上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Surāpānavagga

60. Cīvaraapanidhānasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena sattarasavaggiyā bhikkhū asannihitaparikkhārā honti.

Chabbaggiyā bhikkhū sattarasavaggiyānaṁ bhikkhūnaṁ pattampi cīvarampi apanidhenti.

Sattarasavaggiyā bhikkhū chabbaggiye bhikkhū etadavocuṁ—

“dethāvuso, amhākaṁ pattampi cīvarampī”ti.

Chabbaggiyā bhikkhū hasanti, te rodanti.

Bhikkhū evamāhaṁsu—

“kissa tumhe, āvuso, rodathā”ti?

“Ime, āvuso, chabbaggiyā bhikkhū amhākaṁ pattampi cīvarampi apanidhentī”ti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū bhikkhūnaṁ pattampi cīvarampi apanidhessantī”ti …pe…

“saccaṁ kira tumhe, bhikkhave, bhikkhūnaṁ pattampi cīvarampi apanidhethā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, bhikkhūnaṁ pattampi cīvarampi apanidhessatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu bhikkhussa pattaṁ vā cīvaraṁ vā nisīdanaṁ vā sūcigharaṁ vā kāyabandhanaṁ vā apanidheyya vā apanidhāpeyya vā, antamaso hasāpekkhopi, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Bhikkhussāti

aññassa bhikkhussa.

Patto nāma

dve pattā—ayopatto, mattikāpatto.

Cīvaraṁ nāma

channaṁ cīvarānaṁ aññataraṁ cīvaraṁ, vikappanupagaṁ pacchimaṁ.

Nisīdanaṁ nāma

sadasaṁ vuccati.

Sūcigharaṁ nāma

sasūcikaṁ vā asūcikaṁ vā.

Kāyabandhanaṁ nāma

dve kāyabandhanāni— paṭṭikā, sūkarantakaṁ.

Apanidheyya vāti

sayaṁ apanidheti, āpatti pācittiyassa.

Apanidhāpeyya vāti

aññaṁ āṇāpesi, āpatti pācittiyassa.

Sakiṁ āṇatto bahukampi apanidheti, āpatti pācittiyassa.

Antamaso hasāpekkhopīti

kīḷādhippāyo.

Upasampanne upasampannasaññī pattaṁ vā cīvaraṁ vā nisīdanaṁ vā sūcigharaṁ vā kāyabandhanaṁ vā apanidheti vā apanidhāpeti vā, antamaso hasāpekkhopi, āpatti pācittiyassa.

Upasampanne vematiko …pe…

upasampanne anupasampannasaññī pattaṁ vā cīvaraṁ vā nisīdanaṁ vā sūcigharaṁ vā kāyabandhanaṁ vā apanidheti vā apanidhāpeti vā, antamaso hasāpekkhopi, āpatti pācittiyassa.

Aññaṁ parikkhāraṁ apanidheti vā apanidhāpeti vā, antamaso hasāpekkhopi, āpatti dukkaṭassa.

Anupasampannassa pattaṁ vā cīvaraṁ vā aññaṁ vā parikkhāraṁ apanidheti vā apanidhāpeti vā, antamaso hasāpekkhopi, āpatti dukkaṭassa.

Anupasampanne upasampannasaññī, āpatti dukkaṭassa.

Anupasampanne vematiko, āpatti dukkaṭassa.

Anupasampanne anupasampannasaññī, āpatti dukkaṭassa.

Anāpatti—

nahasādhippāyo,

dunnikkhittaṁ paṭisāmeti,

“dhammiṁ kathaṁ katvā dassāmī”ti paṭisāmeti,

ummattakassa,

ādikammikassāti.

Cīvaraapanidhānasikkhāpadaṁ niṭṭhitaṁ dasamaṁ.

Surāpānavaggo chaṭṭho.

Tassuddānaṁ

Surā aṅguli hāso ca,

anādariyañca bhiṁsanaṁ;

Jotinahānadubbaṇṇaṁ,

sāmaṁ apanidhena cāti.