完整藏文原文 · 德格版页 当前仅加载第 72 函德格 179a 版页；藏文 NFD、目录标记与异常页序保留在来源切片中，重复版页行以稳定序号区分。
པ་རྣམས་གནས་པ་དང་། མི་བརྗེད་པ་དང་། ཉམས་པར་མི་འགྱུར་བ་དང་། ཕྱིར་ཞིང་འབྱུང་བ་དང་། རྒྱས་པ་དང་། ཡོངས་སུ་རྫོགས་པར་བྱ་བའི་ཕྱིར། འདུན་པ་སྐྱེད་ཅིང་འབད་དེ་བརྩོན་འགྲུས་རྩོམ་ལ་སེམས་རབ་ཏུ་འཛིན་ཅིང་
D317.072.0179a01.01ཡང་དག་པར་རབ་ཏུ་འཇོག་པ་སྟེ། དགེ་སློང་དག་འདི་དག་ནི་ཡང་དག་པར་སྤོང་བ་བཞིའོ། །དགེ་སློང་དག་དེ་ལ་རྫུ་འཕྲུལ་གྱི་རྐང་པ་བཞི་གང་ཞེ་ན། འདི་ལ་དགེ་སློང་བདག་གི་འདུན་པ་ཧ་ཅང་བྱིང་ན་ཡང་མི་རུང་། ཧ་ཅང་བཟུང་ན་ཡང་མི་རུང་ངོ་། །
D317.072.0179a02.01ཞེས་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བས་ཡོངས་སུ་བསྒྱུར་བ་སྒོམ་པ་དང་། བདག་གི་བརྩོན་འགྲུས་
D317.072.0179a03.01ཧ་ཅང་བྱིང་ན་ཡང་མི་རུང་། ཧ་ཅང་བཟུང་ན་ཡང་མི་རུང་ངོ་། །ཞེས་བརྩོན་འགྲུས་ཀྱི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་
D317.072.0179a04.01བས་ཡོངས་སུ་བསྒྱུར་བ་སྒོམ་པ་དང་། བདག་གི་སེམས་ཧ་ཅང་བྱིང་ན་ཡང་མི་རུང་། ཧ་ཅང་བཟུང་ན་ཡང་མི་རུང་ངོ་། །ཞེས་སེམས་ཀྱི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་
D317.072.0179a05.01གནས་པ། འགོག་པ་ལ་གནས་པ། རྣམ་པར་སྤོང་བས་ཡོངས་སུ་བསྒྱུར་བ་སྒོམ་པ་དང་། བདག་གི་དཔྱོད་པ་ནི་ཧ་ཅང་བྱིང་ན་ཡང་མི་རུང་། ཧ་ཅང་བཟུང་ན་ཡང་མི་རུང་ངོ་། །ཞེས་དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ། དབེན་
D317.072.0179a06.01པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བས་ཡོངས་སུ་བསྒྱུར་བ་སྒོམ་པ་སྟེ། དགེ་སློང་དག་འདི་དག་ནི་རྫུ་འཕྲུལ་གྱི་རྐང་པ་བཞིའོ། །དགེ་སློང་དག་དེ་ལ་དབང་པོ་ལྔ་གང་ཞེ་ན། འདི་ལྟ་
D317.072.0179a07.01