上座部大分别（巴利原文）

Theravāda Vinaya

Mahāvibhaṅga

Pācittiyakaṇḍa

Ratanavagga

92. Nandasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena āyasmā nando bhagavato mātucchāputto abhirūpo hoti dassanīyo pāsādiko caturaṅgulomako bhagavatā.

So sugatacīvarappamāṇaṁ cīvaraṁ dhāreti.

Addasaṁsu kho therā bhikkhū āyasmantaṁ nandaṁ dūratova āgacchantaṁ.

Disvāna—

“bhagavā āgacchatī”ti āsanā vuṭṭhahanti.

Te upagate jānitvā ujjhāyanti khiyyanti vipācenti—

“kathañhi nāma āyasmā nando sugatacīvarappamāṇaṁ cīvaraṁ dhāressatī”ti …pe…

“saccaṁ kira tvaṁ, nanda, sugatacīvarappamāṇaṁ cīvaraṁ dhāresī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tvaṁ, nanda, sugatacīvarappamāṇaṁ cīvaraṁ dhāressasi.

Netaṁ, nanda, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu sugatacīvarappamāṇaṁ cīvaraṁ kārāpeyya atirekaṁ vā, chedanakaṁ pācittiyaṁ.

Tatridaṁ sugatassa sugatacīvarappamāṇaṁ—dīghaso nava vidatthiyo, sugatavidatthiyā; tiriyaṁ cha vidatthiyo.

Idaṁ sugatassa sugatacīvarappamāṇan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Sugatacīvarappamāṇaṁ nāma

dīghaso nava vidatthiyo, sugatavidatthiyā; tiriyaṁ cha vidatthiyo.

Kārāpeyyāti

karoti vā kārāpeti vā, payoge dukkaṭaṁ.

Paṭilābhena chinditvā pācittiyaṁ desetabbaṁ.

Attanā vippakataṁ attanā pariyosāpeti, āpatti pācittiyassa.

Attanā vippakataṁ parehi pariyosāpeti, āpatti pācittiyassa.

Parehi vippakataṁ attanā pariyosāpeti, āpatti pācittiyassa.

Parehi vippakataṁ parehi pariyosāpeti, āpatti pācittiyassa.

Aññassatthāya karoti vā kārāpeti vā, āpatti dukkaṭassa.

Aññena kataṁ paṭilabhitvā paribhuñjati, āpatti dukkaṭassa.

Anāpatti—

ūnakaṁ karoti,

aññena kataṁ paṭilabhitvā chinditvā paribhuñjati,

vitānaṁ vā bhūmattharaṇaṁ vā sāṇipākāraṁ vā bhisiṁ vā bibbohanaṁ vā karoti,

ummattakassa,

ādikammikassāti.

Nandasikkhāpadaṁ niṭṭhitaṁ dasamaṁ.

Ratanavaggo navamo.

Tassuddānaṁ

Rañño ca ratanaṁ santaṁ,

sūci mañcañca tūlikaṁ;

Nisīdanañca kaṇḍuñca,

vassikā sugatena cāti.

Uddiṭṭhā kho, āyasmanto, dvenavuti pācittiyā dhammā.

Tatthāyasmante pucchāmi—

“kaccittha parisuddhā”?

Dutiyampi pucchāmi—

“kaccittha parisuddhā”?

Tatiyampi pucchāmi—

“kaccittha parisuddhā”?

Parisuddhetthāyasmanto, tasmā tuṇhī, evametaṁ dhārayāmīti.

Khuddakaṁ samattaṁ.

Pācittiyakaṇḍaṁ niṭṭhitaṁ.