Saṁyutta Nikāya 46 · SN46.2

完整巴利原文 · 稳定分页　当前仅加载第 2 阅读页；保留 Bilara 原生段落标识，每页最多 120 段。

0.1

Saṁyutta Nikāya 46.2

sn46.2:0.1

0.2

1. Pabbatavagga

sn46.2:0.2

0.3

Kāyasutta

sn46.2:0.3

1.1

Sāvatthinidānaṁ.

sn46.2:1.1

1.2

“Seyyathāpi, bhikkhave, ayaṁ kāyo āhāraṭṭhitiko, āhāraṁ paṭicca tiṭṭhati, anāhāro no tiṭṭhati;

sn46.2:1.2

1.3

evameva kho, bhikkhave, pañca nīvaraṇā āhāraṭṭhitikā, āhāraṁ paṭicca tiṭṭhanti, anāhārā no tiṭṭhanti.

sn46.2:1.3

2.1

Ko ca, bhikkhave, āhāro anuppannassa vā kāmacchandassa uppādāya, uppannassa vā kāmacchandassa bhiyyobhāvāya vepullāya?

sn46.2:2.1

2.2

Atthi, bhikkhave, subhanimittaṁ.

sn46.2:2.2

2.3

Tattha ayonisomanasikārabahulīkāro—

sn46.2:2.3

2.4

ayamāhāro anuppannassa vā kāmacchandassa uppādāya, uppannassa vā kāmacchandassa bhiyyobhāvāya vepullāya.

sn46.2:2.4

3.1

Ko ca, bhikkhave, āhāro anuppannassa vā byāpādassa uppādāya, uppannassa vā byāpādassa bhiyyobhāvāya vepullāya?

sn46.2:3.1

3.2

Atthi, bhikkhave, paṭighanimittaṁ.

sn46.2:3.2

3.3

Tattha ayonisomanasikārabahulīkāro—

sn46.2:3.3

3.4

ayamāhāro anuppannassa vā byāpādassa uppādāya, uppannassa vā byāpādassa bhiyyobhāvāya vepullāya.

sn46.2:3.4

4.1

Ko ca, bhikkhave, āhāro anuppannassa vā thinamiddhassa uppādāya, uppannassa vā thinamiddhassa bhiyyobhāvāya vepullāya?

sn46.2:4.1

4.2

Atthi, bhikkhave, arati tandi vijambhitā bhattasammado cetaso ca līnattaṁ.

sn46.2:4.2

4.3

Tattha ayonisomanasikārabahulīkāro—

sn46.2:4.3

4.4

ayamāhāro anuppannassa vā thinamiddhassa uppādāya, uppannassa vā thinamiddhassa bhiyyobhāvāya vepullāya.

sn46.2:4.4

5.1

Ko ca, bhikkhave, āhāro anuppannassa vā uddhaccakukkuccassa uppādāya, uppannassa vā uddhaccakukkuccassa bhiyyobhāvāya vepullāya?

sn46.2:5.1

5.2

Atthi, bhikkhave, cetaso avūpasamo.

sn46.2:5.2

5.3

Tattha ayonisomanasikārabahulīkāro—

sn46.2:5.3

5.4

ayamāhāro anuppannassa vā uddhaccakukkuccassa uppādāya, uppannassa vā uddhaccakukkuccassa bhiyyobhāvāya vepullāya.

sn46.2:5.4

6.1

Ko ca, bhikkhave, āhāro anuppannāya vā vicikicchāya uppādāya, uppannāya vā vicikicchāya bhiyyobhāvāya vepullāya?

sn46.2:6.1

6.2

Atthi, bhikkhave, vicikicchāṭṭhānīyā dhammā.

sn46.2:6.2

6.3

Tattha ayonisomanasikārabahulīkāro—

sn46.2:6.3

6.4

ayamāhāro anuppannāya vā vicikicchāya uppādāya, uppannāya vā vicikicchāya bhiyyobhāvāya vepullāya.

sn46.2:6.4

7.1

Seyyathāpi, bhikkhave, ayaṁ kāyo āhāraṭṭhitiko, āhāraṁ paṭicca tiṭṭhati, anāhāro no tiṭṭhati;

sn46.2:7.1

7.2

evameva kho, bhikkhave, ime pañca nīvaraṇā āhāraṭṭhitikā, āhāraṁ paṭicca tiṭṭhanti, anāhārā no tiṭṭhanti.

sn46.2:7.2

8.1

Seyyathāpi, bhikkhave, ayaṁ kāyo āhāraṭṭhitiko, āhāraṁ paṭicca tiṭṭhati, anāhāro no tiṭṭhati;

sn46.2:8.1

8.2

evameva kho, bhikkhave, satta bojjhaṅgā āhāraṭṭhitikā, āhāraṁ paṭicca tiṭṭhanti, anāhārā no tiṭṭhanti.

sn46.2:8.2

9.1

Ko ca, bhikkhave, āhāro anuppannassa vā satisambojjhaṅgassa uppādāya, uppannassa vā satisambojjhaṅgassa bhāvanāya pāripūriyā?

