上座部律藏犍度（巴利原文）

Yo na gaṇheyya, āpatti dukkaṭassā”ti.

Tena kho pana samayena aññataro bhikkhu bālo hoti.

Taṁ bhikkhuniyo upasaṅkamitvā etadavocuṁ—

“ovādaṁ, ayya, gaṇhāhī”ti.

“Ahañhi, bhaginī, bālo;

kathāhaṁ ovādaṁ gaṇhāmī”ti?

“Gaṇhāhayya, ovādaṁ;

evañhi bhagavatā paññattaṁ—

bhikkhūhi bhikkhunīnaṁ ovādo gahetabbo”ti.

Bhagavato etamatthaṁ ārocesuṁ.

“Anujānāmi, bhikkhave, ṭhapetvā bālaṁ, avasesehi ovādaṁ gahetun”ti.

Tena kho pana samayena aññataro bhikkhu gilāno hoti.

Taṁ bhikkhuniyo upasaṅkamitvā etadavocuṁ—

“ovādaṁ, ayya, gaṇhāhī”ti.

“Ahañhi, bhaginī, gilāno;

kathāhaṁ ovādaṁ gaṇhāmī”ti?

“Gaṇhāhayya, ovādaṁ;

evañhi bhagavatā paññattaṁ—

ṭhapetvā bālaṁ, avasesehi ovādo gahetabbo”ti.

Bhagavato etamatthaṁ ārocesuṁ.

“Anujānāmi, bhikkhave, ṭhapetvā bālaṁ, ṭhapetvā gilānaṁ, avasesehi ovādaṁ gahetun”ti.

Tena kho pana samayena aññataro bhikkhu gamiko hoti.

Taṁ bhikkhuniyo upasaṅkamitvā etadavocuṁ—

“ovādaṁ, ayya, gaṇhāhī”ti.

“Ahañhi, bhaginī, gamiko;

kathāhaṁ ovādaṁ gaṇhāmī”ti?

“Gaṇhāhayya, ovādaṁ;

evañhi bhagavatā paññattaṁ—

ṭhapetvā bālaṁ, ṭhapetvā gilānaṁ, avasesehi ovādo gahetabbo”ti.

Bhagavato etamatthaṁ ārocesuṁ.

“Anujānāmi, bhikkhave, ṭhapetvā bālaṁ, ṭhapetvā gilānaṁ, ṭhapetvā gamikaṁ, avasesehi ovādaṁ gahetun”ti.

Tena kho pana samayena aññataro bhikkhu araññe viharati.

Taṁ bhikkhuniyo upasaṅkamitvā etadavocuṁ—

“ovādaṁ, ayya, gaṇhāhī”ti.

“Ahañhi, bhaginī, araññe viharāmi;

kathāhaṁ ovādaṁ gaṇhāmī”ti?

“Gaṇhāhayya, ovādaṁ;

evañhi bhagavatā paññattaṁ—

ṭhapetvā bālaṁ, ṭhapetvā gilānaṁ, ṭhapetvā gamikaṁ, avasesehi ovādo gahetabbo”ti.

Bhagavato etamatthaṁ ārocesuṁ.

“Anujānāmi, bhikkhave, āraññikena bhikkhunā ovādaṁ gahetuṁ, saṅketañca kātuṁ—

atra patiharissāmī”ti.

Tena kho pana samayena bhikkhū ovādaṁ gahetvā na ārocenti.

Bhagavato etamatthaṁ ārocesuṁ.

“Na, bhikkhave, ovādo na ārocetabbo.

Yo na āroceyya, āpatti dukkaṭassā”ti.

Tena kho pana samayena bhikkhū ovādaṁ gahetvā na paccāharanti.

Bhagavato etamatthaṁ ārocesuṁ.

“Na, bhikkhave, ovādo na paccāharitabbo.

Yo na paccāhareyya, āpatti dukkaṭassā”ti.

Tena kho pana samayena bhikkhuniyo saṅketaṁ na gacchanti.

Bhagavato etamatthaṁ ārocesuṁ.

