上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ovādavagga

28. Nāvābhiruhanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena chabbaggiyā bhikkhū bhikkhunīhi saddhiṁ saṁvidhāya ekaṁ nāvaṁ abhiruhanti.

Manussā ujjhāyanti khiyyanti vipācenti—

“yatheva mayaṁ sapajāpatikā nāvāya kīḷāma, evamevime samaṇā sakyaputtiyā bhikkhunīhi saddhiṁ saṁvidhāya nāvāya kīḷantī”ti.

Assosuṁ kho bhikkhū tesaṁ manussānaṁ ujjhāyantānaṁ khiyyantānaṁ vipācentānaṁ.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū bhikkhunīhi saddhiṁ saṁvidhāya ekaṁ nāvaṁ abhiruhissantī”ti …pe…

“saccaṁ kira tumhe, bhikkhave, bhikkhunīhi saddhiṁ saṁvidhāya ekaṁ nāvaṁ abhiruhathā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, bhikkhunīhi saddhiṁ saṁvidhāya ekaṁ nāvaṁ abhiruhissatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu bhikkhuniyā saddhiṁ saṁvidhāya ekaṁ nāvaṁ abhiruheyya, uddhaṅgāminiṁ vā adhogāminiṁ vā, pācittiyan”ti.

Evañcidaṁ bhagavatā bhikkhūnaṁ sikkhāpadaṁ paññattaṁ hoti.

Tena kho pana samayena sambahulā bhikkhū ca bhikkhuniyo ca sāketā sāvatthiṁ addhānamaggappaṭipannā honti.

Antarāmagge nadī taritabbā hoti.

Atha kho tā bhikkhuniyo te bhikkhū etadavocuṁ—

“mayampi ayyehi saddhiṁ uttarissāmā”ti.

“Na, bhaginī, kappati bhikkhuniyā saddhiṁ saṁvidhāya ekaṁ nāvaṁ abhiruhituṁ;

tumhe vā paṭhamaṁ uttaratha mayaṁ vā uttarissāmā”ti.

“Ayyā, bhante, aggapurisā.

Ayyāva paṭhamaṁ uttarantū”ti.

Atha kho tāsaṁ bhikkhunīnaṁ pacchā uttarantīnaṁ corā acchindiṁsu ca dūsesuñca.

Atha kho tā bhikkhuniyo sāvatthiṁ gantvā bhikkhunīnaṁ etamatthaṁ ārocesuṁ.

Bhikkhuniyo bhikkhūnaṁ etamatthaṁ ārocesuṁ.

Bhikkhū bhagavato etamatthaṁ ārocesuṁ.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, tiriyaṁ taraṇāya bhikkhuniyā saddhiṁ saṁvidhāya ekaṁ nāvaṁ abhiruhituṁ.

Evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu bhikkhuniyā saddhiṁ saṁvidhāya ekaṁ nāvaṁ abhiruheyya uddhaṅgāminiṁ vā adhogāminiṁ vā, aññatra tiriyaṁ taraṇāya, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Bhikkhunī nāma

ubhatosaṅghe upasampannā.

Saddhinti

ekato.

Saṁvidhāyāti

“abhiruhāma, bhagini, abhiruhāmāyya; abhiruhāmāyya, abhiruhāma, bhagini; ajja vā hiyyo vā pare vā abhiruhāmā”ti saṁvidahati āpatti dukkaṭassa.

Bhikkhuniyā abhiruḷhe bhikkhu abhiruhati, āpatti pācittiyassa.

Bhikkhumhi abhiruḷhe bhikkhunī abhiruhati, āpatti pācittiyassa.

Ubho vā abhiruhanti, āpatti pācittiyassa.

Uddhaṅgāmininti

ujjavanikāya.

Adhogāmininti

ojavanikāya.

Aññatra tiriyaṁ taraṇāyāti

ṭhapetvā tiriyaṁ taraṇaṁ.

Kukkuṭasampāte gāme, gāmantare gāmantare āpatti pācittiyassa.

Agāmake araññe, aḍḍhayojane aḍḍhayojane āpatti pācittiyassa.

Saṁvidahite saṁvidahitasaññī ekaṁ nāvaṁ abhiruhati uddhaṅgāminiṁ vā adhogāminiṁ vā, aññatra tiriyaṁ taraṇāya, āpatti pācittiyassa.

Saṁvidahite vematiko ekaṁ nāvaṁ abhiruhati uddhaṅgāminiṁ vā adhogāminiṁ vā, aññatra tiriyaṁ taraṇāya, āpatti pācittiyassa.

Saṁvidahite asaṁvidahitasaññī ekaṁ nāvaṁ abhiruhati uddhaṅgāminiṁ vā adhogāminiṁ vā, aññatra tiriyaṁ taraṇāya, āpatti pācittiyassa.

Bhikkhu saṁvidahati, bhikkhunī na saṁvidahati, āpatti dukkaṭassa.

Asaṁvidahite saṁvidahitasaññī, āpatti dukkaṭassa.

Asaṁvidahite vematiko, āpatti dukkaṭassa.

Asaṁvidahite, asaṁvidahitasaññī, anāpatti.

Anāpatti—

tiriyaṁ taraṇāya,

asaṁvidahitvā abhiruhanti,

bhikkhunī saṁvidahati, bhikkhu na saṁvidahati,

visaṅketena abhiruhanti,

āpadāsu,

ummattakassa,

ādikammissāti.

Nāvābhiruhanasikkhāpadaṁ niṭṭhitaṁ aṭṭhamaṁ.