相应部第 56 相应

Saṁyutta Nikāya 56.17

2. Dhammacakkappavattanavagga

Avijjāsutta

Ekamantaṁ nisinno kho so bhikkhu bhagavantaṁ etadavoca:

“‘avijjā, avijjā’ti, bhante, vuccati.

Katamā nu kho, bhante, avijjā;

kittāvatā ca avijjāgato hotī”ti?

“Yaṁ kho, bhikkhu, dukkhe aññāṇaṁ, dukkhasamudaye aññāṇaṁ, dukkhanirodhe aññāṇaṁ, dukkhanirodhagāminiyā paṭipadāya aññāṇaṁ—

ayaṁ vuccati, bhikkhu, avijjā;

ettāvatā ca avijjāgato hotīti.

Tasmātiha, bhikkhu, ‘idaṁ dukkhan’ti yogo karaṇīyo …pe… ‘ayaṁ dukkhanirodhagāminī paṭipadā’ti yogo karaṇīyo”ti.

Sattamaṁ.