上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ovādavagga

27. Saṁvidhānasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena chabbaggiyā bhikkhū bhikkhunīhi saddhiṁ saṁvidhāya ekaddhānamaggaṁ paṭipajjanti.

Manussā ujjhāyanti khiyyanti vipācenti—

“yatheva mayaṁ sapajāpatikā āhiṇḍāma, evamevime samaṇā sakyaputtiyā bhikkhunīhi saddhiṁ saṁvidhāya āhiṇḍantī”ti.

Assosuṁ kho bhikkhū tesaṁ manussānaṁ ujjhāyantānaṁ khiyyantānaṁ vipācentānaṁ.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū bhikkhunīhi saddhiṁ saṁvidhāya ekaddhānamaggaṁ paṭipajjissantī”ti …pe…

“saccaṁ kira tumhe, bhikkhave, bhikkhunīhi saddhiṁ saṁvidhāya ekaddhānamaggaṁ paṭipajjathā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, bhikkhunīhi saddhiṁ saṁvidhāya ekaddhānamaggaṁ paṭipajjissatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha.

“Yo pana bhikkhu bhikkhuniyā saddhiṁ saṁvidhāya ekaddhānamaggaṁ paṭipajjeyya, antamaso gāmantarampi, pācittiyan”ti.

Evañcidaṁ bhagavatā bhikkhūnaṁ sikkhāpadaṁ paññattaṁ hoti.

Tena kho pana samayena sambahulā bhikkhū ca bhikkhuniyo ca sāketā sāvatthiṁ addhānamaggappaṭipannā honti.

Atha kho tā bhikkhuniyo te bhikkhū etadavocuṁ—

“mayampi ayyehi saddhiṁ gamissāmā”ti.

“Na, bhaginī, kappati bhikkhuniyā saddhiṁ saṁvidhāya ekaddhānamaggaṁ paṭipajjituṁ.

Tumhe vā paṭhamaṁ gacchatha mayaṁ vā gamissāmā”ti.

“Ayyā, bhante, aggapurisā.

Ayyāva paṭhamaṁ gacchantū”ti.

Atha kho tāsaṁ bhikkhunīnaṁ pacchā gacchantīnaṁ antarāmagge corā acchindiṁsu ca dūsesuñca.

Atha kho tā bhikkhuniyo sāvatthiṁ gantvā bhikkhunīnaṁ etamatthaṁ ārocesuṁ.

Bhikkhuniyo bhikkhūnaṁ etamatthaṁ ārocesuṁ.

Bhikkhū bhagavato etamatthaṁ ārocesuṁ.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, satthagamanīye magge sāsaṅkasammate sappaṭibhaye bhikkhuniyā saddhiṁ saṁvidhāya ekaddhānamaggaṁ paṭipajjituṁ.

Evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu bhikkhuniyā saddhiṁ saṁvidhāya ekaddhānamaggaṁ paṭipajjeyya, antamaso gāmantarampi, aññatra samayā, pācittiyaṁ.

Tatthāyaṁ samayo. Satthagamanīyo hoti maggo sāsaṅkasammato sappaṭibhayo—ayaṁ tattha samayo”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Bhikkhunī nāma

ubhatosaṅghe upasampannā.

Saddhinti

ekato.

Saṁvidhāyāti—

“gacchāma, bhagini, gacchāmāyya; gacchāmāyya, gacchāma, bhagini; ajja vā hiyyo vā pare vā gacchāmā”ti saṁvidahati, āpatti dukkaṭassa.

Antamaso gāmantarampīti

kukkuṭasampāte gāme, gāmantare gāmantare āpatti pācittiyassa.

Agāmake araññe, addhayojane addhayojane āpatti pācittiyassa.

Aññatra samayāti

ṭhapetvā samayaṁ.

Satthagamanīyo nāma maggo

na sakkā hoti vinā satthena gantuṁ.

Sāsaṅkaṁ nāma

tasmiṁ magge corānaṁ niviṭṭhokāso dissati, bhuttokāso dissati, ṭhitokāso dissati, nisinnokāso dissati, nipannokāso dissati.

Sappaṭibhayaṁ nāma

tasmiṁ magge corehi manussā hatā dissanti, viluttā dissanti, ākoṭitā dissanti, sappaṭibhayaṁ gantvā appaṭibhayaṁ dassetvā uyyojetabbā— “gacchatha, bhaginiyo”ti.

Saṁvidahite saṁvidahitasaññī ekaddhānamaggaṁ paṭipajjati, antamaso gāmantarampi, aññatra samayā, āpatti pācittiyassa.

Saṁvidahite vematiko ekaddhānamaggaṁ paṭipajjati, antamaso gāmantarampi, aññatra samayā, āpatti pācittiyassa.

Saṁvidahite, asaṁvidahitasaññī ekaddhānamaggaṁ paṭipajjati, antamaso gāmantarampi, aññatra samayā, āpatti pācittiyassa.

Bhikkhu saṁvidahati bhikkhunī na saṁvidahati, āpatti dukkaṭassa.

Asaṁvidahite saṁvidahitasaññī, āpatti dukkaṭassa.

Asaṁvidahite vematiko, āpatti dukkaṭassa.

Asaṁvidahite asaṁvidahitasaññī, anāpatti.

Anāpatti—

samaye,

asaṁvidahitvā gacchati,

bhikkhunī saṁvidahati, bhikkhu na saṁvidahati,

visaṅketena gacchanti,

āpadāsu,

ummattakassa,

ādikammikassāti.

Saṁvidhānasikkhāpadaṁ niṭṭhitaṁ sattamaṁ.