上座部大分别（巴利原文）

Theravāda Vinaya

Mahāvibhaṅga

Sekhiyakaṇḍa

Surusuruvagga

55. Sāmisasikkhāpada

Tena samayena buddho bhagavā bhaggesu viharati susumāragire bhesakaḷāvane migadāye.

Tena kho pana samayena bhikkhū kokanade pāsāde sāmisena hatthena pānīyathālakaṁ paṭiggaṇhanti.

Manussā ujjhāyanti khiyyanti vipācenti—

“kathañhi nāma samaṇā sakyaputtiyā sāmisena hatthena pānīyathālakaṁ paṭiggahessanti, seyyathāpi gihī kāmabhogino”ti.

Assosuṁ kho bhikkhū tesaṁ manussānaṁ ujjhāyantānaṁ khiyyantānaṁ vipācentānaṁ.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma bhikkhū sāmisena hatthena pānīyathālakaṁ paṭiggahessantī”ti …pe…

“saccaṁ kira, bhikkhave, bhikkhū sāmisena hatthena pānīyathālakaṁ paṭiggaṇhantī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma te, bhikkhave, moghapurisā sāmisena hatthena pānīyathālakaṁ paṭiggahessanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Na sāmisena hatthena pānīyathālakaṁ paṭiggahessāmīti sikkhā karaṇīyā”ti.

Na sāmisena hatthena pānīyathālako paṭiggahetabbo.

Yo anādariyaṁ paṭicca sāmisena hatthena pānīyathālakaṁ paṭiggaṇhāti, āpatti dukkaṭassa.

Anāpatti—

asañcicca,

assatiyā,

ajānantassa,

gilānassa,

“dhovissāmī”ti vā “dhovāpessāmī”ti vā paṭiggaṇhāti,

āpadāsu,

ummattakassa,

ādikammikassāti.

Pañcamasikkhāpadaṁ niṭṭhitaṁ.