adhibhosi, na gandhā bhikkhuṁ adhibhaṁsu;
sn35.243:7.13rase bhikkhu adhibhosi, na rasā bhikkhuṁ adhibhaṁsu;
sn35.243:7.14phoṭṭhabbe bhikkhu adhibhosi, na phoṭṭhabbā bhikkhuṁ adhibhaṁsu;
sn35.243:7.15dhamme bhikkhu adhibhosi, na dhammā bhikkhuṁ adhibhaṁsu.
sn35.243:7.16Ayaṁ vuccatāvuso, bhikkhu rūpādhibhū, saddādhibhū, gandhādhibhū, rasādhibhū, phoṭṭhabbādhibhū, dhammādhibhū, adhibhū, anadhibhūto, adhibhosi te pāpake akusale dhamme saṅkilesike ponobhavike sadare dukkhavipāke āyatiṁ jātijarāmaraṇiye.
sn35.243:7.17Evaṁ kho, āvuso, anavassuto hotī”ti.
sn35.243:7.18Atha kho bhagavā uṭṭhahitvā āyasmantaṁ mahāmoggallānaṁ āmantesi:
sn35.243:8.1“sādhu sādhu, moggallāna.
sn35.243:8.2Sādhu kho tvaṁ, moggallāna, bhikkhūnaṁ avassutapariyāyañca anavassutapariyāyañca abhāsī”ti.
sn35.243:8.3Idamavoca āyasmā mahāmoggallāno.
sn35.243:9.1Samanuñño satthā ahosi.
sn35.243:9.2Attamanā te bhikkhū āyasmato mahāmoggallānassa bhāsitaṁ abhinandunti.
sn35.243:9.3Chaṭṭhaṁ.
sn35.243:9.4