Poṭṭhapādasutta · Poṭṭhapādasutta

Tena kho pana samayena poṭṭhapādo paribbājako samayappavādake tindukācīre ekasālake mallikāya ārāme paṭivasati mahatiyā paribbājakaparisāya saddhiṁ tiṁsamattehi paribbājakasatehi.

dn9:1.3

1.4

Atha kho bhagavā pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi.

dn9:1.4

2.1

Atha kho bhagavato etadahosi:

dn9:2.1

2.2

“atippago kho tāva sāvatthiyaṁ piṇḍāya carituṁ.

dn9:2.2

2.3

Yannūnāhaṁ yena samayappavādako tindukācīro ekasālako mallikāya ārāmo, yena poṭṭhapādo paribbājako tenupasaṅkameyyan”ti.

dn9:2.3

2.4

Atha kho bhagavā yena samayappavādako tindukācīro ekasālako mallikāya ārāmo tenupasaṅkami.

dn9:2.4

3.1

Tena kho pana samayena poṭṭhapādo paribbājako mahatiyā paribbājakaparisāya saddhiṁ nisinno hoti unnādiniyā uccāsaddamahāsaddāya anekavihitaṁ tiracchānakathaṁ kathentiyā.

dn9:3.1

3.2

Seyyathidaṁ—rājakathaṁ corakathaṁ mahāmattakathaṁ senākathaṁ bhayakathaṁ yuddhakathaṁ annakathaṁ pānakathaṁ vatthakathaṁ sayanakathaṁ mālākathaṁ gandhakathaṁ ñātikathaṁ yānakathaṁ gāmakathaṁ nigamakathaṁ nagarakathaṁ janapadakathaṁ itthikathaṁ sūrakathaṁ visikhākathaṁ kumbhaṭṭhānakathaṁ pubbapetakathaṁ nānattakathaṁ lokakkhāyikaṁ samuddakkhāyikaṁ itibhavābhavakathaṁ iti vā.

dn9:3.2

4.1

Addasā kho poṭṭhapādo paribbājako bhagavantaṁ dūratova āgacchantaṁ;

dn9:4.1

4.2

disvāna sakaṁ parisaṁ saṇṭhapesi:

dn9:4.2

4.3

“appasaddā bhonto hontu, mā bhonto saddamakattha.

dn9:4.3

4.4

Ayaṁ samaṇo gotamo āgacchati.

dn9:4.4

4.5

Appasaddakāmo kho so āyasmā appasaddassa vaṇṇavādī.

dn9:4.5

4.6

Appeva nāma appasaddaṁ parisaṁ viditvā upasaṅkamitabbaṁ maññeyyā”ti.

dn9:4.6

4.7

Evaṁ vutte, te paribbājakā tuṇhī ahesuṁ.

dn9:4.7

5.1

Atha kho bhagavā yena poṭṭhapādo paribbājako tenupasaṅkami.

dn9:5.1

5.2

Atha kho poṭṭhapādo paribbājako bhagavantaṁ etadavoca:

dn9:5.2

5.3

“etu kho, bhante, bhagavā.

dn9:5.3

5.4

Svāgataṁ, bhante, bhagavato.

dn9:5.4

5.5

Cirassaṁ kho, bhante, bhagavā imaṁ pariyāyamakāsi, yadidaṁ idhāgamanāya.

dn9:5.5

5.6

Nisīdatu, bhante, bhagavā, idaṁ āsanaṁ paññattan”ti.

dn9:5.6

5.7

Nisīdi bhagavā paññatte āsane.

dn9:5.7

5.8

Poṭṭhapādopi kho paribbājako aññataraṁ nīcaṁ āsanaṁ gahetvā ekamantaṁ nisīdi.

