相应部第 1 相应

Saṁyutta Nikāya 1.23

3. Sattivagga

Jaṭāsutta

“Antojaṭā bahijaṭā,

Jaṭāya jaṭitā pajā;

Taṁ taṁ gotama pucchāmi,

Ko imaṁ vijaṭaye jaṭan”ti.

“Sīle patiṭṭhāya naro sapañño,

Cittaṁ paññañca bhāvayaṁ;

Ātāpī nipako bhikkhu,

So imaṁ vijaṭaye jaṭaṁ.

Yesaṁ rāgo ca doso ca,

avijjā ca virājitā;

Khīṇāsavā arahanto,

tesaṁ vijaṭitā jaṭā.

Yattha nāmañca rūpañca,

asesaṁ uparujjhati;

Paṭighaṁ rūpasaññā ca,

etthesā chijjate jaṭā”ti.