上座部《发趣论》（巴利原文）

Sekkho dhammo sekkhassa dhammassa kammapaccayena paccayo—sahajātā, nānākkhaṇikā. <b>Sahajātā</b>—sekkhā cetanā sampayuttakānaṁ khandhānaṁ kammapaccayena paccayo. <b>Nānākkhaṇikā</b>—sekkhā cetanā vipākānaṁ sekkhānaṁ khandhānaṁ kammapaccayena paccayo.

Sekkho dhammo asekkhassa dhammassa kammapaccayena paccayo. <b>Nānākkhaṇikā</b>—sekkhā cetanā asekkhānaṁ khandhānaṁ kammapaccayena paccayo.

Sekkho dhammo nevasekkhanāsekkhassa dhammassa kammapaccayena paccayo. <b>Sahajātā</b>—sekkhā cetanā cittasamuṭṭhānānaṁ rūpānaṁ kammapaccayena paccayo.

Sekkho dhammo sekkhassa ca nevasekkhanāsekkhassa ca dhammassa kammapaccayena paccayo—sekkhā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo.

Asekkho dhammo asekkhassa dhammassa kammapaccayena paccayo—asekkhā cetanā sampayuttakānaṁ khandhānaṁ kammapaccayena paccayo.

Asekkho dhammo nevasekkhanāsekkhassa dhammassa kammapaccayena paccayo—asekkhā cetanā cittasamuṭṭhānānaṁ rūpānaṁ kammapaccayena paccayo.

Asekkho dhammo asekkhassa ca nevasekkhanāsekkhassa ca dhammassa kammapaccayena paccayo—asekkhā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo.

Nevasekkhanāsekkho dhammo nevasekkhanāsekkhassa dhammassa kammapaccayena paccayo—sahajātā, nānākkhaṇikā. <b>Sahajātā</b>—nevasekkhanāsekkhā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo. Paṭisandhikkhaṇe …pe…. <b>Nānākkhaṇikā</b>—nevasekkhanāsekkhā cetanā vipākānaṁ nevasekkhanāsekkhānaṁ khandhānaṁ kaṭattā ca rūpānaṁ kammapaccayena paccayo.

Vipāka

Sekkho dhammo sekkhassa dhammassa vipākapaccayena paccayo—vipāko sekkho eko khandho tiṇṇannaṁ khandhānaṁ …pe…. (Sekkhamūlake tīṇi.)

Asekkho dhammo asekkhassa dhammassa vipākapaccayena paccayo—asekkho eko khandho tiṇṇannaṁ khandhānaṁ …pe…. (Asekkhamūlake tīṇi.)

Nevasekkhanāsekkho dhammo nevasekkhanāsekkhassa dhammassa vipākapaccayena paccayo—vipāko nevasekkhanāsekkho eko khandho tiṇṇannaṁ khandhānaṁ …pe… paṭisandhikkhaṇe …pe… khandhā vatthussa vipākapaccayena paccayo.

Āhārādi

Sekkho dhammo sekkhassa dhammassa āhārapaccayena paccayo … indriyapaccayena paccayo … jhānapaccayena paccayo … maggapaccayena paccayo … sampayuttapaccayena paccayo …pe….

Vippayutta

Sekkho dhammo nevasekkhanāsekkhassa dhammassa vippayuttapaccayena paccayo— sahajātaṁ, pacchājātaṁ. <b>Sahajātā</b>—sekkhā khandhā cittasamuṭṭhānānaṁ rūpānaṁ vippayuttapaccayena paccayo. <b>Pacchājātā</b>—sekkhā khandhā purejātassa imassa kāyassa vippayuttapaccayena paccayo.

Asekkho dhammo nevasekkhanāsekkhassa dhammassa vippayuttapaccayena paccayo— sahajātaṁ, pacchājātaṁ. (Sekkhasadisaṁ.)

Nevasekkhanāsekkho dhammo nevasekkhanāsekkhassa dhammassa vippayuttapaccayena paccayo—sahajātaṁ, purejātaṁ, pacchājātaṁ. <b>Sahajātā</b>—nevasekkhanāsekkhā khandhā cittasamuṭṭhānānaṁ rūpānaṁ vippayuttapaccayena paccayo. Paṭisandhikkhaṇe nevasekkhanāsekkhā khandhā kaṭattārūpānaṁ vippayuttapaccayena paccayo. Khandhā vatthussa vippayuttapaccayena paccayo. Vatthu khandhānaṁ vippayuttapaccayena paccayo. <b>Purejātaṁ</b>—cakkhāyatanaṁ cakkhuviññāṇassa …pe… kāyāyatanaṁ kāyaviññāṇassa, vatthu nevasekkhanāsekkhānaṁ khandhānaṁ vippayuttapaccayena paccayo. <b>Pacchājātā</b>—nevasekkhanāsekkhā khandhā purejātassa imassa kāyassa vippayuttapaccayena paccayo.

Nevasekkhanāsekkho dhammo sekkhassa dhammassa vippayuttapaccayena paccayo. <b>Purejātaṁ</b>—vatthu sekkhānaṁ khandhānaṁ vippayuttapaccayena paccayo.

