完整巴利原文 · 稳定分页 当前仅加载第 11 阅读页；保留 Bilara 原生段落标识，每页最多 120 段。
Saṁyutta Nikāya 48.11
sn48.11:0.12. Mudutaravagga
sn48.11:0.2Paṭilābhasutta
sn48.11:0.3“Pañcimāni, bhikkhave, indriyāni.
sn48.11:1.1Katamāni pañca?
sn48.11:1.2Saddhindriyaṁ …pe… paññindriyaṁ …pe….
sn48.11:1.3Katamañca, bhikkhave, saddhindriyaṁ?
sn48.11:1.4Idha, bhikkhave, ariyasāvako saddho hoti, saddahati tathāgatassa bodhiṁ:
sn48.11:1.5‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti—
sn48.11:1.6idaṁ vuccati, bhikkhave, saddhindriyaṁ.
sn48.11:1.7Katamañca, bhikkhave, vīriyindriyaṁ?
sn48.11:2.1Yaṁ kho, bhikkhave, cattāro sammappadhāne ārabbha vīriyaṁ paṭilabhati—
sn48.11:2.2idaṁ vuccati, bhikkhave, vīriyindriyaṁ.
sn48.11:2.3Katamañca, bhikkhave, satindriyaṁ?
sn48.11:3.1Yaṁ kho, bhikkhave, cattāro satipaṭṭhāne ārabbha satiṁ paṭilabhati—
sn48.11:3.2idaṁ vuccati, bhikkhave, satindriyaṁ.
sn48.11:3.3Katamañca, bhikkhave, samādhindriyaṁ?
sn48.11:4.1Idha, bhikkhave, ariyasāvako vossaggārammaṇaṁ karitvā labhati samādhiṁ, labhati cittassa ekaggataṁ—
sn48.11:4.2idaṁ vuccati, bhikkhave, samādhindriyaṁ.
sn48.11:4.3Katamañca, bhikkhave, paññindriyaṁ?
sn48.11:5.1Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā—
sn48.11:5.2idaṁ vuccati, bhikkhave, paññindriyaṁ.
sn48.11:5.3Imāni kho, bhikkhave, pañcindriyānī”ti.
sn48.11:5.4Paṭhamaṁ.
sn48.11:5.5