完整巴利原文 · 稳定分页 当前仅加载第 7 阅读页；保留 Bilara 原生段落标识，每页最多 120 段。
Saṁyutta Nikāya 36.7
sn36.7:0.11. Sagāthāvagga
sn36.7:0.2Paṭhamagelaññasutta
sn36.7:0.3Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
sn36.7:1.1Atha kho bhagavā sāyanhasamayaṁ paṭisallānā vuṭṭhito yena gilānasālā tenupasaṅkami; upasaṅkamitvā paññatte āsane nisīdi.
sn36.7:1.2Nisajja kho bhagavā bhikkhū āmantesi:
sn36.7:1.3“Sato, bhikkhave, bhikkhu sampajāno kālaṁ āgameyya.
sn36.7:2.1Ayaṁ vo amhākaṁ anusāsanī.
sn36.7:2.2Kathañca, bhikkhave, bhikkhu sato hoti?
sn36.7:3.1Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ;
sn36.7:3.2vedanāsu vedanānupassī viharati …pe…
sn36.7:3.3citte cittānupassī viharati …pe…
sn36.7:3.4dhammesu dhammānupassī viharati ātāpī sampajāno satimā, vineyya loke abhijjhādomanassaṁ.
sn36.7:3.5Evaṁ kho, bhikkhave, bhikkhu sato hoti.
sn36.7:3.6Kathañca, bhikkhave, bhikkhu sampajāno hoti?
sn36.7:4.1Idha, bhikkhave, bhikkhu abhikkante paṭikkante sampajānakārī hoti, ālokite vilokite sampajānakārī hoti, samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti.
sn36.7:4.2Evaṁ kho, bhikkhave, bhikkhu sampajānakārī hoti.
sn36.7:4.3Sato, bhikkhave, bhikkhu sampajāno kālaṁ āgameyya.
sn36.7:4.4Ayaṁ vo amhākaṁ anusāsanī.
sn36.7:4.5Tassa ce, bhikkhave, bhikkhuno evaṁ satassa sampajānassa appamattassa ātāpino pahitattassa viharato uppajjati sukhā vedanā, so evaṁ pajānāti:
sn36.7:5.1‘uppannā kho myāyaṁ sukhā vedanā.
sn36.7:5.2Sā ca kho paṭicca, no appaṭicca.
sn36.7:5.3Kiṁ paṭicca?
sn36.7:5.4Imameva kāyaṁ paṭicca.
sn36.7:5.5Ayaṁ kho pana kāyo anicco saṅkhato paṭiccasamuppanno.
sn36.7:5.6Aniccaṁ kho pana saṅkhataṁ paṭiccasamuppannaṁ kāyaṁ paṭicca uppannā sukhā vedanā kuto niccā bhavissatī’ti.
sn36.7:5.7So kāye ca sukhāya ca vedanāya aniccānupassī viharati, vayānupassī viharati, virāgānupassī viharati, nirodhānupassī viharati, paṭinissaggānupassī viharati.
sn36.7:5.8Tassa kāye ca sukhāya ca vedanāya aniccānupassino viharato, vayānupassino viharato, virāgānupassino viharato, nirodhānupassino viharato, paṭinissaggānupassino viharato, yo kāye ca sukhāya ca vedanāya rāgānusayo, so pahīyati.
sn36.7:5.9Tassa ce, bhikkhave, bhikkhuno evaṁ satassa sampajānassa appamattassa ātāpino pahitattassa viharato uppajjati dukkhā vedanā.
sn36.7:6.1So evaṁ pajānāti:
sn36.7:6.2‘uppannā kho myāyaṁ dukkhā vedanā.
sn36.7:6.3Sā ca kho paṭicca, no appaṭicca.
sn36.7:6.4Kiṁ paṭicca?
sn36.7:6.5Imameva kāyaṁ paṭicca.
sn36.7:6.6Ayaṁ kho pana kāyo anicco saṅkhato paṭiccasamuppanno.
sn36.7:6.7Aniccaṁ kho pana saṅkhataṁ paṭiccasamuppannaṁ kāyaṁ paṭicca uppannā dukkhā vedanā kuto niccā bhavissatī’ti.
