完整巴利原文 · 稳定分页 当前仅加载第 15 阅读页；保留 Bilara 原生段落标识，每页最多 120 段。
Saṁyutta Nikāya 51.15
sn51.15:0.12. Pāsādakampanavagga
sn51.15:0.2Uṇṇābhabrāhmaṇasutta
sn51.15:0.3Evaṁ me sutaṁ—
sn51.15:1.1ekaṁ samayaṁ āyasmā ānando kosambiyaṁ viharati ghositārāme.
sn51.15:1.2Atha kho uṇṇābho brāhmaṇo yenāyasmā ānando tenupasaṅkami; upasaṅkamitvā āyasmatā ānandena saddhiṁ sammodi.
sn51.15:1.3Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho uṇṇābho brāhmaṇo āyasmantaṁ ānandaṁ etadavoca:
sn51.15:1.4“kimatthiyaṁ nu kho, bho ānanda, samaṇe gotame brahmacariyaṁ vussatī”ti?
sn51.15:1.5“Chandappahānatthaṁ kho, brāhmaṇa, bhagavati brahmacariyaṁ vussatī”ti.
sn51.15:1.6“Atthi pana, bho ānanda, maggo atthi paṭipadā etassa chandassa pahānāyā”ti?
sn51.15:2.1“Atthi kho, brāhmaṇa, maggo, atthi paṭipadā etassa chandassa pahānāyā”ti.
sn51.15:2.2“Katamo pana, bho ānanda, maggo katamā paṭipadā etassa chandassa pahānāyā”ti?
sn51.15:3.1“Idha, brāhmaṇa, bhikkhu chandasamādhippadhānasaṅkhārasamannāgataṁ iddhipādaṁ bhāveti,
sn51.15:3.2vīriyasamādhi …pe…
sn51.15:3.3cittasamādhi …
sn51.15:3.4vīmaṁsāsamādhippadhānasaṅkhārasamannāgataṁ iddhipādaṁ bhāveti—
sn51.15:3.5ayaṁ kho, brāhmaṇa, maggo ayaṁ paṭipadā etassa chandassa pahānāyā”ti.
sn51.15:3.6“Evaṁ sante, bho ānanda, santakaṁ hoti no asantakaṁ.
sn51.15:4.1Chandeneva chandaṁ pajahissatīti—netaṁ ṭhānaṁ vijjati”.
sn51.15:4.2“Tena hi, brāhmaṇa, taññevettha paṭipucchissāmi. Yathā te khameyya tathā taṁ byākareyyāsi.
sn51.15:4.3Taṁ kiṁ maññasi, brāhmaṇa,
sn51.15:4.4ahosi te pubbe chando ‘ārāmaṁ gamissāmī’ti?
sn51.15:4.5Tassa te ārāmagatassa yo tajjo chando so paṭippassaddho”ti?
sn51.15:4.6“Evaṁ, bho”.
sn51.15:4.7“Ahosi te pubbe vīriyaṁ ‘ārāmaṁ gamissāmī’ti?
sn51.15:4.8Tassa te ārāmagatassa yaṁ tajjaṁ vīriyaṁ taṁ paṭippassaddhan”ti?
sn51.15:4.9“Evaṁ, bho”.
sn51.15:4.10“Ahosi te pubbe cittaṁ ‘ārāmaṁ gamissāmī’ti?
sn51.15:4.11Tassa te ārāmagatassa yaṁ tajjaṁ cittaṁ taṁ paṭippassaddhan”ti?
sn51.15:4.12“Evaṁ, bho”.
sn51.15:4.13“Ahosi te pubbe vīmaṁsā ‘ārāmaṁ gamissāmī’ti?
sn51.15:4.14Tassa te ārāmagatassa yā tajjā vīmaṁsā sā paṭippassaddhā”ti?
sn51.15:4.15“Evaṁ, bho”.
sn51.15:4.16“Evameva kho, brāhmaṇa, yo so bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, tassa yo pubbe chando ahosi arahattappattiyā, arahattappatte yo tajjo chando so paṭippassaddho;
sn51.15:5.1yaṁ pubbe vīriyaṁ ahosi arahattappattiyā, arahattappatte yaṁ tajjaṁ vīriyaṁ taṁ paṭippassaddhaṁ;
sn51.15:5.2yaṁ pubbe cittaṁ ahosi arahattappattiyā, arahattappatte yaṁ tajjaṁ cittaṁ taṁ paṭippassaddhaṁ;
sn51.15:5.3yā pubbe vīmaṁsā ahosi arahattappattiyā, arahattappatte yā tajjā vīmaṁsā sā paṭippassaddhā.
sn51.15:5.4Taṁ kiṁ maññasi, brāhmaṇa,
sn51.15:5.5iti evaṁ sante, santakaṁ vā hoti no asantakaṁ vā”ti?
sn51.15:5.6“Addhā, bho ānanda, evaṁ sante, santakaṁ hoti no asantakaṁ.
sn51.15:6.1Abhikkantaṁ, bho ānanda, abhikkantaṁ, bho ānanda.
sn51.15:6.2Seyyathāpi, bho ānanda, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā ānandena anekapariyāyena dhammo pakāsito.
sn51.15:6.3Esāhaṁ, bho ānanda, taṁ bhavantaṁ gotamaṁ saraṇaṁ gacchāmi dhammañca bhikkhusaṅghañca.
sn51.15:6.4Upāsakaṁ maṁ bhavaṁ ānando dhāretu ajjatagge pāṇupetaṁ saraṇaṁ gatan”ti.
sn51.15:6.5Pañcamaṁ.
sn51.15:6.6