上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ovādavagga

29. Paripācitasikkhāpada

Tena samayena buddho bhagavā rājagahe viharati veḷuvane kalandakanivāpe.

Tena kho pana samayena thullanandā bhikkhunī aññatarassa kulassa kulūpikā hoti niccabhattikā.

Tena ca gahapatinā therā bhikkhū nimantitā honti.

Atha kho thullanandā bhikkhunī pubbaṇhasamayaṁ nivāsetvā pattacīvaramādāya yena taṁ kulaṁ tenupasaṅkami; upasaṅkamitvā taṁ gahapatiṁ etadavoca—

“kimidaṁ, gahapati, pahūtaṁ khādanīyaṁ bhojanīyaṁ paṭiyattan”ti?

“Therā mayā, ayye, nimantitā”ti.

“Ke pana te, gahapati, therā”ti?

“Ayyo sāriputto ayyo mahāmoggallāno ayyo mahākaccāno ayyo mahākoṭṭhiko ayyo mahākappino ayyo mahācundo ayyo anuruddho ayyo revato ayyo upāli ayyo ānando ayyo rāhulo”ti.

“Kiṁ pana tvaṁ, gahapati, mahānāge tiṭṭhamāne ceṭake nimantesī”ti?

“Ke pana te, ayye, mahānāgā”ti?

“Ayyo devadatto ayyo kokāliko ayyo kaṭamodakatissako ayyo khaṇḍadeviyā putto ayyo samuddadatto”ti.

Ayaṁ carahi thullanandāya bhikkhuniyā antarā kathā vippakatā, atha te therā bhikkhū pavisiṁsu.

“Saccaṁ mahānāgā kho tayā, gahapati, nimantitā”ti.

“Idāneva kho tvaṁ, ayye, ceṭake akāsi; idāni mahānāge”ti.

Gharato ca nikkaḍḍhi, niccabhattañca pacchindi.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma devadatto jānaṁ bhikkhuniparipācitaṁ piṇḍapātaṁ bhuñjissatī”ti …pe…

“saccaṁ kira tvaṁ, devadatta, jānaṁ bhikkhuniparipācitaṁ piṇḍapātaṁ bhuñjasī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tvaṁ, moghapurisa, jānaṁ bhikkhuniparipācitaṁ piṇḍapātaṁ bhuñjissasi.

Netaṁ, moghapurisa, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu jānaṁ bhikkhuniparipācitaṁ piṇḍapātaṁ bhuñjeyya, pācittiyan”ti.

Evañcidaṁ bhagavatā bhikkhūnaṁ sikkhāpadaṁ paññattaṁ hoti.

Tena kho pana samayena aññataro bhikkhu rājagahā pabbajito ñātikulaṁ agamāsi.

Manussā—“cirassampi bhadanto āgato”ti sakkaccaṁ bhattaṁ akaṁsu.

Tassa kulassa kulūpikā bhikkhunī te manusse etadavoca—

“dethayyassa, āvuso, bhattan”ti.

Atha kho so bhikkhu—

“bhagavatā paṭikkhittaṁ jānaṁ bhikkhuniparipācitaṁ piṇḍapātaṁ bhuñjitun”ti kukkuccāyanto na paṭiggahesi.

Nāsakkhi piṇḍāya carituṁ, chinnabhatto ahosi.

Atha kho so bhikkhu ārāmaṁ gantvā bhikkhūnaṁ etamatthaṁ ārocesi.

Bhikkhū bhagavato etamatthaṁ ārocesuṁ.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, pubbe gihisamārambhe jānaṁ bhikkhuniparipācitaṁ piṇḍapātaṁ bhuñjituṁ.

Evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu jānaṁ bhikkhuniparipācitaṁ piṇḍapātaṁ bhuñjeyya, aññatra pubbe gihisamārambhā, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Jānāti nāma

sāmaṁ vā jānāti aññe vā tassa ārocenti sā vā āroceti.

Bhikkhunī nāma

ubhatosaṅghe upasampannā.

Paripāceti nāma

pubbe adātukāmānaṁ akattukāmānaṁ— “ayyo bhāṇako, ayyo bahussuto, ayyo suttantiko, ayyo vinayadharo, ayyo dhammakathiko, detha ayyassa, karotha ayyassā”ti esā paripāceti nāma.

Piṇḍapāto nāma

pañcannaṁ bhojanānaṁ aññataraṁ bhojanaṁ.

Aññatra pubbe gihisamārambhāti

ṭhapetvā gihisamārambhaṁ.

Gihisamārambho nāma

ñātakā vā honti pavāritā vā pakatipaṭiyattaṁ vā.

Aññatra pubbe gihisamārambhā bhuñjissāmīti paṭiggaṇhāti, āpatti dukkaṭassa.

Ajjhohāre ajjhohāre, āpatti pācittiyassa.

Paripācite paripācitasaññī bhuñjati, aññatra pubbe gihisamārambhā, āpatti pācittiyassa.

Paripācite vematiko bhuñjati, aññatra pubbe gihisamārambhā, āpatti dukkaṭassa.

Paripācite aparipācitasaññī bhuñjati, aññatra pubbe gihisamārambhā, anāpatti.

Ekatoupasampannāya paripācitaṁ bhuñjati, aññatra pubbe gihisamārambhā, āpatti dukkaṭassa.

Aparipācite paripācitasaññī, āpatti dukkaṭassa.

Aparipācite vematiko, āpatti dukkaṭassa.

Aparipācite aparipācitasaññī, anāpatti.

Anāpatti—

pubbe gihisamārambhe,

sikkhamānā paripāceti,

sāmaṇerī paripāceti,

pañca bhojanāni ṭhapetvā sabbattha anāpatti,

ummattakassa,

ādikammikassāti.

Paripācitasikkhāpadaṁ niṭṭhitaṁ navamaṁ.