上座部大分别（巴利原文）

Theravāda Vinaya

Mahāvibhaṅga

Nissaggiyakaṇḍa

Pattavagga

26. Suttaviññattisikkhāpada

Tena samayena buddho bhagavā rājagahe viharati veḷuvane kalandakanivāpe.

Tena kho pana samayena chabbaggiyā bhikkhū cīvarakārasamaye bahuṁ suttaṁ viññāpesuṁ.

Katepi cīvare bahuṁ suttaṁ avasiṭṭhaṁ hoti.

Atha kho chabbaggiyānaṁ bhikkhūnaṁ etadahosi—

“handa mayaṁ, āvuso, aññampi suttaṁ viññāpetvā tantavāyehi cīvaraṁ vāyāpemā”ti.

Atha kho chabbaggiyā bhikkhū aññampi suttaṁ viññāpetvā tantavāyehi cīvaraṁ vāyāpesuṁ.

Vītepi cīvare bahuṁ suttaṁ avasiṭṭhaṁ hoti.

Dutiyampi kho chabbaggiyā bhikkhū aññampi suttaṁ viññāpetvā tantavāyehi cīvaraṁ vāyāpesuṁ.

Vītepi cīvare bahuṁ suttaṁ avasiṭṭhaṁ hoti.

Tatiyampi kho chabbaggiyā bhikkhū aññampi suttaṁ viññāpetvā tantavāyehi cīvaraṁ vāyāpesuṁ.

Manussā ujjhāyanti khiyyanti vipācenti—

“kathañhi nāma samaṇā sakyaputtiyā sāmaṁ suttaṁ viññāpetvā tantavāyehi cīvaraṁ vāyāpessantī”ti.

Assosuṁ kho bhikkhū tesaṁ manussānaṁ ujjhāyantānaṁ khiyyantānaṁ vipācentānaṁ.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū sāmaṁ suttaṁ viññāpetvā tantavāyehi cīvaraṁ vāyāpessantī”ti.

Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṁ ārocesuṁ …pe…

“saccaṁ kira tumhe, bhikkhave, sāmaṁ suttaṁ viññāpetvā tantavāyehi cīvaraṁ vāyāpethā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, sāmaṁ suttaṁ viññāpetvā tantavāyehi cīvaraṁ vāyāpessatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu sāmaṁ suttaṁ viññāpetvā tantavāyehi cīvaraṁ vāyāpeyya, nissaggiyaṁ pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Sāmanti

sayaṁ viññāpetvā.

Suttaṁ nāma

cha suttāni—

khomaṁ kappāsikaṁ koseyyaṁ kambalaṁ sāṇaṁ bhaṅgaṁ.

Tantavāyehīti

pesakārehi vāyāpeti, payoge payoge dukkaṭaṁ.

Paṭilābhena nissaggiyaṁ hoti.

Nissajjitabbaṁ saṅghassa vā gaṇassa vā puggalassa vā.

Evañca pana, bhikkhave, nissajjitabbaṁ.

…pe…

“idaṁ me, bhante, cīvaraṁ sāmaṁ suttaṁ viññāpetvā tantavāyehi vāyāpitaṁ nissaggiyaṁ.

Imāhaṁ saṅghassa nissajjāmī”ti …pe…

dadeyyāti …pe…

dadeyyunti …pe…

āyasmato dammīti.

Vāyāpite vāyāpitasaññī, nissaggiyaṁ pācittiyaṁ.

Vāyāpite vematiko, nissaggiyaṁ pācittiyaṁ.

Vāyāpite avāyāpitasaññī, nissaggiyaṁ pācittiyaṁ.

Avāyāpite vāyāpitasaññī, āpatti dukkaṭassa.

Avāyāpite vematiko, āpatti dukkaṭassa.

Avāyāpite avāyāpitasaññī, anāpatti.

Anāpatti—

cīvaraṁ sibbetuṁ,

āyoge,

kāyabandhane,

aṁsabaddhake,

pattatthavikāya,

parissāvane,

ñātakānaṁ,

pavāritānaṁ,

aññassatthāya,

attano dhanena,

ummattakassa,

ādikammikassāti.

Suttaviññattisikkhāpadaṁ niṭṭhitaṁ chaṭṭhaṁ.