相应部第 2 相应

Saṁyutta Nikāya 2.14

2. Anāthapiṇḍikavagga

Nandanasutta

Ekamantaṁ ṭhito kho nandano devaputto bhagavantaṁ gāthāya ajjhabhāsi:

“Pucchāmi taṁ gotama bhūripañña,

Anāvaṭaṁ bhagavato ñāṇadassanaṁ;

Kathaṁvidhaṁ sīlavantaṁ vadanti,

Kathaṁvidhaṁ paññavantaṁ vadanti;

Kathaṁvidho dukkhamaticca iriyati,

Kathaṁvidhaṁ devatā pūjayantī”ti.

“Yo sīlavā paññavā bhāvitatto,

Samāhito jhānarato satīmā;

Sabbassa sokā vigatā pahīnā,

Khīṇāsavo antimadehadhārī.

Tathāvidhaṁ sīlavantaṁ vadanti,

Tathāvidhaṁ paññavantaṁ vadanti;

Tathāvidho dukkhamaticca iriyati,

Tathāvidhaṁ devatā pūjayantī”ti.