上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Sahadhammikavagga

75. Talasattikasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena chabbaggiyā bhikkhū kupitā anattamanā sattarasavaggiyānaṁ bhikkhūnaṁ talasattikaṁ uggiranti.

Te pahārasamuccitā rodanti.

Bhikkhū evamāhaṁsu—

“kissa tumhe, āvuso, rodathā”ti?

“Ime, āvuso, chabbaggiyā bhikkhū kupitā anattamanā amhākaṁ talasattikaṁ uggirantī”ti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū kupitā anattamanā sattarasavaggiyānaṁ bhikkhūnaṁ talasattikaṁ uggirissantī”ti …pe…

“saccaṁ kira tumhe, bhikkhave, kupitā anattamanā sattarasavaggiyānaṁ bhikkhūnaṁ talasattikaṁ uggirathā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, kupitā anattamanā sattarasavaggiyānaṁ bhikkhūnaṁ talasattikaṁ uggirissatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu bhikkhussa kupito anattamano talasattikaṁ uggireyya, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Bhikkhussāti

aññassa bhikkhussa.

Kupito anattamanoti

anabhiraddho āhatacitto khilajāto.

Talasattikaṁ uggireyyāti

kāyaṁ vā kāyapaṭibaddhaṁ vā antamaso uppalapattampi uccāreti, āpatti pācittiyassa.

Upasampanne upasampannasaññī kupito anattamano talasattikaṁ uggirati, āpatti pācittiyassa.

Upasampanne vematiko kupito anattamano talasattikaṁ uggirati, āpatti pācittiyassa.

Upasampanne anupasampannasaññī kupito anattamano talasattikaṁ uggirati, āpatti pācittiyassa.

Anupasampannassa kupito anattamano talasattikaṁ uggirati, āpatti dukkaṭassa.

Anupasampanne upasampannasaññī, āpatti dukkaṭassa.

Anupasampanne vematiko, āpatti dukkaṭassa.

Anupasampanne anupasampannasaññī, āpatti dukkaṭassa.

Anāpatti—

kenaci viheṭhīyamāno mokkhādhippāyo talasattikaṁ uggirati,

ummattakassa,

ādikammikassāti.

Talasattikasikkhāpadaṁ niṭṭhitaṁ pañcamaṁ.