上座部律藏犍度（巴利原文）

Theravāda Vinayapiṭaka

Mahāvagga

7. Kathinakkhandhaka

1. Kathinānujānana

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena tiṁsamattā pāveyyakā bhikkhū, sabbe āraññikā sabbe piṇḍapātikā sabbe paṁsukūlikā sabbe tecīvarikā sāvatthiṁ āgacchantā bhagavantaṁ dassanāya upakaṭṭhāya vassūpanāyikāya nāsakkhiṁsu sāvatthiyaṁ vassūpanāyikaṁ sambhāvetuṁ;

antarāmagge sākete vassaṁ upagacchiṁsu.

Te ukkaṇṭhitarūpā vassaṁ vasiṁsu—āsanneva no bhagavā viharati ito chasu yojanesu, na ca mayaṁ labhāma bhagavantaṁ dassanāyāti.

Atha kho te bhikkhū vassaṁvuṭṭhā, temāsaccayena katāya pavāraṇāya, deve vassante, udakasaṅgahe udakacikkhalle okapuṇṇehi cīvarehi kilantarūpā

yena sāvatthi jetavanaṁ anāthapiṇḍikassa ārāmo, yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu.

Āciṇṇaṁ kho panetaṁ buddhānaṁ bhagavantānaṁ āgantukehi bhikkhūhi saddhiṁ paṭisammodituṁ.

Atha kho bhagavā te bhikkhū etadavoca—

“kacci, bhikkhave, khamanīyaṁ, kacci yāpanīyaṁ,

kacci samaggā sammodamānā avivadamānā phāsukaṁ vassaṁ vasittha, na ca piṇḍakena kilamitthā”ti?

“Khamanīyaṁ, bhagavā, yāpanīyaṁ, bhagavā;

samaggā ca mayaṁ, bhante, sammodamānā avivadamānā vassaṁ vasimhā, na ca piṇḍakena kilamimhā.

Idha mayaṁ, bhante, tiṁsamattā pāveyyakā bhikkhū sāvatthiṁ āgacchantā bhagavantaṁ dassanāya upakaṭṭhāya vassūpanāyikāya nāsakkhimhā sāvatthiyaṁ vassūpanāyikaṁ sambhāvetuṁ, antarāmagge sākete vassaṁ upagacchimhā.

Te mayaṁ, bhante, ukkaṇṭhitarūpā vassaṁ vasimhā—

‘āsanneva no bhagavā viharati ito chasu yojanesu, na ca mayaṁ labhāma bhagavantaṁ dassanāyā’ti.

Atha kho mayaṁ, bhante, vassaṁvuṭṭhā, temāsaccayena katāya pavāraṇāya, deve vassante, udakasaṅgahe udakacikkhalle okapuṇṇehi cīvarehi kilantarūpā addhānaṁ āgatā”ti.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, vassaṁvuṭṭhānaṁ bhikkhūnaṁ kathinaṁ attharituṁ.

Atthatakathinānaṁ vo, bhikkhave, pañca kappissanti—

anāmantacāro, asamādānacāro, gaṇabhojanaṁ, yāvadatthacīvaraṁ, yo ca tattha cīvaruppādo so nesaṁ bhavissatīti.

Atthatakathinānaṁ vo, bhikkhave, imāni pañca kappissanti.

Evañca pana, bhikkhave, kathinaṁ attharitabbaṁ.

Byattena bhikkhunā paṭibalena saṅgho ñāpetabbo—

‘Suṇātu me, bhante, saṅgho.

Idaṁ saṅghassa kathinadussaṁ uppannaṁ.

Yadi saṅghassa pattakallaṁ, saṅgho imaṁ kathinadussaṁ itthannāmassa bhikkhuno dadeyya kathinaṁ attharituṁ.

Esā ñatti.

Suṇātu me, bhante, saṅgho.

Idaṁ saṅghassa kathinadussaṁ uppannaṁ.

Saṅgho imaṁ kathinadussaṁ itthannāmassa bhikkhuno deti kathinaṁ attharituṁ.

Yassāyasmato khamati imassa kathinadussassa itthannāmassa bhikkhuno dānaṁ kathinaṁ attharituṁ, so tuṇhassa;

yassa nakkhamati, so bhāseyya.

