上座部大分别（巴利原文）

Sabbe paṭiggaṇhanti ekaṁ vīmaṁsāpetvā ekaṁ paccāharāpenti, āpatti sabbesaṁ saṅghādisesassa.

Puriso bhikkhuṁ āṇāpeti—

“gaccha, bhante, itthannāmaṁ itthiṁ vīmaṁsā”ti.

Paṭiggaṇhāti vīmaṁsati paccāharati, āpatti saṅghādisesassa.

Puriso bhikkhuṁ āṇāpeti—

“gaccha, bhante, itthannāmaṁ itthiṁ vīmaṁsā”ti.

Paṭiggaṇhāti vīmaṁsati antevāsiṁ paccāharāpeti, āpatti saṅghādisesassa.

Puriso bhikkhuṁ āṇāpeti—

“gaccha, bhante, itthannāmaṁ itthiṁ vīmaṁsā”ti.

Paṭiggaṇhāti antevāsiṁ vīmaṁsāpetvā attanā paccāharati, āpatti saṅghādisesassa.

Puriso bhikkhuṁ āṇāpeti—

“gaccha, bhante, itthannāmaṁ itthiṁ vimaṁsā”ti.

Paṭiggaṇhāti antevāsiṁ vīmaṁsāpeti antevāsī vīmaṁsitvā bahiddhā paccāharati, āpatti ubhinnaṁ thullaccayassa.

Gacchanto sampādeti, āgacchanto visaṁvādeti, āpatti thullaccayassa.

Gacchanto visaṁvādeti, āgacchanto sampādeti, āpatti thullaccayassa.

Gacchanto sampādeti, āgacchanto sampādeti, āpatti saṅghādisesassa.

Gacchanto visaṁvādeti, āgacchanto visaṁvādeti, anāpatti.

Anāpatti—

saṅghassa vā cetiyassa vā gilānassa vā karaṇīyena gacchati,

ummattakassa,

ādikammikassāti.

5.1. Vinītavatthuuddānagāthā

Suttā matā ca nikkhantā,

anitthī itthipaṇḍakā;

Kalahaṁ katvāna sammodi,

sañcarittañca paṇḍaketi.

5.2. Vinītavatthu

Tena kho pana samayena aññataro puriso aññataraṁ bhikkhuṁ āṇāpesi—

“gaccha, bhante, itthannāmaṁ itthiṁ vīmaṁsā”ti.

So gantvā manusse pucchi—

“kahaṁ itthannāmā”ti?

“Suttā, bhante”ti.

Tassa kukkuccaṁ ahosi—

“bhagavatā sikkhāpadaṁ paññattaṁ,

kacci nu kho ahaṁ saṅghādisesaṁ āpattiṁ āpanno”ti?

Bhagavato etamatthaṁ ārocesi—

“Anāpatti, bhikkhu, saṅghādisesassa;

āpatti dukkaṭassā”ti.

Tena kho pana samayena aññataro puriso aññataraṁ bhikkhuṁ āṇāpesi—

“gaccha, bhante, itthannāmaṁ itthiṁ vīmaṁsā”ti.

So gantvā manusse pucchi—

“kahaṁ itthannāmā”ti?

“Matā, bhante”ti …pe…

“nikkhantā, bhante”ti …

“anitthī, bhante”ti …

“itthipaṇḍakā, bhante”ti.

Tassa kukkuccaṁ ahosi …pe…

“anāpatti, bhikkhu, saṅghādisesassa;

āpatti dukkaṭassā”ti.

Tena kho pana samayena aññatarā itthī sāmikena saha bhaṇḍitvā mātugharaṁ agamāsi.

Kulūpako bhikkhu sammodanīyaṁ akāsi.

Tassa kukkuccaṁ ahosi …pe…

“alaṁvacanīyā, bhikkhū”ti?

“Nālaṁvacanīyā, bhagavā”ti.

“Anāpatti, bhikkhu, nālaṁvacanīyāyā”ti.

Tena kho pana samayena aññataro bhikkhu paṇḍake sañcarittaṁ samāpajji.

Tassa kukkuccaṁ ahosi …pe…

“anāpatti, bhikkhu, saṅghādisesassa;

āpatti thullaccayassā”ti.

Sañcarittasikkhāpadaṁ niṭṭhitaṁ pañcamaṁ.