Saṁyutta Nikāya 41 · SN41.6 · Dutiyakāmabhūsutta

完整巴利原文 · 稳定分页　当前仅加载第 6 阅读页；保留 Bilara 原生段落标识，每页最多 120 段。

0.1

Saṁyutta Nikāya 41.6

sn41.6:0.1

0.2

1. Cittavagga

sn41.6:0.2

0.3

Dutiyakāmabhūsutta

sn41.6:0.3

1.1

Ekaṁ samayaṁ āyasmā kāmabhū macchikāsaṇḍe viharati ambāṭakavane.

sn41.6:1.1

1.2

Atha kho citto gahapati yenāyasmā kāmabhū tenupasaṅkami; upasaṅkamitvā ekamantaṁ nisīdi. Ekamantaṁ nisinno kho citto gahapati āyasmantaṁ kāmabhuṁ etadavoca:

sn41.6:1.2

1.3

“kati nu kho, bhante, saṅkhārā”ti?

sn41.6:1.3

1.4

“Tayo kho, gahapati, saṅkhārā—

sn41.6:1.4

1.5

kāyasaṅkhāro, vacīsaṅkhāro, cittasaṅkhāro”ti.

sn41.6:1.5

1.6

“Sādhu, bhante”ti kho citto gahapati āyasmato kāmabhussa bhāsitaṁ abhinanditvā anumoditvā āyasmantaṁ kāmabhuṁ uttariṁ pañhaṁ apucchi:

sn41.6:1.6

1.7

“katamo pana, bhante, kāyasaṅkhāro, katamo vacīsaṅkhāro, katamo cittasaṅkhāro”ti?

sn41.6:1.7

1.8

“Assāsapassāsā kho, gahapati, kāyasaṅkhāro, vitakkavicārā vacīsaṅkhāro, saññā ca vedanā ca cittasaṅkhāro”ti.

sn41.6:1.8

2.1

“Sādhu, bhante”ti kho citto gahapati …pe… uttariṁ pañhaṁ apucchi:

sn41.6:2.1

2.2

“kasmā pana, bhante, assāsapassāsā kāyasaṅkhāro, kasmā vitakkavicārā vacīsaṅkhāro, kasmā saññā ca vedanā ca cittasaṅkhāro”ti?

sn41.6:2.2

2.3

“Assāsapassāsā kho, gahapati, kāyikā. Ete dhammā kāyappaṭibaddhā, tasmā assāsapassāsā kāyasaṅkhāro.

sn41.6:2.3

2.4

Pubbe kho, gahapati, vitakketvā vicāretvā pacchā vācaṁ bhindati, tasmā vitakkavicārā vacīsaṅkhāro.

sn41.6:2.4

2.5

Saññā ca vedanā ca cetasikā. Ete dhammā cittappaṭibaddhā, tasmā saññā ca vedanā ca cittasaṅkhāro”ti.

sn41.6:2.5

3.1

“Sādhu …pe… uttariṁ pañhaṁ apucchi:

sn41.6:3.1

3.2

“kathaṁ pana, bhante, saññāvedayitanirodhasamāpatti hotī”ti?

sn41.6:3.2

3.3

“Na kho, gahapati, saññāvedayitanirodhaṁ samāpajjantassa bhikkhuno evaṁ hoti:

sn41.6:3.3

3.4

‘ahaṁ saññāvedayitanirodhaṁ samāpajjissan’ti vā ‘ahaṁ saññāvedayitanirodhaṁ samāpajjāmī’ti vā ‘ahaṁ saññāvedayitanirodhaṁ samāpanno’ti vā.

sn41.6:3.4

3.5

Atha khvassa pubbeva tathā cittaṁ bhāvitaṁ hoti yaṁ taṁ tathattāya upanetī”ti.

sn41.6:3.5

4.1

“Sādhu …pe… uttariṁ pañhaṁ apucchi:

sn41.6:4.1

4.2

“saññāvedayitanirodhaṁ samāpajjantassa pana, bhante, bhikkhuno katame dhammā paṭhamaṁ nirujjhanti, yadi vā kāyasaṅkhāro, yadi vā vacīsaṅkhāro, yadi vā cittasaṅkhāro”ti?

sn41.6:4.2

4.3

“Saññāvedayitanirodhaṁ samāpajjantassa kho, gahapati, bhikkhuno vacīsaṅkhāro paṭhamaṁ nirujjhati, tato kāyasaṅkhāro, tato cittasaṅkhāro”ti.

sn41.6:4.3

5.1

“Sādhu …pe… uttariṁ pañhaṁ apucchi:

sn41.6:5.1

5.2

“yvāyaṁ, bhante, mato kālaṅkato, yo cāyaṁ bhikkhu saññāvedayitanirodhaṁ samāpanno, imesaṁ kiṁ nānākaraṇan”ti?