Dinnaṁ idaṁ saṅghena kathinadussaṁ itthannāmassa bhikkhuno kathinaṁ attharituṁ.

Khamati saṅghassa, tasmā tuṇhī, evametaṁ dhārayāmī’ti.

Evaṁ kho, bhikkhave, atthataṁ hoti kathinaṁ, evaṁ anatthataṁ.

Kathañca pana, bhikkhave, anatthataṁ hoti kathinaṁ?

Na ullikhitamattena atthataṁ hoti kathinaṁ,

na dhovanamattena atthataṁ hoti kathinaṁ,

na cīvaravicāraṇamattena atthataṁ hoti kathinaṁ,

na chedanamattena atthataṁ hoti kathinaṁ,

na bandhanamattena atthataṁ hoti kathinaṁ,

na ovaṭṭiyakaraṇamattena atthataṁ hoti kathinaṁ,

na kaṇḍusakaraṇamattena atthataṁ hoti kathinaṁ,

na daḷhīkammakaraṇamattena atthataṁ hoti kathinaṁ,

na anuvātakaraṇamattena atthataṁ hoti kathinaṁ,

na paribhaṇḍakaraṇamattena atthataṁ hoti kathinaṁ,

na ovaddheyyakaraṇamattena atthataṁ hoti kathinaṁ,

na kambalamaddanamattena atthataṁ hoti kathinaṁ,

na nimittakatena atthataṁ hoti kathinaṁ,

na parikathākatena atthataṁ hoti kathinaṁ,

na kukkukatena atthataṁ hoti kathinaṁ,

na sannidhikatena atthataṁ hoti kathinaṁ,

na nissaggiyena atthataṁ hoti kathinaṁ,

na akappakatena atthataṁ hoti kathinaṁ,

na aññatra saṅghāṭiyā atthataṁ hoti kathinaṁ,

na aññatra uttarāsaṅgena atthataṁ hoti kathinaṁ,

na aññatra antaravāsakena atthataṁ hoti kathinaṁ,

na aññatra pañcakena vā atirekapañcakena vā tadaheva sañchinnena samaṇḍalīkatena atthataṁ hoti kathinaṁ,

na aññatra puggalassa atthārā atthataṁ hoti kathinaṁ;

sammā ce atthataṁ hoti kathinaṁ, tañce nissīmaṭṭho anumodati, evampi anatthataṁ hoti kathinaṁ.

Evaṁ kho, bhikkhave, anatthataṁ hoti kathinaṁ.

Kathañca, bhikkhave, atthataṁ hoti kathinaṁ?

Ahatena atthataṁ hoti kathinaṁ, ahatakappena atthataṁ hoti kathinaṁ, pilotikāya atthataṁ hoti kathinaṁ, paṁsukūlena atthataṁ hoti kathinaṁ, pāpaṇikena atthataṁ hoti kathinaṁ, animittakatena atthataṁ hoti kathinaṁ, aparikathākatena atthataṁ hoti kathinaṁ, akukkukatena atthataṁ hoti kathinaṁ, asannidhikatena atthataṁ hoti kathinaṁ, anissaggiyena atthataṁ hoti kathinaṁ, kappakatena atthataṁ hoti kathinaṁ, saṅghāṭiyā atthataṁ hoti kathinaṁ, uttarāsaṅgena atthataṁ hoti kathinaṁ, antaravāsakena atthataṁ hoti kathinaṁ, pañcakena vā atirekapañcakena vā tadaheva sañchinnena samaṇḍalīkatena atthataṁ hoti kathinaṁ, puggalassa atthārā atthataṁ hoti kathinaṁ; sammā ce atthataṁ hoti kathinaṁ, tañce sīmaṭṭho anumodati, evampi atthataṁ hoti kathinaṁ.

Evaṁ kho, bhikkhave, atthataṁ hoti kathinaṁ.

Kathañca, bhikkhave, ubbhataṁ hoti kathinaṁ?

Aṭṭhimā, bhikkhave, mātikā kathinassa ubbhārāya—

pakkamanantikā, niṭṭhānantikā, sanniṭṭhānantikā, nāsanantikā, savanantikā, āsāvacchedikā, sīmātikkantikā, sahubbhārā”ti.

2. Ādāyasattaka

Bhikkhu atthatakathino katacīvaraṁ ādāya pakkamati—“na paccessan”ti.

