完整巴利原文 · 稳定分页 当前仅加载第 7 阅读页；保留 Bilara 原生段落标识，每页最多 120 段。
Saṁyutta Nikāya 41.7
sn41.7:0.11. Cittavagga
sn41.7:0.2Godattasutta
sn41.7:0.3Ekaṁ samayaṁ āyasmā godatto macchikāsaṇḍe viharati ambāṭakavane.
sn41.7:1.1Atha kho citto gahapati yenāyasmā godatto tenupasaṅkami; upasaṅkamitvā āyasmantaṁ godattaṁ abhivādetvā ekamantaṁ nisīdi. Ekamantaṁ nisinnaṁ kho cittaṁ gahapatiṁ āyasmā godatto etadavoca:
sn41.7:1.2“yā cāyaṁ, gahapati, appamāṇā cetovimutti, yā ca ākiñcaññā cetovimutti, yā ca suññatā cetovimutti, yā ca animittā cetovimutti, ime dhammā nānatthā nānābyañjanā udāhu ekatthā byañjanameva nānan”ti?
sn41.7:1.3“Atthi, bhante, pariyāyo yaṁ pariyāyaṁ āgamma ime dhammā nānatthā ceva nānābyañjanā ca.
sn41.7:1.4Atthi pana, bhante, pariyāyo yaṁ pariyāyaṁ āgamma ime dhammā ekatthā byañjanameva nānan”ti.
sn41.7:1.5“Katamo ca, bhante, pariyāyo yaṁ pariyāyaṁ āgamma ime dhammā nānatthā ceva nānābyañjanā ca?
sn41.7:2.1Idha, bhante, bhikkhu mettāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.
sn41.7:2.2Karuṇāsahagatena cetasā …pe…
sn41.7:2.3muditāsahagatena cetasā …pe…
sn41.7:2.4upekkhāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
sn41.7:2.5Ayaṁ vuccati, bhante, appamāṇā cetovimutti.
sn41.7:2.6Katamā ca, bhante, ākiñcaññā cetovimutti?
sn41.7:3.1Idha, bhante, bhikkhu sabbaso viññāṇañcāyatanaṁ samatikkamma, ‘natthi kiñcī’ti ākiñcaññāyatanaṁ upasampajja viharati.
sn41.7:3.2Ayaṁ vuccati, bhante, ākiñcaññā cetovimutti.
sn41.7:3.3Katamā ca, bhante, suññatā cetovimutti?
sn41.7:4.1Idha, bhante, bhikkhu araññagato vā rukkhamūlagato vā suññāgāragato vā iti paṭisañcikkhati:
sn41.7:4.2‘suññamidaṁ attena vā attaniyena vā’ti.
sn41.7:4.3Ayaṁ vuccati, bhante, suññatā cetovimutti.
sn41.7:4.4Katamā ca, bhante, animittā cetovimutti?
sn41.7:5.1Idha, bhante, bhikkhu sabbanimittānaṁ amanasikārā animittaṁ cetosamādhiṁ upasampajja viharati.
sn41.7:5.2Ayaṁ vuccati, bhante, animittā cetovimutti.
sn41.7:5.3Ayaṁ kho, bhante, pariyāyo yaṁ pariyāyaṁ āgamma ime dhammā nānatthā ceva nānābyañjanā ca.
sn41.7:5.4Katamo ca, bhante, pariyāyo yaṁ pariyāyaṁ āgamma ime dhammā ekatthā byañjanameva nānaṁ?
sn41.7:6.1Rāgo, bhante, pamāṇakaraṇo, doso pamāṇakaraṇo, moho pamāṇakaraṇo.
sn41.7:6.2Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
sn41.7:6.3Yāvatā kho, bhante, appamāṇā cetovimuttiyo, akuppā tāsaṁ cetovimutti aggamakkhāyati.
sn41.7:6.4Sā kho pana akuppā cetovimutti suññā rāgena, suññā dosena, suññā mohena.
sn41.7:6.5Rāgo kho, bhante, kiñcanaṁ, doso kiñcanaṁ, moho kiñcanaṁ.
sn41.7:6.6Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
sn41.7:6.7Yāvatā kho, bhante, ākiñcaññā cetovimuttiyo, akuppā tāsaṁ cetovimutti aggamakkhāyati.
sn41.7:6.8Sā kho pana akuppā cetovimutti suññā rāgena, suññā dosena, suññā mohena.
sn41.7:6.9Rāgo kho, bhante, nimittakaraṇo, doso nimittakaraṇo, moho nimittakaraṇo.
sn41.7:6.10Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.
sn41.7:6.11Yāvatā kho, bhante, animittā cetovimuttiyo, akuppā tāsaṁ cetovimutti aggamakkhāyati.
sn41.7:6.12Sā kho pana akuppā cetovimutti suññā rāgena, suññā dosena, suññā mohena.
sn41.7:6.13Ayaṁ kho, bhante, pariyāyo yaṁ pariyāyaṁ āgamma ime dhammā ekatthā byañjanameva nānan”ti.
sn41.7:6.14“Lābhā te, gahapati, suladdhaṁ te, gahapati.
sn41.7:6.15Yassa te gambhīre buddhavacane paññācakkhu kamatī”ti.
sn41.7:6.16Sattamaṁ.
sn41.7:6.17