完整巴利原文 · 稳定分页 当前仅加载第 9 阅读页；保留 Bilara 原生段落标识，每页最多 120 段。
Saṁyutta Nikāya 52.9
sn52.9:0.11. Rahogatavagga
sn52.9:0.2Ambapālivanasutta
sn52.9:0.3Ekaṁ samayaṁ āyasmā ca anuruddho āyasmā ca sāriputto vesāliyaṁ viharanti ambapālivane.
sn52.9:1.1Atha kho āyasmā sāriputto sāyanhasamayaṁ paṭisallānā vuṭṭhito …pe… ekamantaṁ nisinno kho āyasmā sāriputto āyasmantaṁ anuruddhaṁ etadavoca:
sn52.9:1.2“Vippasannāni kho te, āvuso anuruddha, indriyāni, parisuddho mukhavaṇṇo pariyodāto.
sn52.9:2.1Katamenāyasmā anuruddho vihārena etarahi bahulaṁ viharatī”ti?
sn52.9:2.2“Catūsu khvāhaṁ, āvuso, satipaṭṭhānesu suppatiṭṭhitacitto etarahi bahulaṁ viharāmi.
sn52.9:2.3Katamesu catūsu?
sn52.9:2.4Idhāhaṁ, āvuso, kāye kāyānupassī viharāmi ātāpī sampajāno satimā, vineyya loke abhijjhādomanassaṁ;
sn52.9:2.5vedanāsu …pe…
sn52.9:2.6citte …pe…
sn52.9:2.7dhammesu dhammānupassī viharāmi ātāpī sampajāno satimā, vineyya loke abhijjhādomanassaṁ—
sn52.9:2.8imesu khvāhaṁ, āvuso, catūsu satipaṭṭhānesu suppatiṭṭhitacitto etarahi bahulaṁ viharāmi.
sn52.9:2.9Yo so, āvuso, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, so imesu catūsu satipaṭṭhānesu suppatiṭṭhitacitto bahulaṁ viharatī”ti.
sn52.9:2.10“Lābhā vata no, āvuso, suladdhaṁ vata no, āvuso.
sn52.9:3.1Ye mayaṁ āyasmato anuruddhassa sammukhāva assumha āsabhiṁ vācaṁ bhāsamānassā”ti.
sn52.9:3.2Navamaṁ.
sn52.9:3.3