“Na, bhikkhave, bhikkhuniyā saṅketaṁ na gantabbaṁ.

Yā na gaccheyya, āpatti dukkaṭassā”ti.

Tena kho pana samayena bhikkhuniyo dīghāni kāyabandhanāni dhārenti, teheva phāsukā nāmenti.

Manussā ujjhāyanti khiyyanti vipācenti …pe…

seyyathāpi gihinī kāmabhoginiyo”ti.

Bhagavato etamatthaṁ ārocesuṁ.

“Na, bhikkhave, bhikkhuniyā dīghaṁ kāyabandhanaṁ dhāretabbaṁ.

Yā dhāreyya, āpatti dukkaṭassa.

Anujānāmi, bhikkhave, bhikkhuniyā ekapariyākataṁ kāyabandhanaṁ, na ca tena phāsukā nāmetabbā.

Yā nāmeyya, āpatti dukkaṭassā”ti.

Tena kho pana samayena bhikkhuniyo vilīvena paṭṭena phāsukā nāmenti …pe…

cammapaṭṭena phāsukā nāmenti.

Dussapaṭṭena phāsukā nāmenti.

Dussaveṇiyā phāsukā nāmenti.

Dussavaṭṭiyā phāsukā nāmenti.

Coḷapaṭṭena phāsukā nāmenti.

Coḷaveṇiyā phāsukā nāmenti.

Coḷavaṭṭiyā phāsukā nāmenti.

Suttaveṇiyā phāsukā nāmenti.

Suttavaṭṭiyā phāsukā nāmenti.

Manussā ujjhāyanti khiyyanti vipācenti …pe…

seyyathāpi gihinī kāmabhoginiyo”ti.

Bhagavato etamatthaṁ ārocesuṁ.

“Na, bhikkhave, bhikkhuniyā vilīvena paṭṭena phāsukā nāmetabbā …pe…

na suttavaṭṭiyā phāsukā nāmetabbā.

Yā nāmeyya, āpatti dukkaṭassā”ti.

Tena kho pana samayena bhikkhuniyo aṭṭhillena jaghanaṁ ghaṁsāpenti …pe…

gohanukena jaghanaṁ koṭṭāpenti, hatthaṁ koṭṭāpenti, hatthakocchaṁ koṭṭāpenti, pādaṁ koṭṭāpenti, pādakocchaṁ koṭṭāpenti, ūruṁ koṭṭāpenti, mukhaṁ koṭṭāpenti, dantamaṁsaṁ koṭṭāpenti.

Manussā ujjhāyanti khiyyanti vipācenti …pe…

seyyathāpi gihinī kāmabhoginiyo”ti.

Bhagavato etamatthaṁ ārocesuṁ.

“Na, bhikkhave, bhikkhuniyā aṭṭhillena jaghanaṁ ghaṁsāpetabbaṁ …pe…

na dantamaṁsaṁ koṭṭāpetabbaṁ.

Yā koṭṭāpeyya, āpatti dukkaṭassā”ti.

Tena kho pana samayena chabbaggiyā bhikkhuniyo mukhaṁ ālimpanti …pe…

mukhaṁ ummaddenti, mukhaṁ cuṇṇenti, manosilikāya mukhaṁ lañchenti, aṅgarāgaṁ karonti, mukharāgaṁ karonti, aṅgarāgamukharāgaṁ karonti.

Manussā ujjhāyanti khiyyanti vipācenti …pe…

seyyathāpi gihinī kāmabhoginiyo”ti.

Bhagavato etamatthaṁ ārocesuṁ.

“Na, bhikkhave, bhikkhuniyā mukhaṁ ālimpitabbaṁ …pe…

na mukhaṁ ummadditabbaṁ, na mukhaṁ cuṇṇetabbaṁ, na manosilikāya mukhaṁ lañchetabbaṁ, na aṅgarāgo kātabbo, na mukharāgo kātabbo, na aṅgarāgamukharāgo kātabbo.

Yā kareyya, āpatti dukkaṭassā”ti.

