上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ratanavagga

89. Nisīdanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhagavatā bhikkhūnaṁ nisīdanaṁ anuññātaṁ hoti.

Chabbaggiyā bhikkhū—

“bhagavatā nisīdanaṁ anuññātan”ti appamāṇikāni nisīdanāni dhārenti.

Mañcassapi pīṭhassapi puratopi pacchatopi olambenti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū appamāṇikāni nisīdanāni dhāressantī”ti …pe…

“saccaṁ kira tumhe, bhikkhave, appamāṇikāni nisīdanāni dhārethā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, appamāṇikāni nisīdanāni dhāressatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Nisīdanaṁ pana bhikkhunā kārayamānena pamāṇikaṁ kāretabbaṁ.

Tatridaṁ pamāṇaṁ—dīghaso dve vidatthiyo, sugatavidatthiyā; tiriyaṁ diyaḍḍhaṁ.

Taṁ atikkāmayato chedanakaṁ pācittiyan”ti.

Evañcidaṁ bhagavatā bhikkhūnaṁ sikkhāpadaṁ paññattaṁ hoti.

Tena kho pana samayena āyasmā udāyī mahākāyo hoti.

So bhagavato purato nisīdanaṁ paññapetvā samantato samañchamāno nisīdati.

Atha kho bhagavā āyasmantaṁ udāyiṁ etadavoca—

“kissa tvaṁ, udāyi, nisīdanaṁ samantato samañchasi;

seyyathāpi purāṇāsikoṭṭho”ti?

“Tathā hi pana, bhante, bhagavatā bhikkhūnaṁ atikhuddakaṁ nisīdanaṁ anuññātan”ti.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, nisīdanassa dasaṁ vidatthiṁ.

Evañca pana, bhikkhave, imaṁ sikkhāpadaṁ uddiseyyātha—

“Nisīdanaṁ pana bhikkhunā kārayamānena pamāṇikaṁ kāretabbaṁ.

Tatridaṁ pamāṇaṁ—dīghaso dve vidatthiyo, sugatavidatthiyā; tiriyaṁ diyaḍḍhaṁ. Dasā vidatthi.

Taṁ atikkāmayato chedanakaṁ pācittiyan”ti.

Nisīdanaṁ nāma

sadasaṁ vuccati.

Kārayamānenāti

karonto vā kārāpento vā pamāṇikaṁ kāretabbaṁ.

Tatridaṁ pamāṇaṁ— dīghaso dve vidatthiyo, sugatavidatthiyā; tiriyaṁ diyaḍḍhaṁ. Dasā vidatthi.

Taṁ atikkāmetvā karoti vā kārāpeti vā, payoge dukkaṭaṁ.

Paṭilābhena chinditvā pācittiyaṁ desetabbaṁ.

Attanā vippakataṁ attanā pariyosāpeti, āpatti pācittiyassa.

Attanā vippakataṁ parehi pariyosāpeti, āpatti pācittiyassa.

Parehi vippakataṁ attanā pariyosāpeti, āpatti pācittiyassa.

Parehi vippakataṁ parehi pariyosāpeti, āpatti pācittiyassa.

Aññassatthāya karoti vā kārāpeti vā, āpatti dukkaṭassa.

Aññena kataṁ paṭilabhitvā paribhuñjati, āpatti dukkaṭassa.

Anāpatti—

pamāṇikaṁ karoti,

ūnakaṁ karoti,

aññena kataṁ pamāṇātikkantaṁ paṭilabhitvā chinditvā paribhuñjati,

vitānaṁ vā bhūmattharaṇaṁ vā sāṇipākāraṁ vā bhisiṁ vā bibbohanaṁ vā karoti,

ummattakassa,

ādikammikassāti.

Nisīdanasikkhāpadaṁ niṭṭhitaṁ sattamaṁ.