dn9:5.8

5.9

Ekamantaṁ nisinnaṁ kho poṭṭhapādaṁ paribbājakaṁ bhagavā etadavoca:

dn9:5.9

5.10

“kāya nuttha, poṭṭhapāda, etarahi kathāya sannisinnā, kā ca pana vo antarākathā vippakatā”ti?

dn9:5.10

6.0

1.1. Abhisaññānirodhakathā

dn9:6.0

6.1

Evaṁ vutte, poṭṭhapādo paribbājako bhagavantaṁ etadavoca:

dn9:6.1

6.2

“tiṭṭhatesā, bhante, kathā, yāya mayaṁ etarahi kathāya sannisinnā.

dn9:6.2

6.3

Nesā, bhante, kathā bhagavato dullabhā bhavissati pacchāpi savanāya.

dn9:6.3

6.4

Purimāni, bhante, divasāni purimatarāni, nānātitthiyānaṁ samaṇabrāhmaṇānaṁ kotūhalasālāya sannisinnānaṁ sannipatitānaṁ abhisaññānirodhe kathā udapādi:

dn9:6.4

6.5

‘kathaṁ nu kho, bho, abhisaññānirodho hotī’ti?

dn9:6.5

6.6

Tatrekacce evamāhaṁsu:

dn9:6.6

6.7

‘ahetū appaccayā purisassa saññā uppajjantipi nirujjhantipi.

dn9:6.7

6.8

Yasmiṁ samaye uppajjanti, saññī tasmiṁ samaye hoti.

dn9:6.8

6.9

Yasmiṁ samaye nirujjhanti, asaññī tasmiṁ samaye hotī’ti.

dn9:6.9

6.10

Ittheke abhisaññānirodhaṁ paññapenti.

dn9:6.10

6.11

Tamañño evamāha:

dn9:6.11

6.12

‘na kho pana metaṁ, bho, evaṁ bhavissati.

dn9:6.12

6.13

Saññā hi, bho, purisassa attā.

dn9:6.13

6.14

Sā ca kho upetipi apetipi.

dn9:6.14

6.15

Yasmiṁ samaye upeti, saññī tasmiṁ samaye hoti.

dn9:6.15

6.16

Yasmiṁ samaye apeti, asaññī tasmiṁ samaye hotī’ti.

dn9:6.16

6.17

Ittheke abhisaññānirodhaṁ paññapenti.

dn9:6.17

6.18

Tamañño evamāha:

dn9:6.18

6.19

‘na kho pana metaṁ, bho, evaṁ bhavissati.

dn9:6.19

6.20

Santi hi, bho, samaṇabrāhmaṇā mahiddhikā mahānubhāvā.

dn9:6.20

6.21

Te imassa purisassa saññaṁ upakaḍḍhantipi apakaḍḍhantipi.

dn9:6.21

6.22

Yasmiṁ samaye upakaḍḍhanti, saññī tasmiṁ samaye hoti.

dn9:6.22

6.23

Yasmiṁ samaye apakaḍḍhanti, asaññī tasmiṁ samaye hotī’ti.

dn9:6.23

6.24

Ittheke abhisaññānirodhaṁ paññapenti.

dn9:6.24

6.25

Tamañño evamāha:

dn9:6.25

6.26

‘na kho pana metaṁ, bho, evaṁ bhavissati.

dn9:6.26

6.27

Santi hi, bho, devatā mahiddhikā mahānubhāvā.

dn9:6.27

6.28

Tā imassa purisassa saññaṁ upakaḍḍhantipi apakaḍḍhantipi.

dn9:6.28

6.29

Yasmiṁ samaye upakaḍḍhanti, saññī tasmiṁ samaye hoti.

dn9:6.29

6.30

Yasmiṁ samaye apakaḍḍhanti, asaññī tasmiṁ samaye hotī’ti.

dn9:6.30

6.31

Ittheke abhisaññānirodhaṁ paññapenti.