Tena kho pana samayena chabbaggiyā bhikkhuniyo avaṅgaṁ karonti …pe…

visesakaṁ karonti, olokanakena olokenti, sāloke tiṭṭhanti;

naccaṁ kārāpenti, vesiṁ vuṭṭhāpenti, pānāgāraṁ ṭhapenti, sūnaṁ ṭhapenti, āpaṇaṁ pasārenti, vaḍḍhiṁ payojenti, vaṇijjaṁ payojenti, dāsaṁ upaṭṭhāpenti, dāsiṁ upaṭṭhāpenti, kammakāraṁ upaṭṭhāpenti, kammakāriṁ upaṭṭhāpenti, tiracchānagataṁ upaṭṭhāpenti, harītakapakkikaṁ pakiṇanti, namatakaṁ dhārenti.

Manussā ujjhāyanti khiyyanti vipācenti …pe…

seyyathāpi gihinī kāmabhoginiyo”ti.

Bhagavato etamatthaṁ ārocesuṁ.

“Na, bhikkhave, bhikkhuniyā avaṅgaṁ kātabbaṁ …pe…

na visesakaṁ kātabbaṁ, na olokanakena oloketabbaṁ, na sāloke ṭhātabbaṁ, na naccaṁ kārāpetabbaṁ, na vesī vuṭṭhāpetabbā, na pānāgāraṁ ṭhapetabbaṁ, na sūnā ṭhapetabbā, na āpaṇo pasāretabbo, na vaḍḍhi payojetabbā, na vaṇijjā payojetabbā, na dāso upaṭṭhāpetabbo, na dāsī upaṭṭhāpetabbā, na kammakāro upaṭṭhāpetabbo, na kammakārī upaṭṭhāpetabbā, na tiracchānagato upaṭṭhāpetabbo, na harītakapakkikaṁ pakiṇitabbaṁ, na namatakaṁ dhāretabbaṁ.

Yā dhāreyya, āpatti dukkaṭassā”ti.

Tena kho pana samayena chabbaggiyā bhikkhuniyo sabbanīlakāni cīvarāni dhārenti …pe…

sabbapītakāni cīvarāni dhārenti, sabbalohitakāni cīvarāni dhārenti, sabbamañjiṭṭhikāni cīvarāni dhārenti, sabbakaṇhāni cīvarāni dhārenti, sabbamahāraṅgarattāni cīvarāni dhārenti, sabbamahānāmarattāni cīvarāni dhārenti, acchinnadasāni cīvarāni dhārenti, dīghadasāni cīvarāni dhārenti, pupphadasāni cīvarāni dhārenti, phaladasāni cīvarāni dhārenti, kañcukaṁ dhārenti, tirīṭakaṁ dhārenti.

Manussā ujjhāyanti khiyyanti vipācenti …pe…

seyyathāpi gihinī kāmabhoginiyo”ti.

Bhagavato etamatthaṁ ārocesuṁ.

“Na, bhikkhave, bhikkhuniyā sabbanīlakāni cīvarāni dhāretabbāni …pe…

na tirīṭakaṁ dhāretabbaṁ.

Yā dhāreyya, āpatti dukkaṭassā”ti.

Tena kho pana samayena aññatarā bhikkhunī kālaṁ karontī evamāha—

“mamaccayena mayhaṁ parikkhāro saṅghassa hotū”ti.

Tattha bhikkhū ca bhikkhuniyo ca vivadanti—

“amhākaṁ hoti, amhākaṁ hotī”ti.

Bhagavato etamatthaṁ ārocesuṁ.

“Bhikkhunī ce, bhikkhave, kālaṁ karontī evaṁ vadeyya—

‘mamaccayena mayhaṁ parikkhāro saṅghassa hotū’ti, anissaro tattha bhikkhusaṅgho, bhikkhunisaṅghassevetaṁ.

Sikkhamānā ce, bhikkhave …pe…

sāmaṇerī ce, bhikkhave, kālaṁ karontī evaṁ vadeyya—