上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ratanavagga

91. Vassikasāṭikāsikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhagavatā bhikkhūnaṁ vassikasāṭikā anuññātā hoti.

Chabbaggiyā bhikkhū—

“bhagavatā vassikasāṭikā anuññātā”ti appamāṇikāyo vassikasāṭikāyo dhārenti.

Puratopi pacchatopi ākaḍḍhantā āhiṇḍanti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū appamāṇikāyo vassikasāṭikāyo dhāressantī”ti …pe…

“saccaṁ kira tumhe, bhikkhave, appamāṇikāyo vassikasāṭikāyo dhārethā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, appamāṇikāyo vassikasāṭikāyo dhāressatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Vassikasāṭikaṁ pana bhikkhunā kārayamānena pamāṇikā kāretabbā.

Tatridaṁ pamāṇaṁ—dīghaso cha vidatthiyo, sugatavidatthiyā; tiriyaṁ aḍḍhateyyā.

Taṁ atikkāmayato chedanakaṁ pācittiyan”ti.

Vassikasāṭikā nāma

vassānassa catumāsatthāya.

Kārayamānenāti

karonto vā kārāpento vā. Pamāṇikā kāretabbā.

Tatridaṁ pamāṇaṁ— dīghaso cha vidatthiyo, sugatavidatthiyā; tiriyaṁ aḍḍhateyyā.

Taṁ atikkāmetvā karoti vā kārāpeti vā, payoge dukkaṭaṁ.

Paṭilābhena chinditvā pācittiyaṁ desetabbaṁ.

Attanā vippakataṁ attanā pariyosāpeti, āpatti pācittiyassa.

Attanā vippakataṁ parehi pariyosāpeti, āpatti pācittiyassa.

Parehi vippakataṁ attanā pariyosāpeti, āpatti pācittiyassa.

Parehi vippakataṁ parehi pariyosāpeti, āpatti pācittiyassa.

Aññassatthāya karoti vā kārāpeti vā, āpatti dukkaṭassa.

Aññena kataṁ paṭilabhitvā paribhuñjati, āpatti dukkaṭassa.

Anāpatti—

pamāṇikaṁ karoti,

ūnakaṁ karoti,

aññena kataṁ pamāṇātikkantaṁ paṭilabhitvā chinditvā paribhuñjati,

vitānaṁ vā bhūmattharaṇaṁ vā sāṇipākāraṁ vā bhisiṁ vā bibbohanaṁ vā karoti,

ummattakassa,

ādikammikassāti.

Vassikasāṭikāsikkhāpadaṁ niṭṭhitaṁ navamaṁ.