Nevasekkhanāsekkho dhammo asekkhassa dhammassa vippayuttapaccayena paccayo. <b>Purejātaṁ</b>—vatthu asekkhānaṁ khandhānaṁ vippayuttapaccayena paccayo.

Atthi

Sekkho dhammo sekkhassa dhammassa atthipaccayena paccayo—sekkho eko khandho tiṇṇannaṁ khandhānaṁ …pe….

Sekkho dhammo nevasekkhanāsekkhassa dhammassa atthipaccayena paccayo— sahajātaṁ, pacchājātaṁ. <b>Sahajātā</b>—sekkhā khandhā cittasamuṭṭhānānaṁ rūpānaṁ atthipaccayena paccayo. <b>Pacchājātā</b>—sekkhā khandhā purejātassa imassa kāyassa atthipaccayena paccayo.

Sekkho dhammo sekkhassa ca nevasekkhanāsekkhassa ca dhammassa atthipaccayena paccayo—sekkho eko khandho tiṇṇannaṁ khandhānaṁ cittasamuṭṭhānānañca rūpānaṁ atthipaccayena paccayo …pe… dve khandhā …pe….

Asekkho dhammo asekkhassa dhammassa atthipaccayena paccayo …pe… tīṇi. (Sekkhasadisaṁ.)

Nevasekkhanāsekkho dhammo nevasekkhanāsekkhassa dhammassa atthipaccayena paccayo—sahajātaṁ, purejātaṁ, pacchājātaṁ, āhāraṁ, indriyaṁ. <b>Sahajāto</b>—nevasekkhanāsekkho eko khandho tiṇṇannaṁ khandhānaṁ cittasamuṭṭhānānañca rūpānaṁ atthipaccayena paccayo …pe… dve khandhā …pe… paṭisandhikkhaṇe …pe… khandhā vatthussa atthipaccayena paccayo. Vatthu khandhānaṁ atthipaccayena paccayo, ekaṁ mahābhūtaṁ …pe… bāhiraṁ …pe… asaññasattānaṁ …pe…. <b>Purejātaṁ</b>—cakkhuṁ aniccato dukkhato anattato vipassati; assādeti abhinandati; taṁ ārabbha rāgo uppajjati …pe… domanassaṁ uppajjati. Sotaṁ …pe… vatthuṁ aniccato …pe… vipassati, dibbena cakkhunā rūpaṁ passati, dibbāya sotadhātuyā saddaṁ suṇāti, rūpāyatanaṁ cakkhuviññāṇassa …pe… phoṭṭhabbāyatanaṁ kāyaviññāṇassa …pe… cakkhāyatanaṁ cakkhuviññāṇassa …pe… kāyāyatanaṁ kāyaviññāṇassa … vatthu nevasekkhanāsekkhānaṁ khandhānaṁ atthipaccayena paccayo. <b>Pacchājātā</b>—nevasekkhanāsekkhā khandhā purejātassa imassa kāyassa atthipaccayena paccayo. <b>Kabaḷīkāro āhāro</b>—imassa kāyassa atthipaccayena paccayo. <b>Rūpajīvitindriyaṁ</b>—kaṭattārūpānaṁ atthipaccayena paccayo.

Nevasekkhanāsekkho dhammo sekkhassa dhammassa atthipaccayena paccayo. <b>Purejātaṁ</b>—vatthu sekkhānaṁ khandhānaṁ atthipaccayena paccayo.

Nevasekkhanāsekkho dhammo asekkhassa dhammassa atthipaccayena paccayo. <b>Purejātaṁ</b>—vatthu asekkhānaṁ khandhānaṁ atthipaccayena paccayo.

Sekkho ca nevasekkhanāsekkho ca dhammā sekkhassa dhammassa atthipaccayena paccayo—sahajātaṁ, purejātaṁ. <b>Sahajāto</b>—sekkho eko khandho ca vatthu ca tiṇṇannaṁ khandhānaṁ atthipaccayena paccayo …pe… dve khandhā …pe….

Sekkho ca nevasekkhanāsekkho ca dhammā nevasekkhanāsekkhassa dhammassa atthipaccayena paccayo—sahajātaṁ, pacchājātaṁ, āhāraṁ, indriyaṁ. <b>Sahajātā</b>—sekkhā khandhā ca mahābhūtā ca cittasamuṭṭhānānaṁ rūpānaṁ atthipaccayena paccayo. <b>Pacchājātā</b>—sekkhā khandhā ca kabaḷīkāro āhāro ca imassa kāyassa atthipaccayena paccayo. <b>Pacchājātā</b>—sekkhā khandhā ca rūpajīvitindriyañca kaṭattārūpānaṁ atthipaccayena paccayo.

Asekkho ca nevasekkhanāsekkho ca dhammā asekkhassa dhammassa atthipaccayena paccayo …pe…. (Dve pañhā kātabbā, sekkhasadisā.)