sn36.7:6.8So kāye ca dukkhāya ca vedanāya aniccānupassī viharati, vayānupassī viharati, virāgānupassī viharati, nirodhānupassī viharati, paṭinissaggānupassī viharati.
sn36.7:6.9Tassa kāye ca dukkhāya ca vedanāya aniccānupassino viharato …pe… paṭinissaggānupassino viharato, yo kāye ca dukkhāya ca vedanāya paṭighānusayo, so pahīyati.
sn36.7:6.10Tassa ce, bhikkhave, bhikkhuno evaṁ satassa sampajānassa appamattassa ātāpino pahitattassa viharato uppajjati adukkhamasukhā vedanā, so evaṁ pajānāti:
sn36.7:7.1‘uppannā kho myāyaṁ adukkhamasukhā vedanā.
sn36.7:7.2Sā ca kho paṭicca, no appaṭicca.
sn36.7:7.3Kiṁ paṭicca?
sn36.7:7.4Imameva kāyaṁ paṭicca.
sn36.7:7.5Ayaṁ kho pana kāyo anicco saṅkhato paṭiccasamuppanno.
sn36.7:7.6Aniccaṁ kho pana saṅkhataṁ paṭiccasamuppannaṁ kāyaṁ paṭicca uppannā adukkhamasukhā vedanā kuto niccā bhavissatī’ti.
sn36.7:7.7So kāye ca adukkhamasukhāya ca vedanāya aniccānupassī viharati, vayānupassī viharati, virāgānupassī viharati, nirodhānupassī viharati, paṭinissaggānupassī viharati.
sn36.7:7.8Tassa kāye ca adukkhamasukhāya ca vedanāya aniccānupassino viharato …pe… paṭinissaggānupassino viharato, yo kāye ca adukkhamasukhāya ca vedanāya avijjānusayo, so pahīyati.
sn36.7:7.9So sukhañce vedanaṁ vedayati, sā aniccāti pajānāti, anajjhositāti pajānāti, anabhinanditāti pajānāti;
sn36.7:8.1dukkhañce vedanaṁ vedayati …pe…
sn36.7:8.2adukkhamasukhañce vedanaṁ vedayati, sā aniccāti pajānāti, anajjhositāti pajānāti, anabhinanditāti pajānāti.
sn36.7:8.3So sukhañce vedanaṁ vedayati, visaññutto naṁ vedayati;
sn36.7:8.4dukkhañce vedanaṁ vedayati, visaññutto naṁ vedayati;
sn36.7:8.5adukkhamasukhañce vedanaṁ vedayati, visaññutto naṁ vedayati.
sn36.7:8.6So kāyapariyantikaṁ vedanaṁ vedayamāno ‘kāyapariyantikaṁ vedanaṁ vedayāmī’ti pajānāti, jīvitapariyantikaṁ vedanaṁ vedayamāno ‘jīvitapariyantikaṁ vedanaṁ vedayāmī’ti pajānāti.
sn36.7:8.7‘Kāyassa bhedā uddhaṁ jīvitapariyādānā idheva sabbavedayitāni anabhinanditāni sītībhavissantī’ti pajānāti.
sn36.7:8.8Seyyathāpi, bhikkhave, telañca paṭicca vaṭṭiñca paṭicca telappadīpo jhāyeyya,
sn36.7:9.1tasseva telassa ca vaṭṭiyā ca pariyādānā anāhāro nibbāyeyya;
sn36.7:9.2evameva kho, bhikkhave, bhikkhu kāyapariyantikaṁ vedanaṁ vedayamāno ‘kāyapariyantikaṁ vedanaṁ vedayāmī’ti pajānāti. Jīvitapariyantikaṁ vedanaṁ vedayamāno ‘jīvitapariyantikaṁ vedanaṁ vedayāmī’ti pajānāti.
sn36.7:9.3‘Kāyassa bhedā uddhaṁ jīvitapariyādānā idheva sabbavedayitāni anabhinanditāni sītībhavissantī’ti pajānātī”ti.
sn36.7:9.4Sattamaṁ.
sn36.7:9.5