完整巴利原文 · 稳定分页 当前仅加载第 10 阅读页；保留 Bilara 原生段落标识，每页最多 120 段。
Saṁyutta Nikāya 44.10
sn44.10:0.11. Abyākatavagga
sn44.10:0.2Ānandasutta
sn44.10:0.3Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṁ sammodi.
sn44.10:1.1Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho vacchagotto paribbājako bhagavantaṁ etadavoca:
sn44.10:1.2“kiṁ nu kho, bho gotama, atthattā”ti?
sn44.10:1.3Evaṁ vutte, bhagavā tuṇhī ahosi.
sn44.10:1.4“Kiṁ pana, bho gotama, natthattā”ti?
sn44.10:1.5Dutiyampi kho bhagavā tuṇhī ahosi.
sn44.10:1.6Atha kho vacchagotto paribbājako uṭṭhāyāsanā pakkāmi.
sn44.10:1.7Atha kho āyasmā ānando acirapakkante vacchagotte paribbājake bhagavantaṁ etadavoca:
sn44.10:2.1“kiṁ nu kho, bhante, bhagavā vacchagottassa paribbājakassa pañhaṁ puṭṭho na byākāsī”ti?
sn44.10:2.2“Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṁ, ye te, ānanda, samaṇabrāhmaṇā sassatavādā tesametaṁ saddhiṁ abhavissa.
sn44.10:2.3Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṁ, ye te, ānanda, samaṇabrāhmaṇā ucchedavādā tesametaṁ saddhiṁ abhavissa.
sn44.10:2.4Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṁ, api nu me taṁ, ānanda, anulomaṁ abhavissa ñāṇassa uppādāya:
sn44.10:2.5‘sabbe dhammā anattā’”ti?
sn44.10:2.6“No hetaṁ, bhante”.
sn44.10:2.7“Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṁ, sammūḷhassa, ānanda, vacchagottassa paribbājakassa bhiyyo sammohāya abhavissa:
sn44.10:2.8‘ahuvā me nūna pubbe attā, so etarahi natthī’”ti.
sn44.10:2.9Dasamaṁ.
sn44.10:2.10