上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ovādavagga

25. Cīvaradānasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññataro bhikkhu sāvatthiyaṁ aññatarissā visikhāya piṇḍāya carati. Aññatarāpi bhikkhunī tassā visikhāya piṇḍāya carati.

Atha kho so bhikkhu taṁ bhikkhuniṁ etadavoca—“gaccha, bhagini, amukasmiṁ okāse bhikkhā diyyatī”ti.

Sāpi kho evamāha—“gacchāyya, amukasmiṁ okāse bhikkhā diyyatī”ti.

Te abhiṇhadassanena sandiṭṭhā ahesuṁ.

Tena kho pana samayena saṅghassa cīvaraṁ bhājīyati.

Atha kho sā bhikkhunī ovādaṁ gantvā yena so bhikkhu tenupasaṅkami; upasaṅkamitvā taṁ bhikkhuṁ abhivādetvā ekamantaṁ aṭṭhāsi.

Ekamantaṁ ṭhitaṁ kho taṁ bhikkhuniṁ so bhikkhu etadavoca—“ ayaṁ me, bhagini, cīvarapaṭivīso; sādiyissasī”ti?

“Āmāyya, dubbalacīvarāmhī”ti.

Atha kho so bhikkhu tassā bhikkhuniyā cīvaraṁ adāsi.

Sopi kho bhikkhu dubbalacīvaro hoti.

Bhikkhū taṁ bhikkhuṁ etadavocuṁ—“karohi dāni te, āvuso, cīvaran”ti.

Atha kho so bhikkhu bhikkhūnaṁ etamatthaṁ ārocesi.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma bhikkhu bhikkhuniyā cīvaraṁ dassatī”ti …pe…

“saccaṁ kira tvaṁ, bhikkhu, bhikkhuniyā cīvaraṁ adāsī”ti?

“Saccaṁ, bhagavā”ti.

“Ñātikā te, bhikkhu, aññātikā”ti?

“Aññātikā, bhagavā”ti.

“Aññātako, moghapurisa, aññātikāya na jānāti patirūpaṁ vā appatirūpaṁ vā santaṁ vā asantaṁ vā.

Kathañhi nāma tvaṁ, moghapurisa, aññātikāya bhikkhuniyā cīvaraṁ dassasi.

Netaṁ, moghapurisa, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu aññātikāya bhikkhuniyā cīvaraṁ dadeyya, pācittiyan”ti.

Evañcidaṁ bhagavatā bhikkhūnaṁ sikkhāpadaṁ paññattaṁ hoti.

Tena kho pana samayena bhikkhū kukkuccāyantā bhikkhunīnaṁ pārivattakaṁ cīvaraṁ na denti.

Bhikkhuniyo ujjhāyanti khiyyanti vipācenti—

“kathañhi nāma ayyā amhākaṁ pārivattakaṁ cīvaraṁ na dassantī”ti.

Assosuṁ kho bhikkhū tāsaṁ bhikkhunīnaṁ ujjhāyantīnaṁ khiyyantīnaṁ vipācentīnaṁ.

Atha kho te bhikkhū bhagavato etamatthaṁ ārocesuṁ.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, pañcannaṁ pārivattakaṁ dātuṁ.

Bhikkhussa, bhikkhuniyā, sikkhamānāya, sāmaṇerassa, sāmaṇeriyā—

anujānāmi, bhikkhave, imesaṁ pañcannaṁ pārivattakaṁ dātuṁ.

Evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu aññātikāya bhikkhuniyā cīvaraṁ dadeyya, aññatra pārivattakā, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Aññātikā nāma

mātito vā pitito vā yāva sattamā pitāmahayugā asambaddhā.

Bhikkhunī nāma

ubhatosaṅghe upasampannā.

Cīvaraṁ nāma

channaṁ cīvarānaṁ aññataraṁ cīvaraṁ vikappanupagaṁ pacchimaṁ.

Aññatra pārivattakāti

ṭhapetvā pārivattakaṁ deti, āpatti pācittiyassa.

Aññātikāya aññātikasaññī cīvaraṁ deti, aññatra pārivattakā, āpatti pācittiyassa.

Aññātikāya vematiko cīvaraṁ deti, aññatra pārivattakā, āpatti pācittiyassa.

Aññātikāya ñātikasaññī cīvaraṁ deti, aññatra pārivattakā, āpatti pācittiyassa.

Ekato upasampannāya cīvaraṁ deti, aññatra pārivattakā, āpatti dukkaṭassa.

Ñātikāya aññātikasaññī, āpatti dukkaṭassa.

Ñātikāya vematiko, āpatti dukkaṭassa.

Ñātikāya ñātikasaññī, anāpatti.

Anāpatti—

ñātikāya,

pārivattakaṁ parittena vā vipulaṁ, vipulena vā parittaṁ,

bhikkhunī vissāsaṁ gaṇhāti,

tāvakālikaṁ gaṇhāti,

cīvaraṁ ṭhapetvā aññaṁ parikkhāraṁ deti,

sikkhamānāya,

sāmaṇeriyā,

ummattakassa,

ādikammikassāti.

Cīvaradānasikkhāpadaṁ niṭṭhitaṁ pañcamaṁ.