dn9:6.31

6.32

Tassa mayhaṁ, bhante, bhagavantaṁyeva ārabbha sati udapādi:

dn9:6.32

6.33

‘aho nūna bhagavā, aho nūna sugato, yo imesaṁ dhammānaṁ sukusalo’ti.

dn9:6.33

6.34

Bhagavā, bhante, kusalo, bhagavā pakataññū abhisaññānirodhassa.

dn9:6.34

6.35

Kathaṁ nu kho, bhante, abhisaññānirodho hotī”ti?

dn9:6.35

7.0

1.2. Sahetukasaññuppādanirodhakathā

dn9:7.0

7.1

“Tatra, poṭṭhapāda, ye te samaṇabrāhmaṇā evamāhaṁsu:

dn9:7.1

7.2

‘ahetū appaccayā purisassa saññā uppajjantipi nirujjhantipī’ti, āditova tesaṁ aparaddhaṁ.

dn9:7.2

7.3

Taṁ kissa hetu?

dn9:7.3

7.4

Sahetū hi, poṭṭhapāda, sappaccayā purisassa saññā uppajjantipi nirujjhantipi.

dn9:7.4

7.5

Sikkhā ekā saññā uppajjati, sikkhā ekā saññā nirujjhati.

dn9:7.5

7.6

Kā ca sikkhā”ti? Bhagavā avoca.

dn9:7.6

7.7

“Idha, poṭṭhapāda, tathāgato loke uppajjati arahaṁ, sammāsambuddho …pe…

dn9:7.7

7.8

Evaṁ kho, poṭṭhapāda, bhikkhu sīlasampanno hoti

dn9:7.8

8.1

…pe…

dn9:8.1

9.1

tassime pañcanīvaraṇe pahīne attani samanupassato pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.

dn9:9.1

10.1

So vivicceva kāmehi, vivicca akusalehi dhammehi, savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.

dn9:10.1

10.2

Tassa yā purimā kāmasaññā, sā nirujjhati.

dn9:10.2

10.3

Vivekajapītisukhasukhumasaccasaññā tasmiṁ samaye hoti, vivekajapītisukhasukhumasaccasaññīyeva tasmiṁ samaye hoti.

dn9:10.3

10.4

Evampi sikkhā ekā saññā uppajjati, sikkhā ekā saññā nirujjhati.

dn9:10.4

10.5

Ayaṁ sikkhā”ti bhagavā avoca.

dn9:10.5

11.1

“Puna caparaṁ, poṭṭhapāda, bhikkhu vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.

dn9:11.1

11.2

Tassa yā purimā vivekajapītisukhasukhumasaccasaññā, sā nirujjhati.

dn9:11.2

11.3

Samādhijapītisukhasukhumasaccasaññā tasmiṁ samaye hoti, samādhijapītisukhasukhumasaccasaññīyeva tasmiṁ samaye hoti.

dn9:11.3

11.4

Evampi sikkhā ekā saññā uppajjati, sikkhā ekā saññā nirujjhati.

dn9:11.4

11.5

Ayampi sikkhā”ti bhagavā avoca.

dn9:11.5

12.1

“Puna caparaṁ, poṭṭhapāda, bhikkhu pītiyā ca virāgā upekkhako ca viharati sato ca sampajāno, sukhañca kāyena paṭisaṁvedeti, yaṁ taṁ ariyā ācikkhanti: ‘upekkhako satimā sukhavihārī’ti, tatiyaṁ jhānaṁ upasampajja viharati.

dn9:12.1

12.2

Tassa yā purimā samādhijapītisukhasukhumasaccasaññā, sā nirujjhati.

dn9:12.2

12.3

Upekkhāsukhasukhumasaccasaññā tasmiṁ samaye hoti, upekkhāsukhasukhumasaccasaññīyeva tasmiṁ samaye hoti.

dn9:12.3

12.4

Evampi sikkhā ekā saññā uppajjati, sikkhā ekā saññā nirujjhati.

