上座部律藏犍度（巴利原文）

Byattena bhikkhunā paṭibalena saṅgho ñāpetabbo—

‘Suṇātu me, bhante, saṅgho.

Ayaṁ itthannāmo bhikkhu saṅghena, pāpikāya diṭṭhiyā appaṭinissagge, ukkhepanīyakammakato sammā vattati, lomaṁ pāteti, netthāraṁ vattati, pāpikāya diṭṭhiyā appaṭinissagge, ukkhepanīyassa kammassa paṭippassaddhiṁ yācati.

Yadi saṅghassa pattakallaṁ, saṅgho itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṁ paṭippassambheyya.

Esā ñatti.

Suṇātu me, bhante, saṅgho.

Ayaṁ itthannāmo bhikkhu saṅghena, pāpikāya diṭṭhiyā appaṭinissagge, ukkhepanīyakammakato sammā vattati, lomaṁ pāteti, netthāraṁ vattati, pāpikāya diṭṭhiyā appaṭinissagge, ukkhepanīyassa kammassa paṭippassaddhiṁ yācati.

Saṅgho itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṁ paṭippassambheti.

Yassāyasmato khamati itthannāmassa bhikkhuno, pāpikāya diṭṭhiyā appaṭinissagge, ukkhepanīyassa kammassa paṭippassaddhi, so tuṇhassa;

yassa nakkhamati, so bhāseyya.

Dutiyampi etamatthaṁ vadāmi …pe…

tatiyampi etamatthaṁ vadāmi—

suṇātu me, bhante, saṅgho.

Ayaṁ itthannāmo bhikkhu saṅghena, pāpikāya diṭṭhiyā appaṭinissagge, ukkhepanīyakammakato sammā vattati, lomaṁ pāteti, netthāraṁ vattati, pāpikāya diṭṭhiyā appaṭinissagge ukkhepanīyassa kammassa paṭippassaddhiṁ yācati.

Saṅgho itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṁ paṭippassambheti.

Yassāyasmato khamati itthannāmassa bhikkhuno, pāpikāya diṭṭhiyā appaṭinissagge, ukkhepanīyassa kammassa paṭippassaddhi, so tuṇhassa;

yassa nakkhamati, so bhāseyya.

Paṭippassaddhaṁ saṅghena itthannāmassa bhikkhuno, pāpikāya diṭṭhiyā appaṭinissagge, ukkhepanīyakammaṁ.

Khamati saṅghassa, tasmā tuṇhī, evametaṁ dhārayāmī’”ti.

Pāpikāya diṭṭhiyā appaṭinissagge ukkhepanīyakammaṁ niṭṭhitaṁ sattamaṁ.

Kammakkhandhako paṭhamo. Imamhi khandhake vatthū satta.

Tassuddānaṁ

Paṇḍulohitakā bhikkhū,

sayaṁ bhaṇḍanakārakā;

Tādise upasaṅkamma,

ussahiṁsu ca bhaṇḍane.

Anuppannāpi jāyanti,

uppannānipi vaḍḍhare;

Appicchā pesalā bhikkhū,

ujjhāyanti padassato.

Saddhammaṭṭhitiko buddho,

sayambhū aggapuggalo;

Āṇāpesi tajjanīya,

kammaṁ sāvatthiyaṁ jino.

Asammukhāppaṭipucchāp-

paṭiññāya katañca yaṁ;

Anāpatti adesane,

desitāya katañca yaṁ.

Acodetvā asāretvā,

anāropetvā ca yaṁ kataṁ;

Asammukhā adhammena,

vaggena cāpi yaṁ kataṁ.

Appaṭipucchā adhammena,

puna vaggena yaṁ kataṁ;

Appaṭiññāya adhammena,

vaggena cāpi yaṁ kataṁ.

Anāpatti adhammena,

vaggena cāpi yaṁ kataṁ;

Adesanāgāminiyā,

adhammavaggameva ca.

Desitāya adhammena,

vaggenāpi tatheva ca;

Acodetvā adhammena,

vaggenāpi tatheva ca.

Asāretvā adhammena,

vaggenāpi tatheva ca;

Anāropetvā adhammena,

vaggenāpi tatheva ca.

Kaṇhavāranayeneva,

sukkavāraṁ vijāniyā;

Saṅgho ākaṅkhamāno ca,

yassa tajjanīyaṁ kare.

Bhaṇḍanaṁ bālo saṁsaṭṭho,

adhisīle ajjhācāre;

Atidiṭṭhivipannassa,

saṅgho tajjanīyaṁ kare.

Buddhadhammassa saṅghassa,

avaṇṇaṁ yo ca bhāsati;

Tiṇṇannampi ca bhikkhūnaṁ,

saṅgho tajjaniyaṁ kare.

Bhaṇḍanaṁ kārako eko,

bālo saṁsagganissito;

Adhisīle ajjhācāre,

tatheva atidiṭṭhiyā.

Buddhadhammassa saṅghassa,

avaṇṇaṁ yo ca bhāsati;

Tajjanīyakammakato,

evaṁ sammānuvattanā.

Upasampadanissayā,

sāmaṇeraṁ upaṭṭhanā;

Ovādasammatenāpi,

na kare tajjanīkato.

Nāpajje tañca āpattiṁ,

tādisañca tato paraṁ;

Kammañca kammike cāpi,

na garahe tathāvidho.

Uposathaṁ pavāraṇaṁ,

pakatattassa naṭṭhape;

Savacaniṁ anuvādo,

okāso codanena ca.

Sāraṇaṁ sampayogañca,

na kareyya tathāvidho;

Upasampadanissayā,

sāmaṇeraṁ upaṭṭhanā.

Ovādasammatenāpi,

pañcahaṅgehi na sammati;

Tañcāpajjati āpattiṁ,

tādisañca tato paraṁ.

Kammañca kammike cāpi,

garahanto na sammati;

Uposathaṁ pavāraṇaṁ,

savacanīyā ca novādo.

Okāso codanañceva,

sāraṇā sampayojanā;

Imehaṭṭhaṅgehi yo yutto,

tajjanānupasammati.

Kaṇhavāranayeneva,

sukkavāraṁ vijāniyā;

Bālo āpattibahulo,

saṁsaṭṭhopi ca seyyaso.

Niyassakammaṁ sambuddho,

āṇāpesi mahāmuni;

Kīṭāgirismiṁ dve bhikkhū,

assajipunabbasukā.

Anācārañca vividhaṁ,

ācariṁsu asaññatā;

Pabbājanīyaṁ sambuddho,

kammaṁ sāvatthiyaṁ jino;

Macchikāsaṇḍe sudhammo,

cittassāvāsiko ahu.