完整巴利原文 · 稳定分页 当前仅加载第 9 阅读页；保留 Bilara 原生段落标识，每页最多 120 段。
Saṁyutta Nikāya 44.9
sn44.9:0.11. Abyākatavagga
sn44.9:0.2Kutūhalasālāsutta
sn44.9:0.3Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
sn44.9:1.1Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako bhagavantaṁ etadavoca:
sn44.9:1.2“Purimāni, bho gotama, divasāni purimatarāni sambahulānaṁ nānātitthiyānaṁ samaṇabrāhmaṇānaṁ paribbājakānaṁ kutūhalasālāyaṁ sannisinnānaṁ sannipatitānaṁ ayamantarākathā udapādi:
sn44.9:2.1‘ayaṁ kho pūraṇo kassapo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa.
sn44.9:2.2Sopi sāvakaṁ abbhatītaṁ kālaṅkataṁ upapattīsu byākaroti:
sn44.9:2.3“asu amutra upapanno, asu amutra upapanno”ti.
sn44.9:2.4Yopissa sāvako uttamapuriso paramapuriso paramapattipatto tampi sāvakaṁ abbhatītaṁ kālaṅkataṁ upapattīsu byākaroti:
sn44.9:2.5“asu amutra upapanno, asu amutra upapanno”ti.
sn44.9:2.6Ayampi kho makkhali gosālo …pe…
sn44.9:3.1ayampi kho nigaṇṭho nāṭaputto …pe…
sn44.9:3.2ayampi kho sañcayo belaṭṭhaputto …pe…
sn44.9:3.3ayampi kho pakudho kaccāno …pe…
sn44.9:3.4ayampi kho ajito kesakambalo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa.
sn44.9:3.5Sopi sāvakaṁ abbhatītaṁ kālaṅkataṁ upapattīsu byākaroti:
sn44.9:3.6“asu amutra upapanno, asu amutra upapanno”ti.
sn44.9:3.7Yopissa sāvako uttamapuriso paramapuriso paramapattipatto tampi sāvakaṁ abbhatītaṁ kālaṅkataṁ upapattīsu byākaroti:
sn44.9:3.8“asu amutra upapanno, asu amutra upapanno”ti.
sn44.9:3.9Ayampi kho samaṇo gotamo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa.
sn44.9:4.1Sopi sāvakaṁ abbhatītaṁ kālaṅkataṁ upapattīsu byākaroti:
sn44.9:4.2“asu amutra upapanno, asu amutra upapanno”ti.
sn44.9:4.3Yopissa sāvako uttamapuriso paramapuriso paramapattipatto tañca sāvakaṁ abbhatītaṁ kālaṅkataṁ upapattīsu na byākaroti:
sn44.9:4.4“asu amutra upapanno, asu amutra upapanno”ti.
sn44.9:4.5Api ca kho naṁ evaṁ byākaroti:
sn44.9:4.6“acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”’ti.
sn44.9:4.7Tassa mayhaṁ, bho gotama, ahu deva kaṅkhā, ahu vicikicchā:
sn44.9:4.8‘kathaṁ nāma samaṇassa gotamassa dhammo abhiññeyyo’”ti?
sn44.9:4.9“Alañhi te, vaccha, kaṅkhituṁ, alaṁ vicikicchituṁ.
sn44.9:5.1Kaṅkhanīye ca pana te ṭhāne vicikicchā uppannā.
sn44.9:5.2Saupādānassa khvāhaṁ, vaccha, upapattiṁ paññāpemi no anupādānassa.
sn44.9:5.3Seyyathāpi, vaccha, aggi saupādāno jalati, no anupādāno;
sn44.9:5.4evameva khvāhaṁ, vaccha, saupādānassa upapattiṁ paññāpemi, no anupādānassā”ti.
sn44.9:5.5“Yasmiṁ, bho gotama, samaye acci vātena khittā dūrampi gacchati, imassa pana bhavaṁ gotamo kiṁ upādānasmiṁ paññāpetī”ti?
sn44.9:6.1“Yasmiṁ kho, vaccha, samaye acci vātena khittā dūrampi gacchati, tamahaṁ vātūpādānaṁ paññāpemi.
sn44.9:6.2Vāto hissa, vaccha, tasmiṁ samaye upādānaṁ hotī”ti.
sn44.9:6.3“Yasmiñca pana, bho gotama, samaye imañca kāyaṁ nikkhipati, satto ca aññataraṁ kāyaṁ anupapanno hoti, imassa pana bhavaṁ gotamo kiṁ upādānasmiṁ paññāpetī”ti?
sn44.9:6.4“Yasmiṁ kho, vaccha, samaye imañca kāyaṁ nikkhipati, satto ca aññataraṁ kāyaṁ anupapanno hoti, tamahaṁ taṇhūpādānaṁ vadāmi.
sn44.9:6.5Taṇhā hissa, vaccha, tasmiṁ samaye upādānaṁ hotī”ti.
sn44.9:6.6Navamaṁ.
sn44.9:6.7