相应部第 2 相应

Saṁyutta Nikāya 2.6

1. Paṭhamavagga

Kāmadasutta

Sāvatthinidānaṁ.

Ekamantaṁ ṭhito kho kāmado devaputto bhagavantaṁ etadavoca:

“dukkaraṁ, bhagavā, sudukkaraṁ, bhagavā”ti.

“Dukkaraṁ vāpi karonti,

(kāmadāti bhagavā)

Sekhā sīlasamāhitā;

Ṭhitattā anagāriyupetassa,

Tuṭṭhi hoti sukhāvahā”ti.

“Dullabhā, bhagavā, yadidaṁ tuṭṭhī”ti.

“Dullabhaṁ vāpi labhanti,

(kāmadāti bhagavā)

Cittavūpasame ratā;

Yesaṁ divā ca ratto ca,

Bhāvanāya rato mano”ti.

“Dussamādahaṁ, bhagavā, yadidaṁ cittan”ti.

“Dussamādahaṁ vāpi samādahanti,

(kāmadāti bhagavā)

Indriyūpasame ratā;

Te chetvā maccuno jālaṁ,

Ariyā gacchanti kāmadā”ti.

“Duggamo, bhagavā, visamo maggo”ti.

“Duggame visame vāpi,

Ariyā gacchanti kāmada;

Anariyā visame magge,

Papatanti avaṁsirā;

Ariyānaṁ samo maggo,

Ariyā hi visame samā”ti.