dn9:12.4

12.5

Ayampi sikkhā”ti bhagavā avoca.

dn9:12.5

13.1

“Puna caparaṁ, poṭṭhapāda, bhikkhu sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.

dn9:13.1

13.2

Tassa yā purimā upekkhāsukhasukhumasaccasaññā, sā nirujjhati.

dn9:13.2

13.3

Adukkhamasukhasukhumasaccasaññā tasmiṁ samaye hoti, adukkhamasukhasukhumasaccasaññīyeva tasmiṁ samaye hoti.

dn9:13.3

13.4

Evampi sikkhā ekā saññā uppajjati, sikkhā ekā saññā nirujjhati.

dn9:13.4

13.5

Ayampi sikkhā”ti bhagavā avoca.

dn9:13.5

14.1

“Puna caparaṁ, poṭṭhapāda, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.

dn9:14.1

14.2

Tassa yā purimā rūpasaññā, sā nirujjhati.

dn9:14.2

14.3

Ākāsānañcāyatanasukhumasaccasaññā tasmiṁ samaye hoti, ākāsānañcāyatanasukhumasaccasaññīyeva tasmiṁ samaye hoti.

dn9:14.3

14.4

Evampi sikkhā ekā saññā uppajjati, sikkhā ekā saññā nirujjhati.

dn9:14.4

14.5

Ayampi sikkhā”ti bhagavā avoca.

dn9:14.5

15.1

“Puna caparaṁ, poṭṭhapāda, bhikkhu sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.

dn9:15.1

15.2

Tassa yā purimā ākāsānañcāyatanasukhumasaccasaññā, sā nirujjhati.

dn9:15.2

15.3

Viññāṇañcāyatanasukhumasaccasaññā tasmiṁ samaye hoti, viññāṇañcāyatanasukhumasaccasaññīyeva tasmiṁ samaye hoti.

dn9:15.3

15.4

Evampi sikkhā ekā saññā uppajjati, sikkhā ekā saññā nirujjhati.

dn9:15.4

15.5

Ayampi sikkhā”ti bhagavā avoca.

dn9:15.5

16.1

“Puna caparaṁ, poṭṭhapāda, bhikkhu sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.

dn9:16.1

16.2

Tassa yā purimā viññāṇañcāyatanasukhumasaccasaññā, sā nirujjhati.

dn9:16.2

16.3

Ākiñcaññāyatanasukhumasaccasaññā tasmiṁ samaye hoti, ākiñcaññāyatanasukhumasaccasaññīyeva tasmiṁ samaye hoti.

dn9:16.3

16.4

Evampi sikkhā ekā saññā uppajjati, sikkhā ekā saññā nirujjhati.

dn9:16.4

16.5

Ayampi sikkhā”ti bhagavā avoca.

dn9:16.5

17.1

“Yato kho, poṭṭhapāda, bhikkhu idha sakasaññī hoti, so tato amutra tato amutra anupubbena saññaggaṁ phusati.

dn9:17.1

17.2

Tassa saññagge ṭhitassa evaṁ hoti:

dn9:17.2

17.3

‘cetayamānassa me pāpiyo, acetayamānassa me seyyo.

dn9:17.3

17.4

Ahañceva kho pana ceteyyaṁ, abhisaṅkhareyyaṁ, imā ca me saññā nirujjheyyuṁ, aññā ca oḷārikā saññā uppajjeyyuṁ;

dn9:17.4

17.5

yannūnāhaṁ na ceva ceteyyaṁ na ca abhisaṅkhareyyan’ti.

dn9:17.5

17.6

So na ceva ceteti, na ca abhisaṅkharoti.

dn9:17.6

17.7

Tassa acetayato anabhisaṅkharoto tā ceva saññā nirujjhanti, aññā ca oḷārikā saññā na uppajjanti.

dn9:17.7

17.8

So nirodhaṁ phusati.

dn9:17.8