完整巴利原文 · 稳定分页 当前仅加载第 4 阅读页；保留 Bilara 原生段落标识，每页最多 120 段。
Saṁyutta Nikāya 13.4
sn13.4:0.11. Abhisamayavagga
sn13.4:0.2Dutiyasambhejjaudakasutta
sn13.4:0.3Sāvatthiyaṁ viharati.
sn13.4:1.1“Seyyathāpi, bhikkhave, yatthimā mahānadiyo saṁsandanti samenti, seyyathidaṁ—
sn13.4:1.2gaṅgā yamunā aciravatī sarabhū mahī, taṁ udakaṁ parikkhayaṁ pariyādānaṁ gaccheyya ṭhapetvā dve vā tīṇi vā udakaphusitāni.
sn13.4:1.3Taṁ kiṁ maññatha, bhikkhave,
sn13.4:1.4katamaṁ nu kho bahutaraṁ, yaṁ vā sambhejjaudakaṁ parikkhīṇaṁ pariyādiṇṇaṁ yāni vā dve vā tīṇi vā udakaphusitāni avasiṭṭhānī”ti?
sn13.4:1.5“Etadeva, bhante, bahutaraṁ sambhejjaudakaṁ yadidaṁ parikkhīṇaṁ pariyādiṇṇaṁ;
sn13.4:2.1appamattakāni dve vā tīṇi vā udakaphusitāni avasiṭṭhāni.
sn13.4:2.2Neva satimaṁ kalaṁ upenti na sahassimaṁ kalaṁ upenti na satasahassimaṁ kalaṁ upenti sambhejjaudakaṁ parikkhīṇaṁ pariyādiṇṇaṁ upanidhāya dve vā tīṇi vā udakaphusitāni avasiṭṭhānī”ti.
sn13.4:2.3“Evameva kho, bhikkhave …pe…
sn13.4:2.4dhammacakkhupaṭilābho”ti.
sn13.4:2.5Catutthaṁ.
sn13.4:2.6