上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Bhojanavagga

36. Dutiyapavāraṇāsikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena dve bhikkhū kosalesu janapade sāvatthiṁ addhānamaggappaṭipannā honti.

Eko bhikkhu anācāraṁ ācarati.

Dutiyo bhikkhu taṁ bhikkhuṁ etadavoca—

“māvuso, evarūpamakāsi, netaṁ kappatī”ti.

So tasmiṁ upanandhi.

Atha kho te bhikkhū sāvatthiṁ agamaṁsu.

Tena kho pana samayena sāvatthiyaṁ aññatarassa pūgassa saṅghabhattaṁ hoti.

Dutiyo bhikkhu bhuttāvī pavārito hoti.

Upanaddho bhikkhu ñātikulaṁ gantvā piṇḍapātaṁ ādāya yena so bhikkhu tenupasaṅkami; upasaṅkamitvā taṁ bhikkhuṁ etadavoca—

“bhuñjāhi, āvuso”ti.

“Alaṁ, āvuso, paripuṇṇomhī”ti.

“Sundaro, āvuso, piṇḍapāto, bhuñjāhī”ti.

Atha kho so bhikkhu tena bhikkhunā nippīḷiyamāno taṁ piṇḍapātaṁ bhuñji.

Upanaddho bhikkhu taṁ bhikkhuṁ etadavoca—

“tvampi nāma, āvuso, maṁ vattabbaṁ maññasi yaṁ tvaṁ bhuttāvī pavārito anatirittaṁ bhojanaṁ bhuñjasī”ti.

“Nanu, āvuso, ācikkhitabban”ti.

“Nanu, āvuso, pucchitabban”ti.

Atha kho so bhikkhu bhikkhūnaṁ etamatthaṁ ārocesi.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma bhikkhu bhikkhuṁ bhuttāviṁ pavāritaṁ anatirittena bhojanena abhihaṭṭhuṁ pavāressatī”ti …pe…

“saccaṁ kira tvaṁ, bhikkhu, bhikkhuṁ bhuttāviṁ pavāritaṁ anatirittena bhojanena abhihaṭṭhuṁ pavāresī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tvaṁ, moghapurisa, bhikkhuṁ bhuttāviṁ pavāritaṁ anatirittena bhojanena abhihaṭṭhuṁ pavāressasi.

Netaṁ, moghapurisa, appasannānaṁ vā pasādāya …pe…

evañca pana bhikkhave imaṁ sikkhāpadaṁ uddiseyyātha—

“Yo pana bhikkhu bhikkhuṁ bhuttāviṁ pavāritaṁ anatirittena khādanīyena vā bhojanīyena vā abhihaṭṭhuṁ pavāreyya—‘handa, bhikkhu, khāda vā bhuñja vā’ti, jānaṁ āsādanāpekkho, bhuttasmiṁ, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Bhikkhunti

aññaṁ bhikkhuṁ.

Bhuttāvī nāma

pañcannaṁ bhojanānaṁ aññataraṁ bhojanaṁ, antamaso kusaggenapi bhuttaṁ hoti.

Pavārito nāma

asanaṁ paññāyati, bhojanaṁ paññāyati, hatthapāse ṭhito abhiharati, paṭikkhepo paññāyati.

Anatirittaṁ nāma

akappiyakataṁ hoti,

appaṭiggahitakataṁ hoti,

anuccāritakataṁ hoti,

ahatthapāse kataṁ hoti,

abhuttāvinā kataṁ hoti,

bhuttāvinā pavāritena āsanā vuṭṭhitena kataṁ hoti,

“alametaṁ sabban”ti avuttaṁ hoti,

na gilānātirittaṁ hoti—

etaṁ anatirittaṁ nāma.

Khādanīyaṁ nāma

pañca bhojanāni—yāmakālikaṁ sattāhakālikaṁ yāvajīvikaṁ ṭhapetvā avasesaṁ khādanīyaṁ nāma.

Bhojanīyaṁ nāma

pañca bhojanāni—odano, kummāso, sattu, maccho, maṁsaṁ.

Abhihaṭṭhuṁ pavāreyyāti

yāvatakaṁ icchasi tāvatakaṁ gaṇhāhīti.

Jānāti nāma

sāmaṁ vā jānāti, aññe vā tassa ārocenti, so vā āroceti.

Āsādanāpekkhoti

“iminā imaṁ codessāmi sāressāmi paṭicodessāmi paṭisāressāmi maṅkuṁ karissāmī”ti abhiharati, āpatti dukkaṭassa.

Tassa vacanena “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti dukkaṭassa.

Bhojanapariyosāne āpatti pācittiyassa.

Pavārite pavāritasaññī anatirittena khādanīyena vā bhojanīyena vā abhihaṭṭhuṁ pavāreti, āpatti pācittiyassa.

Pavārite vematiko anatirittena khādanīyena vā bhojanīyena vā abhihaṭṭhuṁ pavāreti, āpatti dukkaṭassa.

Pavārite appavāritasaññī anatirittena khādanīyena vā bhojanīyena vā abhihaṭṭhuṁ pavāreti, anāpatti.

Yāmakālikaṁ sattāhakālikaṁ yāvajīvikaṁ āhāratthāya abhiharati, āpatti dukkaṭassa.

Tassa vacanena “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti dukkaṭassa.

Appavārite pavāritasaññī, āpatti dukkaṭassa.

Appavārite vematiko, āpatti dukkaṭassa.

Appavārite appavāritasaññī, anāpatti.

Anāpatti—

atirittaṁ kārāpetvā deti,

“atirittaṁ kārāpetvā bhuñjāhī”ti deti,

aññassatthāya haranto gacchāhīti deti,

gilānassa sesakaṁ deti,

“yāmakālikaṁ sattāhakālikaṁ yāvajīvikaṁ sati paccaye paribhuñjā”ti deti,

ummattakassa,

ādikammikassāti.

Dutiyapavāraṇāsikkhāpadaṁ niṭṭhitaṁ chaṭṭhaṁ.