上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ovādavagga

22. Atthaṅgatasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena therā bhikkhū bhikkhuniyo ovadanti pariyāyena. Tena kho pana samayena āyasmato cūḷapanthakassa pariyāyo hoti bhikkhuniyo ovadituṁ.

Bhikkhuniyo evamāhaṁsu—“na dāni ajja ovādo iddho bhavissati, taññeva dāni udānaṁ ayyo cūḷapanthako punappunaṁ bhaṇissatī”ti.

Atha kho tā bhikkhuniyo yenāyasmā cūḷapanthako tenupasaṅkamiṁsu; upasaṅkamitvā āyasmantaṁ cūḷapanthakaṁ abhivādetvā ekamantaṁ nisīdiṁsu.

Ekamantaṁ nisinnā kho tā bhikkhuniyo āyasmā cūḷapanthako etadavoca—“samaggāttha, bhaginiyo”ti?

“Samaggāmhāyyā”ti.

“Vattanti, bhaginiyo, aṭṭha garudhammā”ti?

“Vattantāyyā”ti.

“Eso, bhaginiyo, ovādo”ti niyyādetvā imaṁ udānaṁ punappunaṁ abhāsi—

“Adhicetaso appamajjato,

Munino monapathesu sikkhato;

Sokā na bhavanti tādino,

Upasantassa sadā satīmato”ti.

Bhikkhuniyo evamāhaṁsu—“nanu avocumhā—na dāni ajja ovādo iddho bhavissati, taññeva dāni udānaṁ ayyo cūḷapanthako punappunaṁ bhaṇissatī”ti.

Assosi kho āyasmā cūḷapanthako tāsaṁ bhikkhunīnaṁ imaṁ kathāsallāpaṁ.

Atha kho āyasmā cūḷapanthako vehāsaṁ abbhuggantvā ākāse antalikkhe caṅkamatipi tiṭṭhatipi nisīdatipi seyyampi kappeti dhūmāyatipi pajjalatipi antaradhāyatipi, tañceva udānaṁ bhaṇati aññañca bahuṁ buddhavacanaṁ.

Bhikkhuniyo evamāhaṁsu—

“acchariyaṁ vata bho, abbhutaṁ vata bho.

Na vata no ito pubbe ovādo evaṁ iddho bhūtapubbo yathā ayyassa cūḷapanthakassā”ti.

Atha kho āyasmā cūḷapanthako tā bhikkhuniyo yāva samandhakārā ovaditvā uyyojesi—“gacchatha, bhaginiyo”ti.

Atha kho tā bhikkhuniyo nagaradvāre thakite bahinagare vasitvā kālasseva nagaraṁ pavisanti.

Manussā ujjhāyanti khiyyanti vipācenti—“abrahmacāriniyo imā bhikkhuniyo;

ārāme bhikkhūhi saddhiṁ vasitvā idāni nagaraṁ pavisantī”ti.

Assosuṁ kho bhikkhū tesaṁ manussānaṁ ujjhāyantānaṁ khiyyantānaṁ vipācentānaṁ.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma āyasmā cūḷapanthako atthaṅgate sūriye bhikkhuniyo ovadissatī”ti …pe…

“saccaṁ kira tvaṁ, cūḷapanthaka, atthaṅgate sūriye bhikkhuniyo ovadasī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tvaṁ, cūḷapanthaka, atthaṅgate sūriye bhikkhuniyo ovadissasi.

Netaṁ, cūḷapanthaka, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Sammatopi ce bhikkhu atthaṅgate sūriye bhikkhuniyo ovadeyya, pācittiyan”ti.

Sammato nāma

ñatticatutthena kammena sammato.

Atthaṅgate sūriyeti

oggate sūriye.

Bhikkhunī nāma

ubhatosaṅghe upasampannā.

Ovadeyyāti

aṭṭhahi vā garudhammehi aññena vā dhammena ovadati, āpatti pācittiyassa.

Atthaṅgate atthaṅgatasaññī ovadati, āpatti pācittiyassa.

Atthaṅgate vematiko ovadati, āpatti pācittiyassa.

Atthaṅgate anatthaṅgatasaññī ovadati, āpatti pācittiyassa.

Ekatoupasampannāya ovadati, āpatti dukkaṭassa.

Anatthaṅgate atthaṅgatasaññī, āpatti dukkaṭassa.

Anatthaṅgate vematiko, āpatti dukkaṭassa.

Anatthaṅgate anatthaṅgatasaññī, anāpatti.

Anāpatti—

uddesaṁ dento,

paripucchaṁ dento,

“osārehi ayyā”ti vuccamāno, osāreti,

pañhaṁ pucchati,

pañhaṁ puṭṭho katheti,

aññassatthāya bhaṇantaṁ bhikkhuniyo suṇanti,

sikkhamānāya,

sāmaṇeriyā,

ummattakassa,

ādikammikassāti.

Atthaṅgatasikkhāpadaṁ niṭṭhitaṁ dutiyaṁ.