完整巴利原文 · 稳定分页 当前仅加载第 10 阅读页；保留 Bilara 原生段落标识，每页最多 120 段。
Saṁyutta Nikāya 13.10
sn13.10:0.11. Abhisamayavagga
sn13.10:0.2Dutiyapabbatasutta
sn13.10:0.3Sāvatthiyaṁ viharati.
sn13.10:1.1“Seyyathāpi, bhikkhave, himavā pabbatarājā parikkhayaṁ pariyādānaṁ gaccheyya, ṭhapetvā satta sāsapamattiyo pāsāṇasakkharā.
sn13.10:1.2Taṁ kiṁ maññatha, bhikkhave,
sn13.10:1.3katamaṁ nu kho bahutaraṁ, yaṁ vā himavato pabbatarājassa parikkhīṇaṁ pariyādiṇṇaṁ yā vā satta sāsapamattiyo pāsāṇasakkharā avasiṭṭhā”ti?
sn13.10:1.4“Etadeva, bhante, bahutaraṁ himavato pabbatarājassa yadidaṁ parikkhīṇaṁ pariyādiṇṇaṁ;
sn13.10:2.1appamattikā satta sāsapamattiyo pāsāṇasakkharā avasiṭṭhā.
sn13.10:2.2Neva satimaṁ kalaṁ upenti na sahassimaṁ kalaṁ upenti na satasahassimaṁ kalaṁ upenti himavato pabbatarājassa parikkhīṇaṁ pariyādiṇṇaṁ upanidhāya satta sāsapamattiyo pāsāṇasakkharā avasiṭṭhā”ti.
sn13.10:2.3“Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṁ dukkhaṁ yadidaṁ parikkhīṇaṁ pariyādiṇṇaṁ;
sn13.10:3.1appamattakaṁ avasiṭṭhaṁ.
sn13.10:3.2Neva satimaṁ kalaṁ upeti na sahassimaṁ kalaṁ upeti na satasahassimaṁ kalaṁ upeti purimaṁ dukkhakkhandhaṁ parikkhīṇaṁ pariyādiṇṇaṁ upanidhāya yadidaṁ sattakkhattuṁparamatā.
sn13.10:3.3Evaṁ mahatthiyo kho, bhikkhave, dhammābhisamayo, evaṁ mahatthiyo dhammacakkhupaṭilābho”ti.
sn13.10:3.4Dasamaṁ.
sn13.10:3.5