相应部第 1 相应

Saṁyutta Nikāya 1.81

8. Chetvāvagga

Araṇasutta

“Kesūdha araṇā loke,

kesaṁ vusitaṁ na nassati;

Kedha icchaṁ parijānanti,

kesaṁ bhojissiyaṁ sadā.

Kiṁsu mātā pitā bhātā,

vandanti naṁ patiṭṭhitaṁ;

Kiṁsu idha jātihīnaṁ,

abhivādenti khattiyā”ti.

“Samaṇīdha araṇā loke,

Samaṇānaṁ vusitaṁ na nassati;

Samaṇā icchaṁ parijānanti,

Samaṇānaṁ bhojissiyaṁ sadā.

Samaṇaṁ mātā pitā bhātā,

vandanti naṁ patiṭṭhitaṁ;

Samaṇīdha jātihīnaṁ,

abhivādenti khattiyā”ti.

Chetvāvaggo aṭṭhamo.

Tassuddānaṁ

Chetvā rathañca cittañca,

vuṭṭhi bhītā najīrati;

Issaraṁ kāmaṁ pātheyyaṁ,

pajjoto araṇena cāti.

Devatāsaṁyuttaṁ samattaṁ.