上座部佛教

相应部第 4 相应

Saṁyutta Nikāya 4 · Mahāsaṅgīti Tipiṭaka Buddhavasse 2500

完整原文 · 原生段落SuttaCentral SN4

完整巴利原文 · 稳定分页　当前仅加载第 20 阅读页；保留 Bilara 原生段落标识，每页最多 120 段。

0.1

Saṁyutta Nikāya 4.20

0.2

2. Dutiyavagga

0.3

Rajjasutta

1.1

Ekaṁ samayaṁ bhagavā kosalesu viharati himavantapadese araññakuṭikāyaṁ.

1.2

Atha kho bhagavato rahogatassa paṭisallīnassa evaṁ cetaso parivitakko udapādi:

1.3

“sakkā nu kho rajjaṁ kāretuṁ ahanaṁ aghātayaṁ ajinaṁ ajāpayaṁ asocaṁ asocāpayaṁ dhammenā”ti?

2.1

Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami; upasaṅkamitvā bhagavantaṁ etadavoca:

2.2

“kāretu, bhante, bhagavā rajjaṁ, kāretu, sugato, rajjaṁ ahanaṁ aghātayaṁ ajinaṁ ajāpayaṁ asocaṁ asocāpayaṁ dhammenā”ti.

2.3

“Kiṁ pana me tvaṁ, pāpima, passasi yaṁ maṁ tvaṁ evaṁ vadesi:

2.4

‘kāretu, bhante, bhagavā rajjaṁ, kāretu sugato, rajjaṁ ahanaṁ aghātayaṁ ajinaṁ ajāpayaṁ asocaṁ asocāpayaṁ dhammenā’”ti?

2.5

“Bhagavatā kho, bhante, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā.

2.6

Ākaṅkhamāno ca, bhante, bhagavā himavantaṁ pabbatarājaṁ suvaṇṇaṁ tveva adhimucceyya suvaṇṇañca panassā”ti.

3.1

“Pabbatassa suvaṇṇassa,

3.2

jātarūpassa kevalo;

3.3

Dvittāva nālamekassa,

3.4

iti vidvā samañcare.

4.1

Yo dukkhamaddakkhi yatonidānaṁ,

4.2

Kāmesu so jantu kathaṁ nameyya;

4.3

Upadhiṁ viditvā saṅgoti loke,

4.4

Tasseva jantu vinayāya sikkhe”ti.

5.1

Atha kho māro pāpimā “jānāti maṁ bhagavā, jānāti maṁ sugato”ti dukkhī dummano tatthevantaradhāyīti.

5.2

Dutiyo vaggo.

6.0

Tassuddānaṁ

6.1

Pāsāṇo sīho sakalikaṁ,

6.2

Patirūpañca mānasaṁ;

6.3

Pattaṁ āyatanaṁ piṇḍaṁ,

6.4

Kassakaṁ rajjena te dasāti.