sn46.2:9.1

9.2

Atthi, bhikkhave, satisambojjhaṅgaṭṭhānīyā dhammā.

sn46.2:9.2

9.3

Tattha yonisomanasikārabahulīkāro—

sn46.2:9.3

9.4

ayamāhāro anuppannassa vā satisambojjhaṅgassa uppādāya, uppannassa vā satisambojjhaṅgassa bhāvanāya pāripūriyā.

sn46.2:9.4

10.1

Ko ca, bhikkhave, āhāro anuppannassa vā dhammavicayasambojjhaṅgassa uppādāya, uppannassa vā dhammavicayasambojjhaṅgassa bhāvanāya pāripūriyā?

sn46.2:10.1

10.2

Atthi, bhikkhave, kusalākusalā dhammā, sāvajjānavajjā dhammā, hīnapaṇītā dhammā, kaṇhasukkasappaṭibhāgā dhammā.

sn46.2:10.2

10.3

Tattha yonisomanasikārabahulīkāro—

sn46.2:10.3

10.4

ayamāhāro anuppannassa vā dhammavicayasambojjhaṅgassa uppādāya, uppannassa vā dhammavicayasambojjhaṅgassa bhāvanāya pāripūriyā.

sn46.2:10.4

11.1

Ko ca, bhikkhave, āhāro anuppannassa vā vīriyasambojjhaṅgassa uppādāya, uppannassa vā vīriyasambojjhaṅgassa bhāvanāya pāripūriyā?

sn46.2:11.1

11.2

Atthi, bhikkhave, ārambhadhātu nikkamadhātu parakkamadhātu.

sn46.2:11.2

11.3

Tattha yonisomanasikārabahulīkāro—

sn46.2:11.3

11.4

ayamāhāro anuppannassa vā vīriyasambojjhaṅgassa uppādāya, uppannassa vā vīriyasambojjhaṅgassa bhāvanāya pāripūriyā.

sn46.2:11.4

12.1

Ko ca, bhikkhave, āhāro anuppannassa vā pītisambojjhaṅgassa uppādāya, uppannassa vā pītisambojjhaṅgassa bhāvanāya pāripūriyā?

sn46.2:12.1

12.2

Atthi, bhikkhave, pītisambojjhaṅgaṭṭhānīyā dhammā.

sn46.2:12.2

12.3

Tattha yonisomanasikārabahulīkāro—

sn46.2:12.3

12.4

ayamāhāro anuppannassa vā pītisambojjhaṅgassa uppādāya, uppannassa vā pītisambojjhaṅgassa bhāvanāya pāripūriyā.

sn46.2:12.4

13.1

Ko ca, bhikkhave, āhāro anuppannassa vā passaddhisambojjhaṅgassa uppādāya, uppannassa vā passaddhisambojjhaṅgassa bhāvanāya pāripūriyā?

sn46.2:13.1

13.2

Atthi, bhikkhave, kāyapassaddhi, cittapassaddhi.

sn46.2:13.2

13.3

Tattha yonisomanasikārabahulīkāro—

sn46.2:13.3

13.4

ayamāhāro anuppannassa vā passaddhisambojjhaṅgassa uppādāya, uppannassa vā passaddhisambojjhaṅgassa bhāvanāya pāripūriyā.

sn46.2:13.4

14.1

Ko ca, bhikkhave, āhāro anuppannassa vā samādhisambojjhaṅgassa uppādāya, uppannassa vā samādhisambojjhaṅgassa bhāvanāya pāripūriyā?

sn46.2:14.1

14.2

Atthi, bhikkhave, samathanimittaṁ abyagganimittaṁ.

sn46.2:14.2

14.3

Tattha yonisomanasikārabahulīkāro—

sn46.2:14.3

14.4

ayamāhāro anuppannassa vā samādhisambojjhaṅgassa uppādāya, uppannassa vā samādhisambojjhaṅgassa bhāvanāya pāripūriyā.

sn46.2:14.4

15.1

Ko ca, bhikkhave, āhāro anuppannassa vā upekkhāsambojjhaṅgassa uppādāya, uppannassa vā upekkhāsambojjhaṅgassa bhāvanāya pāripūriyā?

sn46.2:15.1

15.2

Atthi, bhikkhave, upekkhāsambojjhaṅgaṭṭhānīyā dhammā.

sn46.2:15.2

15.3

Tattha yonisomanasikārabahulīkāro—

sn46.2:15.3

15.4

ayamāhāro anuppannassa vā upekkhāsambojjhaṅgassa uppādāya, uppannassa vā upekkhāsambojjhaṅgassa bhāvanāya pāripūriyā.

sn46.2:15.4

16.1

Seyyathāpi, bhikkhave, ayaṁ kāyo āhāraṭṭhitiko, āhāraṁ paṭicca tiṭṭhati, anāhāro no tiṭṭhati;

sn46.2:16.1

16.2

evameva kho, bhikkhave, ime satta bojjhaṅgā āhāraṭṭhitikā, āhāraṁ paṭicca tiṭṭhanti, anāhārā no tiṭṭhantī”ti.

sn46.2:16.2

16.3

Dutiyaṁ.

sn46.2:16.3