sn41.6:5.2

5.3

“Yvāyaṁ, gahapati, mato kālaṅkato tassa kāyasaṅkhāro niruddho paṭippassaddho, vacīsaṅkhāro niruddho paṭippassaddho, cittasaṅkhāro niruddho paṭippassaddho, āyu parikkhīṇo, usmā vūpasantā, indriyāni viparibhinnāni.

sn41.6:5.3

5.4

Yo ca khvāyaṁ, gahapati, bhikkhu saññāvedayitanirodhaṁ samāpanno, tassapi kāyasaṅkhāro niruddho paṭippassaddho, vacīsaṅkhāro niruddho paṭippassaddho, cittasaṅkhāro niruddho paṭippassaddho, āyu aparikkhīṇo, usmā avūpasantā, indriyāni vippasannāni.

sn41.6:5.4

5.5

Yvāyaṁ, gahapati, mato kālaṅkato, yo cāyaṁ bhikkhu saññāvedayitanirodhaṁ samāpanno, idaṁ nesaṁ nānākaraṇan”ti.

sn41.6:5.5

6.1

“Sādhu …pe… uttariṁ pañhaṁ apucchi:

sn41.6:6.1

6.2

“kathaṁ pana, bhante, saññāvedayitanirodhasamāpattiyā vuṭṭhānaṁ hotī”ti?

sn41.6:6.2

6.3

“Na kho, gahapati, saññāvedayitanirodhasamāpattiyā vuṭṭhahantassa bhikkhuno evaṁ hoti:

sn41.6:6.3

6.4

‘ahaṁ saññāvedayitanirodhasamāpattiyā vuṭṭhahissan’ti vā ‘ahaṁ saññāvedayitanirodhasamāpattiyā vuṭṭhahāmī’ti vā ‘ahaṁ saññāvedayitanirodhasamāpattiyā vuṭṭhito’ti vā.

sn41.6:6.4

6.5

Atha khvassa pubbeva tathā cittaṁ bhāvitaṁ hoti, yaṁ taṁ tathattāya upanetī”ti.

sn41.6:6.5

7.1

“Sādhu, bhante …pe… uttariṁ pañhaṁ apucchi:

sn41.6:7.1

7.2

“saññāvedayitanirodhasamāpattiyā vuṭṭhahantassa pana, bhante, bhikkhuno katame dhammā paṭhamaṁ uppajjanti, yadi vā kāyasaṅkhāro, yadi vā vacīsaṅkhāro, yadi vā cittasaṅkhāro”ti?

sn41.6:7.2

7.3

“Saññāvedayitanirodhasamāpattiyā vuṭṭhahantassa, gahapati, bhikkhuno cittasaṅkhāro paṭhamaṁ uppajjati, tato kāyasaṅkhāro, tato vacīsaṅkhāro”ti.

sn41.6:7.3

8.1

“Sādhu …pe… uttariṁ pañhaṁ apucchi:

sn41.6:8.1

8.2

“saññāvedayitanirodhasamāpattiyā vuṭṭhitaṁ pana, bhante, bhikkhuṁ kati phassā phusanti”?

sn41.6:8.2

8.3

“Saññāvedayitanirodhasamāpattiyā vuṭṭhitaṁ kho, gahapati, bhikkhuṁ tayo phassā phusanti—

sn41.6:8.3

8.4

suññato phasso, animitto phasso, appaṇihito phasso”ti.

sn41.6:8.4

9.1

“Sādhu …pe… uttariṁ pañhaṁ apucchi:

sn41.6:9.1

9.2

“saññāvedayitanirodhasamāpattiyā vuṭṭhitassa pana, bhante, bhikkhuno kiṁninnaṁ cittaṁ hoti, kiṁpoṇaṁ, kiṁpabbhāran”ti?

sn41.6:9.2

9.3

“Saññāvedayitanirodhasamāpattiyā vuṭṭhitassa kho, gahapati, bhikkhuno vivekaninnaṁ cittaṁ hoti vivekapoṇaṁ vivekapabbhāran”ti.

sn41.6:9.3

10.1

“Sādhu, bhante”ti kho citto gahapati āyasmato kāmabhussa bhāsitaṁ abhinanditvā anumoditvā āyasmantaṁ kāmabhuṁ uttariṁ pañhaṁ apucchi:

sn41.6:10.1

10.2

“saññāvedayitanirodhasamāpattiyā pana, bhante, kati dhammā bahūpakārā”ti?

sn41.6:10.2

10.3

“Addhā kho tvaṁ, gahapati, yaṁ paṭhamaṁ pucchitabbaṁ taṁ pucchasi.

sn41.6:10.3

10.4

Api ca tyāhaṁ byākarissāmi.

sn41.6:10.4

10.5

Saññāvedayitanirodhasamāpattiyā kho, gahapati, dve dhammā bahūpakārā—

sn41.6:10.5

10.6

samatho ca vipassanā cā”ti.

sn41.6:10.6

10.7

Chaṭṭhaṁ.

sn41.6:10.7