上座部大分别（巴利原文）

Theravāda Vinaya

Mahāvibhaṅga

Pāṭidesanīyakaṇḍa

2. Dutiyapāṭidesanīyasikkhāpada

Tena samayena buddho bhagavā rājagahe viharati veḷuvane kalandakanivāpe.

Tena kho pana samayena bhikkhū kulesu nimantitā bhuñjanti.

Chabbaggiyā bhikkhuniyo chabbaggiyānaṁ bhikkhūnaṁ vosāsantiyo ṭhitā honti—

“idha sūpaṁ detha, idha odanaṁ dethā”ti.

Chabbaggiyā bhikkhū yāvadatthaṁ bhuñjanti.

Aññe bhikkhū na cittarūpaṁ bhuñjanti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū bhikkhuniyo vosāsantiyo na nivāressantī”ti …pe…

“saccaṁ kira tumhe, bhikkhave, bhikkhuniyo vosāsantiyo na nivārethā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, bhikkhuniyo vosāsantiyo na nivāressatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Bhikkhū paneva kulesu nimantitā bhuñjanti, tatra ce sā bhikkhunī vosāsamānarūpā ṭhitā hoti—‘idha sūpaṁ detha, idha odanaṁ dethā’ti, tehi bhikkhūhi sā bhikkhunī apasādetabbā— ‘apasakka tāva, bhagini, yāva bhikkhū bhuñjantī’ti. Ekassa cepi bhikkhuno na paṭibhāseyya taṁ bhikkhuniṁ apasādetuṁ— ‘apasakka tāva, bhagini, yāva bhikkhū bhuñjantī’ti paṭidesetabbaṁ tehi bhikkhūhi—

‘gārayhaṁ, āvuso, dhammaṁ āpajjimhā asappāyaṁ pāṭidesanīyaṁ, taṁ paṭidesemā’”ti.

Bhikkhū paneva kulesu nimantitā bhuñjantīti

kulaṁ nāma cattāri kulāni— khattiyakulaṁ, brāhmaṇakulaṁ, vessakulaṁ, suddakulaṁ.

Nimantitā bhuñjantīti

pañcannaṁ bhojanānaṁ aññatarena bhojanena nimantitā bhuñjanti.

Bhikkhunī nāma

ubhatosaṅghe upasampannā.

Vosāsantī nāma

yathāmittatā yathāsandiṭṭhatā yathāsambhattatā yathāsamānupajjhāyakatā yathāsamānācariyakatā— “idha sūpaṁ detha, idha odanaṁ dethā”ti. Esā vosāsantī nāma.

Tehi bhikkhūhīti

bhuñjamānehi bhikkhūhi.

Sā bhikkhunīti

yā sā vosāsantī bhikkhunī.

Tehi bhikkhūhi sā bhikkhunī apasādetabbā— “apasakka tāva, bhagini, yāva bhikkhū bhuñjantī”ti.

Ekassa cepi bhikkhuno anapasādito— “khādissāmi bhuñjissāmī”ti paṭiggaṇhāti, āpatti dukkaṭassa.

Ajjhohāre ajjhohāre āpatti pāṭidesanīyassa.

Upasampannāya upasampannasaññī vosāsantiyā na nivāreti, āpatti pāṭidesanīyassa.

Upasampannāya vematiko vosāsantiyā na nivāreti, āpatti pāṭidesanīyassa.

Upasampannāya anupasampannasaññī vosāsantiyā na nivāreti, āpatti pāṭidesanīyassa.

Ekatoupasampannāya vosāsantiyā na nivāreti, āpatti dukkaṭassa.

Anupasampannāya upasampannasaññī, āpatti dukkaṭassa.

Anupasampannāya vematiko, āpatti dukkaṭassa.

Anupasampannāya anupasampannasaññī, anāpatti.

Anāpatti—

attano bhattaṁ dāpeti na deti,

aññesaṁ bhattaṁ deti na dāpeti,

yaṁ na dinnaṁ taṁ dāpeti,

yattha na dinnaṁ tattha dāpeti,

sabbesaṁ samakaṁ dāpeti,

sikkhamānā vosāsati,

sāmaṇerī vosāsati,

pañca bhojanāni ṭhapetvā sabbattha, anāpatti,

ummattakassa,

ādikammikassāti.

Dutiyapāṭidesanīyasikkhāpadaṁ niṭṭhitaṁ.