完整巴利原文 · 稳定分页 当前仅加载第 57 阅读页；保留 Bilara 原生段落标识，每页最多 120 段。
Saṁyutta Nikāya 48.57
sn48.57:0.16. Sūkarakhatavagga
sn48.57:0.2Sahampatibrahmasutta
sn48.57:0.3Ekaṁ samayaṁ bhagavā uruvelāyaṁ viharati najjā nerañjarāya tīre ajapālanigrodhe paṭhamābhisambuddho.
sn48.57:1.1Atha kho bhagavato rahogatassa paṭisallīnassa evaṁ cetaso parivitakko udapādi:
sn48.57:1.2“pañcindriyāni bhāvitāni bahulīkatāni amatogadhāni honti amataparāyaṇāni amatapariyosānāni.
sn48.57:1.3Katamāni pañca?
sn48.57:1.4Saddhindriyaṁ bhāvitaṁ bahulīkataṁ amatogadhaṁ hoti amataparāyaṇaṁ amatapariyosānaṁ.
sn48.57:1.5Vīriyindriyaṁ …pe…
sn48.57:1.6satindriyaṁ …pe…
sn48.57:1.7samādhindriyaṁ …pe…
sn48.57:1.8paññindriyaṁ bhāvitaṁ bahulīkataṁ amatogadhaṁ hoti amataparāyaṇaṁ amatapariyosānaṁ.
sn48.57:1.9Imāni pañcindriyāni bhāvitāni bahulīkatāni amatogadhāni honti amataparāyaṇāni amatapariyosānānī”ti.
sn48.57:1.10Atha kho brahmā sahampati bhagavato cetasā cetoparivitakkamaññāya—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evameva brahmaloke antarahito bhagavato purato pāturahosi.
sn48.57:2.1Atha kho brahmā sahampati ekaṁsaṁ uttarāsaṅgaṁ karitvā yena bhagavā tenañjaliṁ paṇāmetvā bhagavantaṁ etadavoca:
sn48.57:2.2“evametaṁ, bhagavā, evametaṁ sugata.
sn48.57:2.3Pañcindriyāni bhāvitāni bahulīkatāni amatogadhāni honti amataparāyaṇāni amatapariyosānāni.
sn48.57:2.4Katamāni pañca?
sn48.57:2.5Saddhindriyaṁ bhāvitaṁ bahulīkataṁ amatogadhaṁ hoti amataparāyaṇaṁ amatapariyosānaṁ …pe… paññindriyaṁ bhāvitaṁ bahulīkataṁ amatogadhaṁ hoti amataparāyaṇaṁ amatapariyosānaṁ.
sn48.57:2.6Imāni pañcindriyāni bhāvitāni bahulīkatāni amatogadhāni honti amataparāyaṇāni amatapariyosānāni.
sn48.57:2.7Bhūtapubbāhaṁ, bhante, kassape sammāsambuddhe brahmacariyaṁ acariṁ.
sn48.57:3.1Tatrapi maṁ evaṁ jānanti:
sn48.57:3.2‘sahako bhikkhu, sahako bhikkhū’ti.
sn48.57:3.3So khvāhaṁ, bhante, imesaṁyeva pañcannaṁ indriyānaṁ bhāvitattā bahulīkatattā kāmesu kāmacchandaṁ virājetvā kāyassa bhedā paraṁ maraṇā sugatiṁ brahmalokaṁ upapanno.
sn48.57:3.4Tatrapi maṁ evaṁ jānanti:
sn48.57:3.5‘brahmā sahampati, brahmā sahampatī’ti.
sn48.57:3.6Evametaṁ, bhagavā, evametaṁ sugata.
sn48.57:3.7Ahametaṁ jānāmi, ahametaṁ passāmi yathā imāni pañcindriyāni bhāvitāni bahulīkatāni amatogadhāni honti amataparāyaṇāni amatapariyosānānī”ti.
sn48.57:3.8Sattamaṁ.
sn48.57:3.9