Tassa bhikkhuno pakkamanantiko kathinuddhāro.

Bhikkhu atthatakathino cīvaraṁ ādāya pakkamati.

Tassa bahisīmagatassa evaṁ hoti—“idhevimaṁ cīvaraṁ kāressaṁ, na paccessan”ti.

So taṁ cīvaraṁ kāreti.

Tassa bhikkhuno niṭṭhānantiko kathinuddhāro.

Bhikkhu atthatakathino cīvaraṁ ādāya pakkamati.

Tassa bahisīmagatassa evaṁ hoti—“nevimaṁ cīvaraṁ kāressaṁ, na paccessan”ti.

Tassa bhikkhuno sanniṭṭhānantiko kathinuddhāro.

Bhikkhu atthatakathino cīvaraṁ ādāya pakkamati.

Tassa bahisīmagatassa evaṁ hoti—“idhevimaṁ cīvaraṁ kāressaṁ, na paccessan”ti.

So taṁ cīvaraṁ kāreti. Tassa taṁ cīvaraṁ kayiramānaṁ nassati.

Tassa bhikkhuno nāsanantiko kathinuddhāro.

Bhikkhu atthatakathino cīvaraṁ ādāya pakkamati—“paccessan”ti.

So bahisīmagato taṁ cīvaraṁ kāreti.

So katacīvaro suṇāti “ubbhataṁ kira tasmiṁ āvāse kathinan”ti.

Tassa bhikkhuno savanantiko kathinuddhāro.

Bhikkhu atthatakathino cīvaraṁ ādāya pakkamati—“paccessan”ti.

So bahisīmagato taṁ cīvaraṁ kāreti.

So katacīvaro—“paccessaṁ paccessan”ti—bahiddhā kathinuddhāraṁ vītināmeti.

Tassa bhikkhuno sīmātikkantiko kathinuddhāro.

Bhikkhu atthatakathino cīvaraṁ ādāya pakkamati—“paccessan”ti.

So bahisīmagato taṁ cīvaraṁ kāreti.

So katacīvaro—“paccessaṁ paccessan”ti—sambhuṇāti kathinuddhāraṁ.

Tassa bhikkhuno saha bhikkhūhi kathinuddhāro.

Ādāyasattakaṁ niṭṭhitaṁ.

3. Samādāyasattaka

Bhikkhu atthatakathino katacīvaraṁ samādāya pakkamati “na paccessan”ti.

Tassa bhikkhuno pakkamanantiko kathinuddhāro.

Bhikkhu atthatakathino cīvaraṁ samādāya pakkamati.

Tassa bahisīmagatassa evaṁ hoti—“idhevimaṁ cīvaraṁ kāressaṁ, na paccessan”ti.

So taṁ cīvaraṁ kāreti.

Tassa bhikkhuno niṭṭhānantiko kathinuddhāro.

Bhikkhu atthatakathino cīvaraṁ samādāya pakkamati.

Tassa bahisīmagatassa evaṁ hoti—“nevimaṁ cīvaraṁ kāressaṁ, na paccessan”ti.

Tassa bhikkhuno sanniṭṭhānantiko kathinuddhāro.

Bhikkhu atthatakathino cīvaraṁ samādāya pakkamati.

Tassa bahisīmagatassa evaṁ hoti—“idhevimaṁ cīvaraṁ kāressaṁ, na paccessan”ti.

So taṁ cīvaraṁ kāreti. Tassa taṁ cīvaraṁ kayiramānaṁ nassati.

Tassa bhikkhuno nāsanantiko kathinuddhāro.

Bhikkhu atthatakathino cīvaraṁ samādāya pakkamati—“paccessan”ti.

So bahisīmagato taṁ cīvaraṁ kāreti.

So katacīvaro suṇāti—“ubbhataṁ kira tasmiṁ āvāse kathinan”ti.

Tassa bhikkhuno savanantiko kathinuddhāro.

Bhikkhu atthatakathino cīvaraṁ samādāya pakkamati—“paccessan”ti.

So bahisīmagato taṁ cīvaraṁ kāreti.

So katacīvaro—“paccessaṁ paccessan”ti—bahiddhā kathinuddhāraṁ vītināmeti.

Tassa bhikkhuno sīmātikkantiko kathinuddhāro.