Saṅkhyāvāra

Suddha

Hetuyā satta, ārammaṇe pañca, adhipatiyā nava, anantare aṭṭha, samanantare aṭṭha, sahajāte nava, aññamaññe tīṇi, nissaye terasa, upanissaye aṭṭha, purejāte tīṇi, pacchājāte tīṇi, āsevane dve, kamme aṭṭha, vipāke āhāre indriye jhāne magge satta, sampayutte tīṇi, vippayutte pañca, atthiyā terasa, natthiyā aṭṭha, vigate aṭṭha, avigate terasa. (Evaṁ gaṇetabbaṁ.)

Anulomaṁ.

Paccanīyuddhāra

Sekkho dhammo sekkhassa dhammassa sahajātapaccayena paccayo … upanissayapaccayena paccayo.

Sekkho dhammo asekkhassa dhammassa upanissayapaccayena paccayo.

Sekkho dhammo nevasekkhanāsekkhassa dhammassa ārammaṇapaccayena paccayo … sahajātapaccayena paccayo … upanissayapaccayena paccayo … pacchājātapaccayena paccayo.

Sekkho dhammo sekkhassa ca nevasekkhanāsekkhassa ca dhammassa sahajātapaccayena paccayo.

Asekkho dhammo asekkhassa dhammassa sahajātapaccayena paccayo … upanissayapaccayena paccayo.

Asekkho dhammo nevasekkhanāsekkhassa dhammassa ārammaṇapaccayena paccayo … sahajātapaccayena paccayo … upanissayapaccayena paccayo … pacchājātapaccayena paccayo.

Asekkho dhammo asekkhassa ca nevasekkhanāsekkhassa ca dhammassa sahajātapaccayena paccayo.

Nevasekkhanāsekkho dhammo nevasekkhanāsekkhassa dhammassa ārammaṇapaccayena paccayo … sahajātapaccayena paccayo … upanissayapaccayena paccayo … purejātapaccayena paccayo … pacchājātapaccayena paccayo … kammapaccayena paccayo … āhārapaccayena paccayo … indriyapaccayena paccayo.

Nevasekkhanāsekkho dhammo sekkhassa dhammassa upanissayapaccayena paccayo … purejātapaccayena paccayo.

Nevasekkhanāsekkho dhammo asekkhassa dhammassa upanissayapaccayena paccayo … purejātapaccayena paccayo.

Sekkho ca nevasekkhanāsekkho ca dhammā sekkhassa dhammassa sahajātaṁ, purejātaṁ.

Sekkho ca nevasekkhanāsekkho ca dhammā nevasekkhanāsekkhassa dhammassa sahajātaṁ, pacchājātaṁ, āhāraṁ, indriyaṁ.

Asekkho ca nevasekkhanāsekkho ca dhammā asekkhassa dhammassa sahajātaṁ, purejātaṁ.

Asekkho ca nevasekkhanāsekkho ca dhammā nevasekkhanāsekkhassa dhammassa sahajātaṁ, pacchājātaṁ, āhāraṁ, indriyaṁ.

1.12.7.2. Paccayapaccanīya

Saṅkhyāvāra

Suddha

Nahetuyā cuddasa, naārammaṇe naadhipatiyā naanantare nasamanantare cuddasa, nasahajāte dasa, naaññamaññe dasa, nanissaye dasa, naupanissaye terasa, napurejāte dvādasa, napacchājāte cuddasa, naāsevane nakamme cuddasa, navipāke dvādasa, naāhāre naindriye najhāne namagge cuddasa, nasampayutte dasa, navippayutte aṭṭha, noatthiyā aṭṭha, nonatthiyā cuddasa, novigate cuddasa, noavigate aṭṭha. (Evaṁ gaṇetabbaṁ.)

Paccanīyaṁ.

1.12.7.3. Paccayānulomapaccanīya

Hetuduka

Hetupaccayā naārammaṇe satta, naadhipatiyā satta, naanantare satta, nasamanantare satta, naaññamaññe tīṇi, naupanissaye napurejāte napacchājāte naāsevane nakamme satta, navipāke cattāri, naāhāre naindriye najhāne namagge satta, nasampayutte tīṇi, navippayutte tīṇi, nonatthiyā satta, novigate satta. (Evaṁ gaṇetabbaṁ.)

Anulomapaccanīyaṁ.

1.12.7.4. Paccayapaccanīyānuloma

Nahetuduka

Nahetupaccayā ārammaṇe pañca, adhipatiyā nava, anantare aṭṭha, samanantare aṭṭha, sahajāte nava, aññamaññe tīṇi, nissaye terasa, upanissaye aṭṭha, purejāte tīṇi, pacchājāte tīṇi, āsevane dve, kamme aṭṭha, vipāke āhāre indriye jhāne magge satta, sampayutte tīṇi, vippayutte pañca, atthiyā terasa, natthiyā aṭṭha, vigate aṭṭha, avigate terasa. (Evaṁ gaṇetabbaṁ.)

Paccanīyānulomaṁ.

Pañhāvāro.

Sekkhattikaṁ niṭṭhitaṁ.